Tilutirizga kuŵapemphere mwakutuliya pasi pamtima abali ndi azichi ŵidu ku Mariupol, po ŵanthu ŵeche kulimbana ndipuso mabomba ngechekulutiriya kuphulika mumsewu. Vachitima kuti abali ndi azichi ŵidu 6 akufwa po mabomba nganguphulika. Abali ndi azichi 10 wosi pamoza akufwa ku Ukraine. Kweniso nkhani zinandi zingukamba kuti sabata yamala mabomba nganguphulika muchinyumba chakupangiyamu maseŵeru cho ŵanthu akujumpha 1,000 angubisamamu. Palivi mubali pamwenga mzichi widu yo wakufwa, kweni ŵanthu amanavi ndiwu angupwetekeka kamanavi.

Abali ŵidu pafufupi 750 angutuwaku ku Mariupol, kweni anyaki pafufupi 1,600 anguja kweniko. Anandi mwaku yiwu aja kuvuma kwa tawuni yeniyi ndipu charu cha Russia ndichu chitiŵalamuliya.

Nge po lipoti lajumpha lingukambiya, abali ndi azichi pafufupi 200 aja mu Nyumba ya Ufumu ndipuso Kumalu Ngakuchitiyaku Unganu. Pa nyengu yo abali angufiska kulongoro mwakudumuwa, yiwu angukamba mazu yanga:

“Pa nyengu yo mabomba ngaphulikanga, abali ndi azichi amanavi anguchita mantha ukongwa. Anyaki angwamba kuliya. Tati tavwa kuphulika kwa bomba, taŵanaŵananga kuti tifwengi chifukwa cha bomba pamwenga motu. Mura munyaki wanguŵanaŵana kuti timbi sumu za Ufumu. Tingumba sumu 10 mpaka 15 mwakulondozgana. Po chiwawa cha kuphulika kwa mabomba chakweriyangakweriyanga, chinyumba cho isi tengamu nachu chingwamba kusukunyika ndipu isi nasi tambanga mwakukweza. Pavuli paki tinguŵerenga lemba la Salimo 27 ndipu tingukambiskana lemba lo. Ndipu weyosi wangwamba kukamba malemba nga mu Bayibolu ngo watanja ndipuso wakonkhoskanga mo lemba lo lititiwovye kuja akukho. . . . Tinguwona kuti Yehova ‘Mbada alisungu likulu kweniso ndi Chiuta wakupembuzga ukongwa,’ yo wangatipembuzga mu nyengu zakusuzga ukongwa.”—2 Akorinto 1:3, 4.

Ŵara wo atijipereka ndi mtima wosi ndipuso abali a mu Komiti Yakovya pa Masoka mucharu cho afufuza abali ndi azichi kweniso atiŵapaska chakurya ndipuso munkhwala asani akhumba chovyu cha munkhwala ndipu aŵika umoyu wawu pangozi. Nyengu zinyaki, abali yaŵa atenda mwakukwaŵa pasi kuti ajivikiliyi kuti aleki kulasika ndi futi po afufuza mutawuni yo. Titiŵanyadiya ukongwa abali ŵidu wo ‘aŵika umoyu wawu pa ngozi’ chifukwa cha abali ŵawu.—Aroma 16:4.

Chifukwa chakuti mucharu chosi mulivi gas kweniso magesi, azichi achiganga abika chakurya pabwalu. Pavuli paki, chakurya cho atichipereka ku ŵanthu akukota kweniso apharazgi akupunduka. Chinanga kuti nyumba, magalimotu kweniso vinthu va anyawu anandi vikunangika, kweni awonga chanju cho abali ndi azichi ŵawu atiŵalongo kweniso mo atiŵaphwere.

Wo ŵe mumalu ngakubisamamu alutirizga kusopa Yehova nyengu zosi mwa kusambira limoza Bayibolu kweniso kupharazgiya ŵanthu anyaki uthenga wa mu Bayibolu.

Kufika pa 22 March 2022, ndipu talondiyapu kali malipoti ngo nge mumphata umu nga vinthu vo vinguchitika ku Ukraine. Venivi ndi viŵerengeru vakusimikizika vo abali angupereka. Chinanga kuti veviyo, chiwerengeru chiyichu chitenere kuti ntchakukwera chifukwa pasonu panu mphakusuzga kukambiskana ndi abali a muvigaŵa vosi va mucharu ichi.

• Apharazgi 10 akufwa

• Apharazgi 27 akupwetekeka

• Apharazgi 33,180 akuthaŵiya muvigaŵa vinyaki mucharu chenichi kuti avikiliriki

• Nyumba 78 zikunangikiya limu

• Nyumba 102 zikunangika ukongwa

• Nyumba 484 zikunangika kamanavi

• Nyumba ya Ufumu yimoza yikunangikiya limu

• Nyumba za Ufumu zinayi zikunangika ukongwa

• Nyumba za Ufumu 18 zikunangika kamanavi

• Makomiti 27 ngakovya pa masoka (DRC) ngagwira ntchitu ku Ukraine

• Apharazgi 25,069 anguwovyeka ndi makomiti nga DRC kuti asaniyi malu ngakuvikilirika ngakuti ajeku

• Apharazgi 14,308 akuthaŵiya muvyaru vinyaki ndipu atovyeka ndi abali ndi azichi