Abali ndi azichi ŵidu ku Ukraine alutirizga kuwovyana. Yiwu alutirizga kulongorana chanju.

Mzichi Olena we ndi vyaka 81. Pa 6 June, bomba linguphulika pafupi ndi nyumba yaki. Bomba lo linguphulika lingunanga nyumba ya aneba ŵawu kweniso linguchitisa chizenji chitali cha mamita 7 kutuwa pasi. Kuphulika kwanthazi kwa bomba lenili kunguchitiska nyumba ya Mzichi Olena kuti yinangiki ukongwa.

Iyu wangukamba kuti: “Pa nyengu yo ndenga mutulu, chimati chinguwiya pafupi ndi mutu wangu. Kunguthibuka chifuvu cha mdima bii. Magilasi ndi vimya venga waka peposi. Ndingumuwonga Yehova chifukwa chakuti ndingutaskika.” Pangujumpha waka maminisi ngamanavi kutuliya po bomba linguphulikiya, mbwenu abali ndi azichi a mumpingu wawu atuza kuzimuona, kusazgapu mubali yo nyumba yaki yingunangika ukongwa. Mzichi Olena wangukamba so kuti: “Abali ŵati afika kunyumba kwangu, anguzizwa ndi mo ndingutaskikiya ndipu ŵengavi chakukamba. Ndinguchiskika ukongwa ndati ndaŵawona. Venga vakukondwesa kuti ŵenga nani pafupi.”

Serhii yo ndi mura mumpingu, walutanga kunyumba ya Mzichi Olena ndi achinyamata a mumpingu wawu. Iyu wangukamba kuti: “Ndati ndavwa kuti bomba laphulika pafupi ndi nyumba ya Mzichi Olena, ndinguchita mantha kweniso ndingufipa mtima. Ndinguvwa umampha ndati ndawona kuti wapwetekeka ukongwa cha kweni walimukalimuka waka. Chakukondwesa ntchakuti chinthu chakwamba cho Mzichi Olena wakhumbanga nyumba yaki yati yanangika, lenga Bayibolu lo wangulonde pati pajumpha ŵaka mazuŵa ngamanavi.”

Vakukondwesa kuti abali ŵaki angumusaniriya nyumba. Abali ndi azichi mu mpingu alutirizga kumuwovya ndipuso ŵara amumbiyanga foni zuŵa lelosi Mzichi Olena. Abali ndi azichi atesesa kusaniya nthowa zo zitimuwovya kuti wayanduwengi ndi maunganu nga mpingu. Iyu wangukamba kuti: “Nyengu zinyaki nditijivwa kuti ndilivi nthazi kweni maunganu ngatindipaska nthazi. Kanandi abali ndi azichi atindimbiya foni ndipu ndikondwa ukongwa.”

Banja linyaki lingukonkhoska vo vinguŵachitikiya pa nyengu yo ajanga mu Nyumba ya Ufumu limoza ndi apharazgi anyaki 200. Munthukazi wangulemba kuti: “Ndinguchiskika ndi chovyu cho ŵara aperekanga. Yiwu angundikumbusa chakuwoniyapu chaku Davidi yo watingi wafwengi pa nyengu yo walimbananga ndi nkharamu kweniso chinyama cha biyeri kuti wataski mbereri zaki. Ŵara wo ajanga mu Nyumba ya Ufumu aŵikanga umoyu wawu pangozi kuti asaniyi chakurya, maji ndi mafuta nga galimotu. Tiwonga vo abali achitanga chifukwa vatiwovyanga kuti tichitengi maunganu nga mpingu ndipuso kunozgeke uteŵeti. Chinanga mphanyengu yo mabomba ngaphulikanga ukongwa, nyengu zosi ŵara ŵenaŵa ayesesanga kuchiwona abali ndi azichi wo angulutirizga kuja kunyumba zawu, ndipu aŵapingiyanga chakurya, maji kweniso aŵapembuzganga. Nditiŵatumbika ukongwa ŵara ŵenaŵa. Venivi vechendachitiki, ndaŵawonanga nge asambizi kweniso apharazgi, kweni sonu nditiŵawona kuti mbaliska akuthembeka. Ndiwonga ukongwa chakuwoniyapu chawu chamampha pankhani yakulongo chiganga, kuphwere abali ndipuso kuthembeka!”

Apharazgi a mumpingu unyaki ku Ukraine angulembe kalata ofesi ya nthambi ya ku Ukraine vakukwaskana ndi abali wo alongozga pa ntchitu yakovya pa masoka, yiwu angukamba kuti: “Mitima yidu njakuzaza ndi likondwa. Tizizwa ndi mo Yehova watitiphwere kuziya mwa abali ndi azichi. Tajiwone tija kufiskika kwa mazu ngo Yesu wangukamba ngakuti: ‘Pa chifukwa chenichi, ŵanthu wosi azamuziŵa kuti ndimwi akusambira ŵangu, asani mwaŵeni mutanjana.’”—Yohane 13:35.

Kufika pa 21 June 2022, ndipu talondiyapu kali malipoti ngo nge mumphata umu nga vinthu vo vinguchitika ku Ukraine. Venivi ndi viŵerengeru vakusimikizika vo abali angupereka. Chinanga kuti veviyo, chiŵerengeru chayichu chitenere kuti ntchakukwera chifukwa pasonu panu mphakusuzga kukambiskana ndi abali a muvigaŵa vosi va mucharu ichi.

• Apharazgi 42 akufwa

• Apharazgi 83 akupwetekeka

• Apharazgi 31,185 akusama dankha munyumba zawu

• Nyumba 495 zikunangikiya limu

• Nyumba 557 zikunangika ukongwa

• Nyumba 1,429 zikunangika kamanavi

• Nyumba za Ufumu zinkhondi zikunangikiya limu

• Nyumba za Ufumu 8 zikunangika ukongwa

• Nyumba za Ufumu 34 zikunangika kamanavi

• Makomiti 27 ngakovya pa masoka (DRC) ngagwira ntchitu ku Ukraine

• Abali ndi azichi 52,348 anguwovyeka ndi makomiti nga DRC kuti athaŵiyi kumalu ngamampha

• Apharazgi 23,433 akuthaŵiya muvyaru vinyaki ndipu awovyeka ndi abali ndi azichi