Ndi Chovyu chaku Yehova, Mzichi Liudmyla Mozul ndi Kateryna Rozdorska afiska kukunthiyapu vinthu vakupweteka kweniso vakupaska chitima vo vachitika chifukwa cha nkhondu. Alumu ŵawu, Petro Mozul ndi Dmytro Rozdorskyi, ŵenga amoza mwa Akaboni aku Yehova wo angwamba kufwa chifukwa cha nkhondu ku Ukraine. Vachitima kuti kufika sonu, abali ndi azichi ŵidu 34 akufwa chifukwa cha nkhondu.

Petro ndi Liudmyla angubatizika mu 1994. Banja ili linguja munthengwa kwa vyaka 43.

Liudmyla wangukamba kuti: “Zuŵa lelosi abali ndi azichi ŵangu atindikambiya mazu ngakuchiska. Yiwu alutirizga kundimbiya mafoni. Ndinguliya ndati ndaŵerenga kalata yo yingutuwa ku ofesi ya nthambi ku Ukraine. Kalata iyi yenga ndi mazu ngakupembuzga ukongwa.”

Nkhondu yingwamba pa 24 February 2022. Petro yo wateŵetiyanga nge mteŵeti wakovya mumpingu wa chineneru chamanja, wangubayika pa nyengu yo iyu ndi banja laki athaŵanga mabomba ngo ngaphulikanga ku Kharkiv pa 1 March 2022.

Mabomba ngati ngaphulika kwa mazuŵa nganandiku, pa zuŵa lenili ndegi za nkhondu zayendangayendanga muchanya ndipu nkhondu yingwamba mutawuni yeniyi. Banja ili lingupakira vinthu vinyaki vimanavi ndipu lingusama pati pajumpha waka maminisi 30. Petro ndi Liudmyla ŵenga mugalimotu yimoza. Mwana wawu munthulumi Oleksii ndi muwolu waki Maryna, ŵenga mugalimotu yinyaki. Liudmyla wangukamba kuti: “Po tayendanga mumsewu ndegi za nkhondu zingwamba kutiphulisiya mabomba. Galimotu yingwamba kundengandenga chifukwa cha kuphulika kwa mabomba.”

Petro yo wenga ndi vyaka 67 wangupetukiya kumalu nganyaki kuti waleki kuganyana ndi galimotu yaku Oleksii, kweni wangupwetekeka ukongwa. Iyu ndi Liudmyla anguŵatole kuchipatala ndipu pavuli paki Petro wangufwa. Visulu vo vingutuwa mubomba ndivu vingumupweteka Liudmyla palundi ndi palufu. Oleksii ndi Maryna angupwetekeka cha. Pati pajumpha mazuŵa ngatatu Liudmyla wati watuwa muchipatala ndipu wanguziŵiya kuti mulumu waki Petro wakufwa.

Liudmyla wangukamba kuti: “Kuŵanaŵaniya ukongwa lisungu laku Yehova ndipuso chilatu chaki chamampha, kutindiwovya kuti ndije ndi chimangu chamumtima. Ndisimikiza kuti mucharu chifya ndazakumuwona so mulumu wangu ndipu ndilindizga mwalinweka nyengu yakukondwesa yeniyi.”

Dmytro ndi Kateryna aja munthengwa kwa vyaka 8. We kuntchitu kwaki, Dmytro wangukambiya muwolu waki mazu ngakumaliya kuti: “Ndifikengi kunyumba pambula kuswera.”

Pati pajumpha maora ngamanavi, pa 8 March 2022, munthu yo wagwiranga ntchitu ndi mulumu waku Kateryna wangumumbiya foni Kateryna ndikumukambiya kuti Dmytro wakanda pamalu po anguwundiyapu bomba ndipu aluta nayu kuchipatala. Iyu wangufwa pati pajumpha maora ngankhondi ŵati amupanga opareshoni.

Kateryna wati waziŵa kuti Dmytro wafwa, iyu wangukamba kuti: “Usiku weniwo, ndinguwona kuti Yehova wandiko janja langu ndipuso wandinyamuwa pamapewa ngaki. Ndinguwona kuti Yehova we nani pafupi ukongwa.”

Dmytro, yo wenga ndi vyaka 28, wangubatizika mu 2006 ndipu wateŵetiyanga nge mura mumpingu, muchigaŵa cha Donetsk ku Ukraine.

Mwambu wamaliru ngaku Dmytro wati wamala waka, Kateryna wangwenda ulendu kwa maora 12 kuluta kuchigaŵa chinyaki chakuvikilirika ku Ukraine. Iyu wangukamba kuti: “Abali ndi azichi wosi ku Ukraine ndipuso muvyaru vinyaki atindichiska. Yiwu atindichitiska kuti ndijivwengi kuti nditanjika ukongwa. Venivi vandiwovya kuti ndileki kuchita chitima ukongwa.”

Iyu wangukamba so kuti: “Ndipembuzgika asani ndipharazga. . . . Asani vandisuzga kukunthiyapu, ndikumbuka mazu nga mu Bayibolu ngo nge pa Afilipi 4:6, 7.”

Tigomezga kuti Yehova walutirizgengi kuŵapembuzga kweniso kuŵapaska nthazi abali ndi azichi ŵidu wo akwanjiwa ŵawu akutayika chifukwa cha nkhondu ku Ukraine.—Salimo 61:1-3.