Pa 10 February 2021, khoti la ku Turkmenistan likumusaniya ndi mulandu Mubali Nazar Alliyev ndipu likumuyeruzga kuti wakaje mujeri kwa chaka chimoza chifukwa cha vo wagomezga.

Nazar Alliyev

• Chaka cho Wakuwiya: 2000 ( Muchigaŵa cha Lebap)

• Mo Wakukuliya: Waja ku Türkmenabat limoza ndi anyina kweniso abali ŵaki ŵaŵi. Watanja kutchaya volleyball ndipuso bola lamalundi. Wasuzgika ndi nthenda ya mtima wo we ndi masuzgu ngaŵi. Wagwiranga ntchitu yakumeta sisi

  Anyina ndiwu akumusambiza fundu za mu Bayibolu. Wangubatizika mu 2015 ndipu pa nyengu iyi wenga ndi vyaka 14. Iyu waziŵika kuti ndi mnyamata wamampha ukongwa, wakuseka ndi ŵanthu, wakupaska kweniso wakujiyuyuwa. Banja laki likondwa nayu chifukwa walutirizga kuja wakugomezgeka

Pa 16 May 2020, Mubali Nazar Alliyev wangutoleke ku ofesi ya asilikali. Ŵaraŵara angumuchichizga kuti wavwali yunifomu ya usilikali, yo yatingi yilongongi kuti wasere usilikali, kweni iyu wangukana. Pa 28 May, Nazar wangukumana so ndi ŵaraŵara yaŵa kachiŵi, kweni wangukana mbwenu kusere usilikali. Mu mwezi wa June, Nazar wangulemba kalata ku boma yakukonkhoska vo iyu wagomezga.

Pa 4 January 2021, Nazar ndi anyina anguluta kuchikumana ndi arara aboma ku Khojambaz. Nazar wangukonkhoska chifukwa cho wakaniya kusere usilikali ndipu wangupempha kuti amupasi waka ntchitu yinyaki yo wangagwira. Chinanga kuti wanguchita vosi venivi, kweni arara aboma angukamba kuti amumbengi mbwenu mulandu Mubali Nazar.

Nazar, yo pasonu panu we ndi vyaka 20 wangukamba kuti: “Asani uthemba Yehova mumasuzgu nge yanga, iyu watikupasa chimangu cha mumtima. Ndipu ndi chovyu chaku Yehova, ungakonkhoska vo ugomezga mtima we mumalu.”

Iyu wangulutirizga kukamba kuti: “Asani ndiŵanaŵaniya vo vandichitikiya, ndiwona kuti nyengu zosi Yehova watindiwovya. Venivi vitindisimikiziya kuti iyu wazakundiwovya so kunthazi.”

Charu cha Turkmenistan chipereka cha ntchitu zinyaki ku ŵanthu wo akana kusere usilikali. Venivi vichitiska kuti abali achinyamata wo akana kusere usilikali chifukwa cha vo agomezga, angaŵajaliya mujeri kwa vyaka viŵi. Pasonu panu, pe abali achinyamata 15 wo ŵe mujeri ku Turkmenistan chifukwa chakukana kusere usilikali.

Tiziŵa kuti Yehova walutirizgengi ‘kuŵachitiya vinthu mwakugomezgeka’ abali ŵidu achinyamata ku Turkmenistan kusazgapu Nazar.—Salimo 18:25.