Pa 9 October 2022, Mubali Paul Norton wa mu Komiti ya Nthambi ya ku Britain, wangutuzga Bayibolu la Uthenga Wamampha Waku Mateyu muchineneru cha Chipunjabi (Shahmukhi) pa unganu wo unguchitika pamasu ndi pamasu. Ŵanthu akujumpha 1,300 angusanirika pa unganu uwu kusazgiyapu apharazgi anyaki wo angulumikiza ku mwambu uwu wo anguwungana mu Nyumba za Ufumu muchigaŵa chosi cha nthambi ya Britain. Buku la mu Bayibolu lenili lingwamba kusanirika nyengu yeniyo pa Intaneti, lakuchita kupulinta kweniso lakuchita kuvwisiya.

Chineneru cha Chipunjabi chikambika ndi ŵanthu mamiliyoni nganandi ku India ndi ku Pakistan, kweniso muvyaru vinyaki. Bayibolu la Charu Chifya la Malemba Ngakupaturika la Chipunjabi lo likulembeka mu vilembu va Gurmukhi lingutuzgika mu October 2020. Mwaviyo, buku lasonu lenili ligwiriskikiyengi ntchitu ndi ŵanthu wo akuziŵa kuŵerenga Chipunjabi cho chilembeka mu vilembu va Shahmukhi, kweniso wo aziŵa cha kuŵerenga vilembu va Gurmukhi pamwenga wo aleka kuviziŵa umampha vilembu ivi. Pasonu panu, ŵanthu wo aŵerenga Chipunjabi (Shahmukhi) alutirizgengi kuthemba Mabayibolu nga vineneru vinyaki, nge chineneru cha Chiurdu.

Kwa vyaka vinandi, mabuku nganyaki nga mu Bayibolu nga Chipunjabi (Shahmukhi) ngaja ngachisindikizika. Kweni buku lenili la Mateyu ndambula kusuzga kuŵerenga kweniso kuvwa. Chakukhumbika ukongwa ntchakuti musanirika zina laku Yehova.

Yumoza wa ŵanthu wo angufwatuliyaku wangukamba kuti: “Ŵanthu atenere kuti avwanga zina laku Yehova kuziya mu sumu za kutchalitchi. Kweni chifukwa chakuti ŵanthu wo afwatuliyanga Bayibolu akutuzgamu zina laku Chiuta mumavesi nganandi, vichitiska kuti ŵanthu awonengi kuti angafiska cha kundere kufupi ndi Chiuta. Kweni sonu asaniyengi zina laku Chiuta mu buku lenili la mu Bayibolu pa malu ngo likhumbika kusanirika.”

Tigomezga kuti kutuzgika kwa buku lenili kuwovyengi abali ndi azichi kuti alutirizgi kundere kufupi ndi Yehova ndipuso kuthamika zina laki.—Mateyu 6:9.