Mubali Selim Taganov wati watuzgika mujeri pa 3 October 2020 wangukamba kuti: “Ndati ndapemphera kwaku Yehova, Iyu wangundiwovya kuti ndije wakufwasa.” Selim, yo we ndi vyaka 19 pe wanguja mujeri kwa chaka chimoza chifukwa chakuti njuŵi yaki yitimuzomereza cha kusere usilikali.

Selim wakuwiya ku Ashgabat, mutawuni ya Turkmenistan. Weche mwana, wenga mwana wa nkharu yamampha kusukulu ndipu watanja sumu. Selim walemba sumu, watumba ndipuso watumba gitala. Apapi ŵaki, abali ŵaki ŵaŵi kweniso anyaki atimuziŵa kuti ngwalisungu, ngwakufwasa ndipuso ngwalikondwa. Selim ŵechendayeruzgiki kuti we ndi mulandu, loya yo wamumiyanga pa mulandu waki wangukamba kuti: “Iyu ndi mwana wamampha ndipu wakweŵa cha pamwenga kumwa moŵa ukongwa ndipuso wamaliza sukulu pambula kuswera yapa. Kuja mujeri kungananga waka umoyu waki.”

Umoyu wa mujeri ngwakusuzga ukongwa. Kweni Selim wangukamba kuti: “Po ndenga mujeri, ubwezi wangu ndi Yehova ungukho ukongwa. Ndakumbukanga fundu za mu Bayibolu zo ndingusambira nde kunyumba ndipu ndingwamba kuzivwisa ukongwa. Kukumbuka lemba la Yesaya 41:10, 11 kungundichiska so ukongwa.

“Pa nyengu yo ndalindizanga kuti mulandu wangu uyeruzgiki mujeri, venga vakusuzga chifukwa pengavi munthu wakuti ndilongorongi nayu kweniso kumukambiya vo vitindifipiska mtima. Kweni ndingupemphera kwaku Yehova kuti wandiwovyi. Pavuli paki, akayidi ndi akuwonere jeri wo pakwamba andiwofyezanga angwamba kundiwovya kweniso andichiskanga. Vinthu vosi venivi vingundisimikiziya kuti Yehova ndiyu watindiwovya.”

Selim wanguchiskika so ndi abali ndi azichi a mumpingu. Selim wangukamba kuti: “Po ndenga mujeri, abali anandi anditumiziyanga moni kweniso andikambiyanga mazu ngakuchiska. Ndinguyesesa kuloweza fundu zo andikambiyanga ndipu pavuli paki ndawerezanga fundu zo ndakumbuka. Fundu zenizi zingundiwovya kuti ndije wakukho ndipuso zingundichiska.”

Mwakukoliyana ndi dangu la ku Turkmenistan, Selim angamudana so kuti wakasere usilikali. Asani venivi vazichitika, Selim waziŵa kuti wakhoza kuzija so mujeri kwanyengu yitali. Selim wangukamba kuti: “Ndati ndafiska kukunthiyapu chiyesu chenichi mwakuwovyeka ndi Yehova, ndifipa mtima cha ndi chiyesu chechosi cho ndingazikumana nachu munthazi. Chovyu chaku Yehova chandiwovya kuti ndije ndi chiganga kweniso kuti ndimuthembengi ukongwa.

Tosi tiziŵa kuti tazamukumana ndi mayeseru munthazi. Selim watitichiska kuti: “Kwaku wo azamukumana ndi mayeseru ngakuyanana ndi ngo ndakumana nangu, mukumbukengi mazu nga pa Yesaya 30:15 ngakuti: ‘Mwazamusaniya nthazi chifukwa chakuja mwakufwasa kweniso kundithemba.’”