Mubali David Petrosov we ndi vyaka 19 ndipu waja ku Turkmenistan. Chinanga kuti weche mwana, kweni wangukumana ndi chiyesu chikulu ukongwa. Iyu wanguja mujeri kwa chaka chimoza chifukwa njuŵi yaki yitimuzomereza cha kusere usilikali. Mubali mwenuyu angumutuzga mujeri pa 30 September 2020.

Mubali Petrosov wangukamba kuti: “Nyengu zinyaki asani nde mujeri ndajanga ndi chitima. Kweni Yehova wangundipembuzga ndi Mazu ngaki. Kuziŵa kuti Yehova wavwisa mo ndivwiya ndipuso ngwakunozgeka kundipembuzga kwandichiskanga kuti ndipempherengi kwaku iyu. Mavesi ngakupambanapambana ngandiwovya mu vakuchitika vakupambanapambana, kweni kanandi nditanja kukumbuka ukongwa lemba la Afilipi 4:13.”

Mubali Petrosov wakuwiya ku Ashgabat, mutawuni ya Turkmenistan. Iyu waziŵa kumba gitala. Watanja kulemba sumu, kutchaya bola, kukwera mapiri kweniso kusambira munyanja.

David wangusambira Bayibolu ku munyaki yo wasambiranga nayu sukulu yo wenga Kaboni waku Yehova. Pavuli paki wangubatizika mu 2019. Chinanga kuti mu banja laku David palivi yo ndi Kaboni kweni yiwu atumbika vo iyu wagomezga ndipuso agomezga Chiuta.

Wati wabatizgika waka, David wangutoleke ku khoti chifukwa chakukana kusere usilikali. Charu cha Turkmenistan chipereka cha mwaŵi wakugwira ntchitu zinyaki. Mwaviyo, arara a boma angumuŵika mujeri kwa chaka chimoza.

Kutuliya po angumuŵikiya mujeri, Yehova waja wachimuwovya Mubali Petrosov ndi chovyu cho wakhumbikiyanga. Mubali Petrosov wangukamba kuti “Po ndenga mujeri, ama angundikambiya vakukwaskana ndi abali kweniso azichi wo angaza cha kuzindiwona ndipu afumbanga mo vinthu viliri paumoyu wangu. Angundikambiya so kuti abali ndi azichi andipempheriyanga mwakuwerezawereza. Venivi vingundikondwesa ukongwa”

Mwakukoliyana ndi dangu laku Turkmenistan, David waziŵa kuti angamuchichizga so kuti wasere usilikali kachiŵi. Asani walutirizga kukana angamusaniya ndi mulandu ndipuso wangachija mujeri kwa vyaka vinandi.

David wangukamba kuti: “Nge munthu weyosi, ndikhumba cha kuweriyamu mujeri. Kweni nditopa cha. Nde ndi chiganga chifukwa cha chigomezgu cho ndenachu mwaku Yehova, abali ndi azichi ŵangu kweniso sumu zidu za Ufumu.”

Tigomezga kuti Yehova walutirizgengi kuwovya David kuti waje ndi chivwanu ndipuso chiganga. Tipemphere so abali 10 a ku Turkmenistan wo ŵe mujeri chifukwa chakuti njuŵi yawu yitiŵazomereza cha kusere usilikali. Tiziŵa kuti Yehova watiŵayanja, watiŵakumbuka ndipuso watiŵawovya.—Salimo 69:33.