Pa 19 January, 2021, Khoti la ku Turkmenistan likuyeruzga Mubali Veniamin Gendjiyev kuti wakaje mujeri kwa vyaka viŵi chifukwa chakukana kusere usilikali chifukwa cha vo wagomezga.

Veniamin Gendjiyev

• Chaka cho Wakuwiya: 2000 (Seydi)

• Mo Wakukuliya: Wakulereke mubanja la Akaboni aku Yehova. Wanguja mupharazgi pa nyengu yo wenga ndi vyaka 15 ndipu wakubatizika we ndi vyaka 19. Mubali uyu waziŵika kuti ngwakufwasa kweniso ngwakuchezeka

  Wangusambira umekanika. Watanja kumba gitala. Ŵana anyaki asukulu amusekanga kusukulu chifukwa chakuti ndi Kaboni waku Yehova. Wangusambira mo wangavikiliya fundu za mu Bayibolu zo wagomezga

Mu July 2018, Veniamin wanguyeruzgika kuti wakaje mujeri kwa chaka chimoza chifukwa chakukana kusere usilikali chifukwa cha vo wagomezga. Pa 25 June 2019 angumutuzga mujeri.

Pa 25 December 2020, wangudanika ku ofesi yakumiya boma pa milandu ya muchigaŵa cha Dyanev. Arara a boma angumukambiya kuti walembi kalata yakukonkhoska vo wakaniya kusere usilikali. Pa 30 December 2020, loya wakumiya boma pa milandu wangukambiya Mubali Veniamin kuti amusaniya so ndi mulandu unyaki. Yiwu angumulonda pasipoti yaki.

Mubali Veniamin wakumbuka mo vinthu venge ŵati amujaliya mujeri ulendu wakwamba, iyu wanguti: “Ndawonanga kuti Yehova wandiwovyanga. Iyu wangundipaska nthazi kuti ndifiski kukunthiyapu ndipu chivwanu changu chingukho ukongwa. Ndapempheranga kwaku Yehova kweniso ndakambiyangaku anyangu mujeri uthenga wamampha. Venivi vandiwovyanga kuti ndileki kusuzgika maŵanaŵanu.

“Pa nyengu yo ndenga mujeri, apapi ŵangu andipaskanga moni wakutuwa ku ŵanthu wo afiskanga cha kuzindiwona. Ivi vandiwovyanga kukunthiyapu mpaka po ndingutuzgikiya mujeri.”

Lemba limoza lo lamuchiskanga ukongwa Veniamin ndi Yesaya 54:17. Chigaŵa chinyaki cha lemba ili chikamba kuti: “Palivi chidya cho chapangikiya yiwi cho chazamuchita kanthu.” Malemba nge yanga kweniso mapempheru ngidu vingamuwovya mubali widu kuti wakunthiyepu chiyesu chenichi.