Te akukondwa kukamba kuti Yehova watumbika ŵanthu ŵaki ku Ukraine chifukwa chakuti abali ndi azichi ŵidu mucharu ichi angufiska kuchita mwambu wakukumbukiya nyifwa yaku Khristu. Abali ndi azichi wo aja mu Nyumba za Ufumu zakupambanapambana kuzambwi kwa Ukraine anguchita mwambu wa Chikumbusu. Abali anguchita mwambu wenuwu mutimagulu timanatimana ndipu angulumikiza abali kuziya pa vidiyokoniferesi wo angufiska cha kuthaŵa munyumba zawu.

Muvigaŵa vinyaki va charu ichi, pa zuŵa la Chikumbusu maalamu ngakutcheŵeska ŵanthu nganguliya zuŵa losi. Po kwafipanga, maalamu yanga nganguleka kuliya. Sherhiy wa ku Druzhkivka muchigaŵa cha Donetsk wangukamba kuti: “Tingupemphera kuti Chikumbusu chileki kutimbanyizgika chifukwa cha kuphulika kwa mabomba. Kwati kwaja waka nyengu yimanavi kuti Chikumbusu chiyambi, mabomba nganguleka kuphulika ndipuso maalamu ngavwikanga so cha.”

Gulu la abali ndi azichi akukota ndipuso apharazgi akutama ku Nemishaeve, kufupi ndi Kyiv, achitanga cha maunganu kwa mwezi. Yiwu apempheranga kuti azisaniriki pa Chikumbusu. Vitaliy, mura mumpingu, wanguwovya abali ndi azichi ŵenaŵa kuti nawu asaniriki pa Chikumbusu. Iyu wangukamba kuti: “Kwengavi magesi ndipu tinguchita Chikumbusu pamalu ngakuzizila mwakugwiriskiya ntchitu tochi. Tengavi sumu, so mwana wangu munthukazi wangutiwovya kumba sumu mwakugwiriskiya ntchitu chitolilu.”

Oleksandr, mura mumpingu ndipu waja muchigaŵa cho kuchitika nkhondu, wangukamba kuti: “Pa nyengu yo tadaniyanga ŵanthu ku Chikumbusu, tingufiska cha kulembe makalata ŵanthu a muchigaŵa cha mpingu widu chifukwa chakuti nyumba zawu zikunangika ndi mabomba ndipu akuzisiya. Mwaviyo, tingudana mabwezi ngidu, ŵanthu wo takumananga nawu ndipuso ŵanthu wo tinguthaŵiya limoza. Ŵanthu wo takumananga nawu ŵenga akuti ŵechendakumanepu ndi Akaboni. Anandi mwaku yiwu angusanirika pa Chikumbusu.”

Chinanga kuti techendalonde viŵerengeru vosi kutuliya mumipingu yosi ya ku Ukraine kweni tiziŵa kuti ŵanthu akujumpha 210,000 akusanirika pa Chikumbusu.

Pakukamba va mo wanguvwiya wati wasanirika pa Chikumbusu, yumoza wa abali ŵidu a ku Ukraine, wangukamba kuti: “Nge mo kanyumba kakuthopoka ko ke ndi gesi pachanya katovye wakwendesa sitima ya pamaji kuziŵa kuti we pafupi kufika kumtunda, Chikumbusu nachu chitindisimikiziya kuti zuŵa laku Yehova lizengi pambula kuswera yapa. Chikumbusu cha chaka chinu chandiwovya kuti ndije ndi chivwanu chakukho.”

Kufika pa 21 April 2022, ndipu talondiyapu kali malipoti ngo nge mumphata umu nga vinthu vo vinguchitika ku Ukraine. Venivi ndi viŵerengeru vakusimikizika vo abali angupereka. Chinanga kuti veviyo, chiwerengeru chayichu chitenere kuti ntchakukwera chifukwa pasonu panu mphakusuzga kukambiskana ndi abali a muvigaŵa vosi va mucharu ichi.

• Apharazgi 35 akufwa

• Apharazgi 60 akupwetekeka

• Apharazgi 43,792 akuthaŵiya muvigaŵa vinyaki mucharu chenichi kuti avikiliriki

• Nyumba 374 zikunangikiya limu

• Nyumba 347 zikunangika ukongwa

• Nyumba 874 zikunangika kamanavi

• Nyumba ya Ufumu yimoza yikunangikiya limu

• Nyumba za Ufumu 10 zikunangika ukongwa

• Nyumba za Ufumu 27 zikunangika kamanavi

• Makomiti 27 ngakovya pa masoka (DRC) ngagwira ntchitu ku Ukraine

• Apharazgi 44,971 anguwovyeka ndi makomiti nga DRC kuti athaŵiyi kumalu ngakuvikilirika

• Apharazgi 19,961 akuthaŵiya muvyaru vinyaki ndipu atovyeka ndi abali ndi azichi