Akaboni aku Yehova pafufupi 47,000 akusama dankha munyumba zawu chifukwa cha nkhondu ku Ukraine. Anandi mwa Akaboni ŵenaŵa akuthaŵiya kuvigaŵa vakuvikilirika va mucharu cho, ko abali ndi azichi ŵawu atiŵapaska vakuvwala, chakurya, malu ngakugona ndi vinthu vinyaki vakukhumbiya. Chinanga kuti abali ndi azichi ŵenaŵa akumana ndi masuzgu nga ndalama kweni atijipereka ndi mtima wosi pakovya abali ndi azichi wo akhumbika chovyu.

Mu myezi yiŵi yakwambiriya kutuliya po nkhondu yingwambiya, Olha wa ku Uman ku Ukraine ndi mulumu waki yo ndi Kaboni cha angulondere apharazgi akukwana 300. Anandi mwa abali ndi azichi ŵenaŵa agoniyanga waka usiku umoza ndikulutirizga ulendu wawu. Kanandi Olha amuziŵisanga ndi usiku pakati kuti kutuza ŵanthu, alendu wo ŵepafupi kufika kunyumba kwaki. Zuŵa linyaki, Olha wangulondere abali ndi azichi 22 pa nyengu yimoza. Venivi vawovya mwana waki munthulumi yo we ndi vyaka 18 zina laki Stanislav kuti waje ndi mtima wakupaska. Kanandi iyu wagona pasi kuti abali wo athaŵa nkhondu agoni pabedi kuchipinda chaki.

Olha wangukamba kuti: “Ndikondwa ukongwa kuti ndifiska kovya ŵanthu aku Yehova munyengu yakusuzga yeniyi.”

Mu masabata ngankhondi pe Andriy ndi muwolu waki Liudmyla angulondere Akaboni akukwana 200. Yiwu angulondere so ŵanthu akukwana 18 usiku umoza pe. Andriy wangukamba kuti: “Tingugwiriskiya ntchitu ulongozgi wakutuliya ku ofesi ya nthambi, mwakuti tenga ndi chakurya chinyaki. Kwa sabata ndi hafu tagwiriskiyanga ntchitu chakurya chenichi pakovya abali ndi azichi wo athaŵa nkhondu. Abali asiyanga makadi ngawu nga ndalama kuti tiguliyi chakurya chinyaki kuti chiwovyi alendu anyaki wo azengi. Komiti Yakovya pa Masoka yingupereka so vakurya vinyaki mwakuti tasoŵanga chechosi cha.”

Mu March, Vita wa ku Ivano-Frankivsk wangusama dankha munyumba yaki ndikuluta kwa mubali waki kuti Akaboni wo athaŵa nkhondu afikiyengi munyumba yaki. Vita wangukamba kuti: “Kupereka nyumba yangu yenga sembi cha kweni chenga chanju. Vo ndichitiya abali ŵangu vitindiwovya kuti ndikondwengi. Tosi te banja limoza.”

Natalia waja ndi mulumu waki ndipuso mwana wawu munthukazi Habriela ku Ternopil. Wosi ntchitu yikuŵamaliya nkhondu yati yayamba ŵaka. Yiwu agwiriskiyanga ntchitu ndalama zo angusunga kuti aguliyengi vinthu vakhumbika pa umoyu wawu. Kweni ŵenga akukhumbisiska kulonde mzichi ndi mwana waki munthukazi yo wenga wakupunduka.

Natalia wangukamba kuti: “Ndikumbuka mzichi munyaki waku Africa yo wenga ndi vinthu vimanavi waka vakuliŵavu kweni wangulondere abali ndi azichi akukwana 14 pa unganu wachigaŵa ndipu palivi cho angusoŵa.” Natalia wangukamba so kuti vakuchitika venivi vingumuwovya kuti waŵikengi vakukhumba va ŵanthu anyaki pa malu ngakwamba.

Chinanga kuti abali ndi azichi ŵidu ku Ukraine akumana ndi masuzgu kweni alutirizga kuthemba Yehova po ‘atanja kulonde alendu.’​—Aroma 12:13.