Abali ndi azichi ŵidu mutawuni ya Mariupol, Kharkiv, Hostomel ndi kumalu nganyaki akumana ndi masuzgu ngakulu ukongwa chifukwa cha maboma ku Ukraine. Anyaki angumala pafufupi sabata ŵechendasami kumalu ko ajanga. Abali ndi azichi atondeka kuti asaniyi chakurya chakukwana ndipuso atondeka kuti akambiskanengi pa mafoni chifukwa chakusuzga kwa magesi kweniso manetiweki.

Vachitima kuti Mubali Dmytro Rozdorskyi, wa vyaka 28 yo wenga mura mumpingu wa Myrnohrad, wakufwa chifukwa chakukanda bomba lo linguwundikiya pasi. Tipemphere abali ndi azichi ŵidu wo abali ŵawu akutayika ndipuso abali wo ŵe muvigaŵa vo mabomba ngaphulika ukongwa.—2 Atesalonika 3:1.

Kufika pa 7 March 2022 ndipu talondiyapu kali malipoti ngo nge mumphata umu nga vinthu vo vinguchitika ku Ukraine:

• Apharazgi ŵaŵi akutayika

• Apharazgi 8 akupwetekeka

• Apharazgi 20,617 akuthaŵiya muvigaŵa vinyaki mucharu chenichi kuti avikiliriki

• Nyumba 25 zikunangikiya limu

• Nyumba 29 zikunangika ukongwa

• Nyumba 173 zikunangika kamanavi

• Nyumba za Ufumu zinkhondi zikunangika

• Makomiti 27 ngakovya pa masoka (DRC) ngagwira ntchitu ku Ukraine

• Apharazgi 6,548 anguwovyeka ndi makomiti nga DRC kuti asaniyi malu ngakuvikilirika

• Apharazgi 7,008 akuthaŵiya muvyaru vinyaki ndipu atovyeka ndi abali ndi azichi

• Malu ngamoza ngakuchitiyaku unganu ndipuso Nyumba za Ufumu pafufupi 30 zo ze kuzambwi kwa Ukraine, muvigaŵa nge Chernevtsi, Ivano-Frankivsk, Lviv ndi muvigaŵa va ku Transcarpathian nganozgeka kuti ngaje malu ngakufikiyaku ŵanthu wo athaŵa nkhondu