Pambula kuswera yapa, a Khoti la ku Turkmenstan liperekengi cheruzgu chakukwaskana ndi Mubali Ruslan Artykmyradov. Iyu angamuyeruzga kuti wakaje mujeri kwa vyaka viŵi chifukwa chakuti njuŵi yaki yitimuzomereza cha kusere usilikali. Iyu waja mujeri kulindiziya mulandu waki kutuwa pa 15 December, 2020. Aka nkhachiŵi kuti mubali uyu wambiki mulandu ndipu angamuyeruzga kuti wakaje mujeri chifukwa chakukana kusere usilikali.

Ruslan Artykmyradov

• Chaka cho Wakuwiya: 2000 (mumuzi wa Alpan Gengeshlik)

• Mo Wakukuliya: Wakukuliya muchigaŵa cha kumuzi. Wagwira ntchitu yakunozga magalimotu. Wenga mwana wankharu yamampha kusukulu ndipu watanja kutchaya bola.

  Wakusambizika mo wangagwiriskiya ntchitu fundu za mu Bayibolu kutuliya kwa anyina. Iyu wangukhorwa kuwona chanju kweniso kukoliyana kwa Akaboni aku Yehova ndipu wangubatizika mu 2015 we ndi vyaka 15. Kwanja Yehova Chiuta kungumuchitiska kuti wakani kusere usilikali.

Pa 13 August, 2018, Mubali Ruslan Artykmyradov, angumuyeruzga kuti wakaje mujeri kwa chaka chimoza chifukwa chakukana kusere usilikali. Pa nyengu iyi ndipu we ndi vyaka 18. Wangutuwa mujeri pa 12 August, 2019, wati wajamu kwa chaka chimoza.

Mwakukoliyana ndi dangu la ku Turkmenstan, achinyamata angaŵayeruzga kweniso kuŵajariya mujeri maulendu ngaŵi chifukwa chakukana kusere usilikali chifukwa cha vo agomezga. Mwaviyo, mu November 2020, Ruslan angumukambiya so kuti wakasere usilikali.

Yapa napu, Ruslan wangukana kusere usilikali, chinanga kuti waziŵanga kuti angamujariya so mujeri. Iyu angumumanga pa 15 December, 2020, ndipu angumuŵika mujeri kulindiziya mulandu waki.

Ruslan walutirizga kuja wakugomezgeka kwaku Yehova. Pakukamba va mulandu waki wakwamba, iyu wanguti: “Ndinguchita mantha cha, chinanga kuti ndaziŵanga kuti viŵengi vakusuzga ndipuso angandichitiya vinthu mwambula urunji. Likondwa kweniso ubwezi wangu ndi Yehova ndingavigulisa cha.”

Ruslan wakumananga ndi vinthu vakusuzga mujeri. Umoyu wenga wakusuzga ukongwa ndipu kanandi amuchitiyanga vinthu vankhaza. Kweni nyengu zosi waziŵanga kuti Yehova wamuwovyengi. Ruslan wangukamba kuti: “Po ndenga mujeri, nyengu zosi ndawonanga janja laku Yehova. Iyu wandiwovyanga asani munthu munyaki wandipuma. Mwakuyeruzgiyapu, asani munthu wandipuma fayiti yakwamba ndavwanga kupweteka, kweni mafayiti nganyaki ngosi ndavwanga so kupweteka cha.” Kusazgiyapu yapa, chanju cho abali ndi azichi mumpingu amulongonga chamuwovyanga kuja wakukho kweniso vawovyanga anyaki wo wenga nawu kuziŵa kuti wenga yija cha.

Chinanga kuti angamujariya so mujeri, Ruslan wagomezga kuti Yehova wamuwovyengi. Iyu wangukamba kuti: “Ndigomezga kuti Yehova wazakundipaska mphotu. . . . Po pe chilindizga chanthazi, pe likondwa lambula kumala; po pe likondwa, pe kukunthiyapu kweniso nthazi. Ndipu munthu yo we ndi nthazi wangafyoka cha.”

Titimuwonga ukongwa Ruslan ndi achinyamata anyaki wo mwachiganga alutilizga kulongo kuti Yehova, walutirizgengi kutiwovya kukunthiyapu mayeseru mwachiganga ndipuso mwalikondwa. Ndipu tiziŵa kuti azamulonde mphotu chifukwa cha kugomezgeka kwawu ku Ufumu waku Chiuta.—Aheberi 11:6.