Pa 24 February 2022, nkhondu yingwamba ku Ukraine. Akaboni aku Yehova anandi ŵeche muvigaŵa vo kuchitika nkhondu. Abali 21 akutuliya mumatawuni nga ku Kremenchuk ndi Poltava mucharu cha Ukraine atiŵalongo chanju chayichu abali ndi azichi ŵawu. Yiwu atijipereka kuluta kumalu ko kuchitika nkhondu kuti akataski abali ndi azichi.

Abali yaŵa angwenda maulendu pafufupi 80 pamasabata 6. Mwaviyo, tingakamba kuti angwenda ulendu wa makilomita pafufupi 50,000 kumalu ko kuchitika ukongwa nkhondu nge ku Kharkiv ndipu akutaska abali ndi azichi pafufupi 400.

Pasonu panu, yiwu apereka matani 23 ngavakurya, kusazgapu munkhwala, mafuta nga galimotu ndi vinthu vinyaki. Ŵechendayambi ulendu wewosi, abali yaŵa anozgeke mo angayende mwakuphwere kuti akafiki umampha ndipuso alutaku cha kumalu ko nkhondu yasuzga ukongwa. Ulendu umoza ungato maora 19 chifukwa chakuti akhumbika kuma dankha pamalu nganyaki kuti apolisi awoni vo apinga mu magalimotu ngawu.

Po ayendanga, ndegi za nkhondu zachitanga kuŵajumpha pamutu musina nkhani. Abali awonanga nyumba zo zanangika chifukwa cha mabomba, vimagalimotu vankhondu ndipuso magalimotu ngo nganangika. Nyengu zinyaki, awonanga kuti charu chindengadenga chifukwa cha mabomba ngo ngaphulikanga pafupi.

Pa 2 April 2022, pa nyengu yo mabomba nganandi ngangwamba kuphulika mumsewu, Roman wanozgekanga kuti wakapereki vinthu kwa abali ndi azichi ku Kharkiv. Iyu wangubisama panyumba yinyaki. Pati pajumpha maminisi 30, iyu wanguwona kuti msewu wo watingi wajumphengemu wanangika ndi mabomba.

Volodymyr, yumoza mwa ŵanthu wo ayendesanga galimotu, wangukamba mo vinthu ve nge vakofya. Iyu wangukamba kuti: “Tingupemphera kananandi waka kwaku Yehova kuti watipaski zeru kuti tisankhi vinthu mwazeru.”

Oleksandr ndi muwolu waki Valentyna, aja ku Kharkiv ndi apapi ŵawu akukota. Pa nyengu yo nkhondu yayambanga, yiwu awonanga mabomba ngachiphulika pamtunda wamamita 100 kutuliya pawindu la nyumba yawu. Banja ili lengavi galimotu kuti lithaŵi.

Pavuli paki, abali anguza kuziŵataska. Oleksandr wangukamba kuti: “Tingupemphera kwaku Yehova, kumuwonga chifukwa cha abali wo angutiwovya.”

Vasyl, muwolu waki Natalia ndi ŵana ŵawu atatu angubisama muchipinda chapasi munyumba mwawu kwa mazuŵa nganandiku. Pa 29 February 2022, bomba linguphulika pafupi ndi panyumba yo ajangamu. Nyumba yawu yingunangikiya limu chifukwa cha bomba. Vasyl wakumbuka chiwawa cha kuphulika kwa bomba ndipuso magesi ngachizimwa muchipinda chapasi.

Nkhondu yati yalekaku kamanavi, banja ili linguthaŵiya muchipinda chinyaki chapasi pafupi ndi nyumba yinyaki. Pa 3 March 2022, abali angusaniya banja ili ndipu anguthaŵiya nawu kuchigaŵa chinyaki cho kwengavi nkhondu mucharu chenichi.

Vasyl wakonkhoska mo wanguvwiya banja laki lati lataskika kweniso ŵati afika kuchigaŵa cho kwengavi nkhondu. Iyu wangukamba kuti: “Tingumuwonga ukongwa Yehova. Yaka kenga kakwamba kuti tiryi chakurya mwachimangu kweniso kuleka kufipa mtima ndi mo tingavikiliya ŵana ŵidu, pavuli pakuti takumana ndi vinthu vakufipiska mtima kwa sabata yimoza yo yenga nge masabata nganandi kwaku isi.”

Oleksandr, yumoza mwa abali wo ayendesanga galimotu, wangukamba kuti kuluta kuchitaska abali ndi azichi kungulongo kukoliyana ko kulipu pakati pa ŵanthu aku Yehova. Iyu wangukamba kuti: “Venivi vandiwovya kuziŵa mo Yehova waphwere ŵanthu ŵaki. Ndikondwa asani ndiwona abali ndi azichi ŵangu alongo mtima wakuwonga.”

Titiŵawonga ukongwa abali ŵidu achiganga ndipuso tipempha Yehova kuti watumbiki mtima wawu wakujipereka wenuwu.—Aroma 12:10.