Te ndi chitima kuti azichi ŵidu ŵaŵi akutayika pa nyengu yo mabomba nganguphulika mutawuni ya Mariupol. Pasonu, mutawuni iyi mweche abali ndi azichi ŵidu akujumpha 2,000 wo angafiska cha kuthaŵa chifukwa cha nkhondu yikulu yo yiliku. Kwa mazuŵa ngamanavi ngo ngajumpha, Akaboni pafufupi 150 angufiska kuthaŵa mutawuni iyi. Abali wo agwira limoza ntchitu ndi Komiti Yakovya pa Masoka (DRC) anguyesesa kuti aluti ndi chovyu ku Mariupol kweni angufiska cha chifukwa chakuti yiwu limoza ndi magalimotu nganyaki ngo ngangupinga vinthu vakuwovye ŵanthu, anguŵakaniza kusere mucharu cho. Bomba linguphulika pamalu po penga Nyumba ya Ufumu ndipuso pa Malu nga Unganu. Pa nyengu iyi, abali ndi azichi ŵidu pafufupi 200 ajanga pa Nyumba ya Ufumu yeniyi. Abali angupwetekeka cha kweni magalimotu ngawu ngangunangikiya limu. Venivi vinguchitiska kuti kuŵi kwakusuzga kuti athaŵi mutawuni yeniyi.

Mura (yo we pachithuzi mumphata umu) yo wangufiska kuthaŵa limoza ndi banja laki ku Mariupol wangukamba kuti: “Tinguleka nyumba yidu, ntchitu zidu ndipuso takambiskananga cha ndi mabwezi ngidu. Ulendu widu wo watingi utongi zuŵa limoza kuti tikafika, unguto mazuŵa 6. Pa nyengu yo tathaŵanga mutawuni yeniyi, tawonanga josi lo latuwanga mu mabomba ngambula kuphulika ngo ngenga mumsewu. Pa ulendu widu, abali ŵidu angutiwovya kuti tisaniyi chakurya kweniso malu ngakuti tijemu ndi usiku. Yapa tinguwona kuti Ada ŵidu a Yehova, atiphweriyanga ukongwa . . . Venivi vingutiwovya kuti timuthembengi ukongwa Yehova.”

Akaboni wo athaŵa nkhondu ku Ukraine aluta muvyaru vakupambanapambana va ku Europe kuti avikiliriki. Mwakuyeruzgiyapu, mteŵeti wakovya, muwolu waki ndi ŵana ŵawu atatu, a vyaka 7, 11 ndi 16, anguluta ku Portugal ko kwe abali ŵawu wo Mbakaboni aku Yehova. Banja ili lingulindiza pa boda kwa maora 11 kuti lijumphi ndipu lingwenda ulendu wa makilomita ngakujumpha 4,000 kwa mazuŵa nganayi kuti akafiki kunyumba ya azibali ŵawu. Yiwu angufika kwati kwaja kamanavi kuti maunganu nga mpingu ngayambi. Chinanga kuti banja ili litichiziŵa cha Chiphwitikizi, kweni lilutirizga mbwenu kusopa Yehova nyengu zosi ndipuso kusanirika pa maunganu. Mpingu unguchiskika ukongwa chifukwa cha likondwa lo banja lenili lenga nalu chinanga kuti lingukumana ndi masuzgu.

Mzichi munyaki yo wanguluta ku Germany ndi banja laki wangukamba kuti: “Kuŵerenga Bayibolu, kuŵanaŵaniya vinthu vamampha vo vatichitikiya pa umoyu widu kweniso kuŵanaŵaniya chilindizga chamampha cho tosi tenachu kutitipaska nthazi kweniso kutichiska. . . . Tajiwone tija mo Yehova watitilongozge kweniso mo watitiwovye kuziya mwa abali ŵidu. Yiwu atitilondere umampha kweniso angutiwovya ukongwa ku Ukraine, Hungary ndipuso alutirizga kutiwovya po te kunu ku Germany!”

Viwoneke limu kuti Yehova watiŵawovya ukongwa abali ndi azichi ŵidu wosi ku Ukraine.—Salimo 145:14.

Kufika pa 16 March 2022 ndipu talondiyapu kali malipoti ngo nge mumphata umu nga vinthu vo vinguchitika ku Ukraine. Venivi ndi viŵerengeru vakusimikizika vo abali angupereka. Chinanga kuti veviyo, chiwerengeru chiyichu chitenere kuti ntchakukwera chifukwa pasonu panu mphakusuzga kukambiskana ndi abali a muvigaŵa vosi va mucharu ichi:

• Apharazgi anayi akufwa

• Apharazgi 19 akupwetekeka

• Apharazgi 29,789 akuthaŵiya muvigaŵa vinyaki mucharu chenichi kuti avikiliriki

• Nyumba 45 zikunangikiya limu

• Nyumba 84 zikunangika ukongwa

• Nyumba 366 zikunangika kamanavi

• Nyumba za Ufumu 16 zikunangika

• Makomiti 27 ngakovya pa masoka (DRC) ngagwira ntchitu ku Ukraine

• Apharazgi 20,981 anguwovyeka ndi makomiti nga DRC kuti asamiyi ku malu ngamampha

• Apharazgi 11,973 akusamiya muvyaru vinyaki ndipu awovyeka ndi abali ndi azichi