Pa 18 January 2021, khoti la ku Turkmen likuyeruzga kuti Mubali Artur Yangibayev wakaje mujeri kwa vyaka viŵi chifukwa chakukana kusere usilikali. Yaka nkhachiŵi kuti Mubali uyu wambiki mulandu chifukwa chakukana kusere usilikali.

Artur Yangibayev

• Chaka cho Wanguwiya: 1997 (Ku Seydi)

• Mo Wakukuliya: Weche munamana, Artur wangukumana ndi masuzgu nganandi ngo ngamuchitiskanga kuti wajifumbengi kuti ntchifukwa wuli pacharu pachitika vinthu vinandi vambula urunji. Wangukambiskana fumbu lenili ndi mzichi waki yo njumoza wa Akaboni aku Yehova. Venivi vinguchitiska kuti wati wakwaniska vyaka 13 wayambi kusambira Bayibolu. Wangubatizika mu 2014

  Wagwira ntchitu ya vakuzengazenga kweniso kunozga nyumba. Apapi ŵaki atimukamba kuti ndi mwana wamampha ukongwa. Ndipu ŵanthu wo akuzengezgana nawu nyumba nawu so atimutumbika chifukwa cha nkharu yamampha yo walongo muchigaŵa

Pa 8 August 2016, Artur angumumanga chifukwa chakuti wangukana kusere usilikali ndipu angumuŵika mujeri kulindizgiya mulandu waki. Pa 30 August, angumuyeruzga kuti wakaje mujeri kwa vyaka viŵi. Mu 2018, Artur angumutuzga mujeri wamaliza vyaka vo angumulangiya.

Pa 15 December 2020, angumuchichizga so kachiŵi kuti wakasere usilikali. Venivi vati vachitika ŵaka, loya wakumiya boma wangumufumba mafumbu ndipuso kumukambiya kuti wakonkhoski chifukwa cho wakaniya kusere usilikali kweni wachiti venivi mwakuchita kulemba.

Pa 30 December, loya uyu wangukambiya Artur kuti we ndi mulandu. Mwaviyo angumulonda pasipoti yaki.

Artur wangukamba kuti pa nyengu yo wangumangika kakwamba, “lemba la mu Bayibolu la Aroma 8:37-39 lingundiwovya kusimikiza mtima kuti palivi munthu yo wanganditondekesa kuja wakugomezgeka kwaku Yehova.” Tiziŵa kuti Yehova wamuwovyengi so Artur pa nyengu iyi kuti wakukunthiyepu.