Kufika mu January 2024 ndikuti pajumpha vyaka 100 kutuliya po Chigongwi cha Mlinda chakwamba chingutuzgikiya mu Chiyukireni. Uthenga wamampha ungufika kakwamba ku Ukraine mu 1891, ndipu ŵanthu anandi anguvwisiya uthenga wa mu Bayibolu. Pati pajumpha vyaka vinandiku, ŵanthu anandi wo alongoro Chiyukireni angwamba kwanja uneneska wa mu Bayibolu. Kweni chifukwa chakusintha kwa ndali mucharu cha Ukraine, cha mu ma 1900 ŵanthu anandi wo alongoro Chiyukireni angusamiya muvyaru vinyaki, ukongwa ku Canada ndi ku United States.

Mubali J. F. Rutherford wati waluta ku Canada mu 1923, wangupempha Mubali Emil Zarysky, yo apapi ŵaki angutuwa ku Ukraine kuti wawovyi kufwatuliya Chigongwi cha Mlinda mu Chiyukireni. Pa nyengu iyi ndipu Mubali Emil wayamba waka ukopotala (upayiniya) kweniso wenga wakuwonere dera. Kusazgiyapu yapa, iyu ndi muwolu waki Mariya, ŵenga ndi ŵana ankhondi. Kweni iyu wanguzomera Mubali Rutherford wati wamupempha, ndipu Chigongwi cha Mlinda chakwamba cha Chiyukireni chingutuzgika mu January 1924. Emil wangulutirizga kugwira ntchitu yakufwatuliya mwakugomezgeka kwa vyaka 40. Mwana waki Rose wangukamba kuti: “Cho ndikumbuka ukongwa ntchiwawa cho chavwikanga munyumba asani Ada alemba mwakugwiriskiya ntchitu tayipilayita.”

Mu 1964, Emil wangusambiza Mubali Maurice Saranchuk ndi muwolu waki Anne kuti afwatuliyengi Chigongwi cha Mlinda mu Chiyukireni. Mubali Saranchuk ndi muwolu waki agwiranga mwaphamphu ntchitu yakufwatuliya ndipu nyengu zinyaki afwatuliyanga mugalimotu pa nyengu yakupumuwa asani ŵe kuntchitu. Pati pajumpha nyengu angunozga vakuti banja lenili ligwiriskiyengi ntchitu Nyumba ya Ufumu nge ofesi yakufwatuliyaku mabuku. Mu 1977, Mubali Saranchuk muwolu waki angudanika kuti akateŵetiyengi ku Ofesi ya Nthambi ku Canada. Pavuli paki abali wo ateŵetiyanga pa ofesi ya nthambi wo alongoronga Chiyukireni angusambizika kuti afwatuliyengi umampha Chigongwi cha Mlinda ndipuso mabuku nganyaki ngakukonkhoska Bayibolu.

Ntchitu ya Akaboni aku Yehova yingukanizika mu ulamuliru wa Soviet Union chakukumaliya kwa mu ma 1940 ndipu vinthu venga viyo kwa vyaka vinandi. Pa nyengu yeniyi, abali angusaniya nthowa zasonu kuti alondiyengi Chigongwi cha Mlinda ndi mabuku nganyaki mu Chiyukireni. Abali a muvyaru vo venga pasi pa ulamuliru wa Soviet Union asani alonde mabuku angapurintanga so ndi kugaŵiya abali ndi azichi kuti asaniyengi chakurya chauzimu. Ulamuliru wa Soviet Union wati wamala mu 1991, abali ndi azichi ŵidu ku Ukraine angwamba kusopa Yehova mwakufwatuka. Pati pajumpha waka kanyengu kamanavi, kagulu ka abali ndi azichi kangwamba kufwatuliya mabuku ngidu mu Chiyukireni pa ofesi ya nthambi ku Germany. Pavuli paki, kagulu kenaka kangusamiya ku Poland ndipu pati pajumpha nyengu angusamiya ku ofesi ya nthambi yasonu ya Ukraine mu 2001. Mzichi munyaki yo wawovyaku ntchitu yakufwatuliya mabuku ngidu mu Chiyukireni kwa vyaka 30 wangukamba kuti: “Abali ndi azichi wo angwamba kugwira ntchitu yakufwatuliya, kukopa kweniso kugaŵa Chigongwi cha Mlinda mu nyengu zenizi akuwovya ukongwa kuti gulu laku Yehova likuwi kufika po lili mazuŵa nganu. Asani ndichita uteŵeti wangu ndiŵanaŵaniya phamphu lo ŵanthu ŵenaŵa angulongo ndipu venivi vitindichiska kuti nani ndilutirizgi kuteŵete Yehova mwaphamphu.”

Mazuŵa nganu, ŵanthu mamiliyoni nganandi wo alongoro Chiyukireni ayanduwa ukongwa ndi Chigongwi cha Mlinda mu chineneru chawu. Pasonu panu ku Ukraine kwe timagulu 67 ta ŵanthu wo alongoro Chiyukireni ndipuso mipingu 541. Ku Austria, Belgium, Britain, Canada, Croatia, Czech Republic, France, Germany, Ireland, Italy, Poland, Slovakia, Spain, Sweden, ndipuso ku United States naku kwe timagulu ndi mipingu ya ŵanthu wo alongoro Chiyukireni.

Titimuwonga ukongwa Yehova chifukwa wakutipaska Chigongwi cha Mlinda mu Chiyukireni kuti wawovyi ŵanthu anandi ‘kumugomezga.’—Salimo 78:7.