Pa 18 January 2021, khoti la ku Turkmenistan lingupereka cheruzgu pa mulandu wa Mubali Azamatjan Narkuliyev. Iyu akumuyeruzga kuti wakaje mujeri kwa vyaka viŵi chifukwa chakukana kusere usilikali. Yaka nkhachiŵi kuti mubali uyu waje mujeri chifukwa chakukana kusere usilikali.

Azamatjan Narkuliyev

• Chaka cho Wakuwiya: 2000

• Mo Wakukuliya: Wakubatizika mu 2018. Watesesa kuja ndi mbiri yamampha pankhani yakujiyuyuwa ndipuso phamphu. Anyina ndipuso azichi ŵaki ŵaŵi nawu so mbakaboni aku Yehova

Pa 7 January 2020, Azamatjan yo panyengu iyi wenga ndi vyaka 20, wangukwanisa chaka chimoza cho angumulangiya pakwamba kuti waje mujeri chifukwa chakukana kusere usilikali. Ku Turkmenistan munthu angamumba mulandu kachiŵi pa mulandu wakuyanana waka pavuli pakuti wamaliza nyengu yakwamba yo angumulangiya. Mwaviyo, pati pajumpha waka myezi yinkhondi kutuliya po Azamatjan angumutuzgiya, ŵaraŵara ŵa asilikali angumukambiya so kuti wakasere usilikali. Wati wakana so arara a boma angumumba mbwenu mulandu.

Pa 20 December 2020, loya wangumujuliya mulandu Mubali Azamatjan. Arara a boma angumulonda so pasipoti yaki.

Tipemphere Azamatjan ndi ŵanthu a mubanja laki, ndipu tiziŵa kuti azamulonde mphotu chifukwa chakugomezgeka kwawu. Bayibolu lititisimikizgiya kuti ku “munthu wakugomezgeka [Yehova wazakumuchitiya] vinthu mwakugomezgeka.”—Salimo 18:25.