Pa 12 March, 2023, Mubali Wilfrid Sohinto, wa mu Komiti ya Nthambi ku Benin wangupharazga za kutuzgika kwa Bayibolu la Charu Chifya la Malemba Ngakupaturika muchineneru cha Chikabiye. Bayibolu ili lingutuzgika pa unganu wo unguchitikiya ku Kara mucharu cha Togo. Pa unganu uwu penga ŵanthu akujumpha 2,959. a Bayibolu lati latuzgika waka, wosi wo ŵenga pa unganu wenuwu angulonde Bayibolu lakusindikiza kweniso lingwamba kusanirika pa webusayiti yidu ya jw.org kuti ŵanthu achitengi dawunilodi.

Ŵanthu anandi wo alongoro chineneru cha Chikabiye aja kunkhondi mucharu cha Togo. Kweniso chineneru chenichi chikambika so muvyaru vakufupi ndi charu cha Togo nge Benin ndi Ghana. Ndipu ŵanthu pafufupi 1 miliyoni alongoro chineneru chenichi.

Muchineneru cha Chikabiye mwe Mabayibolu nganyaki, kweni ndi Bayibolu la Charu Chifya la Malemba Ngakupaturika pe lo lendi zina laku Chiuta mumalu ngosi ngo likhumbikiya. Pe Bayibolu linyaki la chineneru chenichi lo le ndi zina laku Chiuta kweni lisanirika pa lemba la Ekisodo 3:15 pe.

Bayibolu la Charu Chifya la Malemba Ngakupaturika lati latuzgika, yumoza mwa akufwatuliya wangukamba kuti: “Yehova watiwovya ukongwa pa ntchitu yakufwatuliya yeniyi kuti tije ndi Bayibolu. Bayibolu ili litiwovyengi ukongwa mu uteŵeti kweniso tikondwengi kuligwiriskiya ntchitu pa maunganu nga mpingu.”

Tikondwe limoza ndi abali ŵidu wo alongoro chineneru cha Chikabiye kuti alonde mphasu yakuzirwa ukongwa yo yiŵawovyengi “pakuthamika zina laku Yehova.”—Salimo 135:1.