Pa 16 March 2021, khoti la ku Turkmenistan lingupereka cheruzgu chaki pa mulandu wa Mubali Rasul Rozbayev. Iyu akumuyeruzga kuti wakaje mujeri vyaka viŵi chifukwa chakukana kusere usilikali chifukwa cha vo wagomezga. Yaka nkhachiŵi kumuyeruzga kuti ngwakunanga chifukwa chakukana kusere usilikali.

Rasul Rozbayev

• Chaka cho Wakuwiya: 1999 (Ku Khallang)

• Mo Wakukuliya: We ndi azichi ŵaki ŵaŵi ŵaraŵara ndi mvurwa waki. Wati wamaliza masambiru ngaki pasukulu yinyaki, wangwamba kusambira ntchitu yakumeta sisi. Watanja kutchaya bola la malundi ndi volleyball kweniso kusambira mumaji

  Apapi ŵaki anguja Akaboni aku Yehova iyu ŵeche mwana. Wakubatizika mu 2013

Mubali Rasul Rozbayev angumusaniya ndi mulandu kakwamba chifukwa chakukana kusere usilikali pa 19 December 2017. Ndipu angumuyeruzga kuti wagwirengi ntchitu zakufyo kwa vyaka viŵi. Angumupaska malu ngakuti walimengepu, wapandengi tirigu pa malu ngo ndipu 20 peresenti ya vinthu vo wavuna waviperekengi ku boma. Malu ngo angumupasa kuti walimengi ngenga kutali ndi kunyumba kwawu. Chifukwa chakuti wengavi galimotu, nyengu zosi wayendanga wapasi kuluta ndi kuwe.

Mwakukoliyana ndi dangu la ku Turkmenistan, arara a boma angamuyeruzga so kachiŵi kuti ngwakunanga chifukwa chakukana kusere usilikali. Mwakuti pa 22 April 2020, angumudana so kuti wakasere usilikali kweni wangukana mbwenu. Kwa myezi yinandi ivi vati vachitika, iyu walutanga ku ofesi ya asilikali mwakuwerezawereza kuti wakafumbiki mafumbu, kuchiwonana ndi dokotala ndipuso amukambiyanga kuti wamuja mujeri. Mulandu waki anguwutumiza ku maloya nga boma pa 22 January 2021.

Rasul wachiskika ukongwa ndi vakuwoniyapu va abali ndi azichi anyaki wo akunthiyapu masuzgu ngakuyanana ndi ngo iyu wakumana nangu. Rasul wangukamba kuti: “Vakuwoniyapu vawu vitindiwovya kuti ndithembengi Yehova . . . ndipu vitindipaska nthazi pa nyengu ya suzgu iyi. Yehova ndi Yesu akondwengi ukongwa asani ndingalutirizga kuja wakugomezgeka.” Chiyesu cho Rasul wakumana nachu chayesa chivwanu cha ŵanthu a mubanja laki. Anyina angukonkhoska vo vinguŵawovya kuja ndi nthazi pa nyengu yeniyi. Yiwu angukamba kuti: “Vo ndisambira pa vakuyeruzgiyapu va ŵanthu wo azumbulika mu Bayibolu kweniso mu mavidiyo ngidu, vitindiwovya kuziŵa kuti ndini pe cha ndikumana ndi chiyesu nge ichi. Abali ndi azichi anyaki nawu akukumanapu nachu, ndipu angupunda. Vakuwoniyapu vawu vitindichiska ukongwa kuti ndikunthiyepu.”

Rasul wapembuzgika ukongwa ndi mazu nga pa Salimo 37:23, 24. Ndipu ndi chovyu chaku Yehova, tiziŵa kuti iyu kweniso abali ŵidu anyaki achinyamata, alutirizgengi kuja ndi chivwanu, kuja akugomezgeka ndipuso alikondwa.