Pa 24 February 2022, charu cha Russia chingwamba kuchita nkhondu ndi charu cha Ukraine. Ku Ukraine, kwe Akaboni aku Yehova akujumpha 129,000, limoza ndi ŵana ŵaŵu. Ofesi ya nthambi yingujalikiska ma Komiti Ngakovya Asani Kwachitika Ngozi (DRC) ngakukwana 27 kuti ngawovyengi abali ndi azichi wo akhumbika chovyu. Kweniso abali ndi azichi alongo kuti atanjana, chifukwa atesesa kuwovyana ndipuso kupembuzgana, ndipu achitiya so venivi ŵanthu wo Mbakaboni cha.

Chinanga kuti abali ndi azichi anandi alutirizga kuja mucharu chawu, anyaki akusankha kuthaŵiya muvyaru vinyaki. Ŵanthu wo athaŵanga anguma mu mizeri yitaliyitali ukongwa, mwakuti mizeri yinyaki yenga yitali makilomita 30, ndipu anyaki angulindizga mazuŵa ngatatu penipo anyaki mazuŵa nganayi kuti ajumphi pa boda. Abali wo aja kufupi ndi maboda ngenanga angufufuza Akhristu anyawu wo ŵenga pa muzeri ndipu anguŵapaska chakurya, maji kweniso vinthu vinyaki. Pakumaliya, abali ndi azichi ŵenaŵa ŵati ajumpha pa boda ndi kusere muvyaru vinyaki, Akaboni anyawu wo ŵenga ndi mapepala ngakulembeka kuti jw.org anguŵatawuzga. Yiwu ŵenga akunozgeka kuŵapembuzga kweniso kuŵawovya.

• Vakupaska chitima kuti pa 1 March 2022, mubali yumoza wambula kuvwa wakufwa ndipu muwolu waki wangupwetekeka ukongwa chifukwa cha mabomba

• Azichi anyaki atatu angupwetekeka

• Apharazgi akujumpha 5,000 akuthaŵa munyumba zawu

• Nyumba ziŵi zikubwangandulika

• Nyumba zitatu zikunangika ukongwa

• Nyumba 35 zikunangika kamanavi

• Nyumba ziŵi zikunangika

• Ko apharazgi anandi ŵenga kwengavi magesi, vakufundisiya munyumba, netiweki kweniso maji

• Akupanga makomiti 27 nga DRC ku Ukraine

• Apharazgi 867 awovyeka ndi makomiti nga DRC kuti asaniyi malu ngakuja ngakuvikilirika

• Abali mu makomiti nga DRC atesesa kupereka vinthu vakukhumbika, nge chakurya ndi maji

Manambala nge muchanya umu ngakoliyana ndi lipoti lakwamba.

Tipemphera kuti abali ndi azichi ŵidu alutirizgi kuja azeru kweniso akuwamu kuti afiski kukunthiyapu vinthu vamabuchibuchi kweniso masuzgu nganyaki po alutirizga kulongo chanju kwa anyawu.—Nthanthi 9:10; 1 Atesalonika 4:9.