Mubali Eziz Atabayev wangukunthiyapu pa nyengu yo wenga mujeri kwa vyaka viŵi ku Turkmenistan chifukwa chakukana kusere usilikali ndipu wangulutirizga kuja wakugomezgeka kwaku Yehova. Iyu wangutuwa mujeri pa 19 December 2020. Kwa vyaka vakujumpha 10 vo vajumpha, abali 46 aja achimangika mu charu ichi chifukwa chakukana kusere usilikali chifukwa cha vo agomezga.

Mu 2016, Mubali Atabayev angumudana kuti wakasere usilikali. Iyu wangukana kusere usilikali chifukwa njuŵi yaki yitimuzomereza cha. Mulandu waki anguwulutisa ku ofesi ya loya wa boma. Pati pajumpha vyaka pafufupi viŵi, Eziz angumudana kuti waluti ku khoti. Pa 19 December 2018, khoti lingumuyeruzga kuti wakaje mujeri kwa vyaka viŵi.

Eziz wangukamba kuti: “Ndeche kulindiza kuti khoti lizipereki cheruzgu, ndenga ndi nyengu yakukwana yakukambiskana ndi abali wo nawu angukumanapu ndi vo ini ndakumana navu pamwenga wo akujamu kali mujeri. Yiwu angundiwovya ukongwa kuziŵiya limu vo vichitika mujeri. Ndinguŵerenga nkhani zakupambanapambana mu mabuku ngidu zo zikonkhoska mbiri ya umoyu wangu. Ndinguŵerenga so nkhani zakuchiska mu Bayibolu.

“Mulenji wa zuŵa la mulandu wangu, mubali munyaki wangundilongo lemba la Yesaya 30:15, lo likamba kuti: “Mwazamusaniya nthazi chifukwa chakuja mwakufwasa kweniso kundithemba.” Nyengu zosi vesi lenili litindiwovya kuja wakugomezgeka kweniso kuthemba Yehova pa chechosi. Kuŵanaŵaniya vesi lenili nyengu zosi kwandiwovyanga po ndenga mujeri.”

Chinanga kuti umoyu wakujeri wenga wakusuzga, kweni cho chamuŵaŵanga ukongwa Eziz nkhulekana ndi ŵanthu a mubanja laki. Iyu wangukamba kuti: “Mujeri, ndenga pa ubwezi wakukho ndi Akaboni anyangu wo ndenga nawu limoza. Yiwu ŵenga mabwezi ngangu chayingu ndipu andiwovyanga kuti ndileki kudandaula chifukwa chakusoŵa ŵanthu a mubanja langu kweniso anyangu.”

Eziz wayesesanga so kukambiyaku anyaki vo wagomezga asani wasaniya mpata. Iyu wangukamba kuti: “Pakwamba, akayidi anyangu akhumbanga cha kuvwisiya asani ndayamba kuŵakambiya vo ndigomezga. Kweni mukuluta kwa nyengu, wo akananga kuvwisiya angwamba kuvwisiya. Asani kwaza akayidi asonu wo aleka kundiziŵa akananga kuvwisiya asani nditiŵapharazgiya. Kweni akayidi wo ndinguŵapharazgiyapu kali pakwamba, andimiyanga ndipu vo asambira akambiyangaku akayidi wo ŵaza sonu.”

Kuti tinozgeke masuzgu ngo tazamukumana nangu kunthazi, Eziz wangukamba kuti: “Nditikuchiskani kuti musambirengi mwakukwana pakumwija ndipuso mupempherengi kwaku Yehova. Mukhumbika kumukambiya chechosi, mo muvwiya kusazgapu vinthu vo mufipa navu mtima. Mumukambiyengi Yehova chechosi.

“Yehova wangundiwovya kukunthiyapu chiyesu chenichi. Ndikayika cha kuti Yehova wazakundiwovya so. Ndichita mantha cha ndi masuzgu ngo ndazamukumana nangu kunthazi.”—Salimo 118:6.