Helen Budge, yo njumoza wa Akaboni aku Yehova ku Edinburgh ku Scotland, ngwachibulumutiya. Nge mo viliri ndi Akaboni aku Yehova wosi, mulili wa COVID-19 wachitiska kuti Helen waleki kupharazgiya ŵanthu masu ndi masu. Kweni venivi vamutondekeska cha kuchita vo wangafiska pakudaniya ŵanthu ku mwambu wapade Wakukumbukiya nyifwa yaku Yesu.

Kuti Helen wagwireku ntchitu yakupharazga yeniyi, chakwamba walemba dankha kalata yakuyeruzgiya mwakugwiriskiya ntchitu chipangizu chakulembe manosi nga ŵanthu ambula kuwona. Iyu wangukamba kuti: “Kwaku ini venge pepala ndi pensulu.” Pavuli paki, wato vo walemba ndikupasa mwana wa mubali waki, yo pavuli paki watilemba kuja kalata yamamphamampha.

Chifukwa chakuti anyina kweniso ambuyaki anthukazi aku Helen ŵenga Akaboni aku Yehova, nyengu zosi wawona kuti Mwambu wa Chikumbusu ngwakukhumbika ukongwa pa umoyu waki. Helen wangukamba kuti nyengu zosi walindizga kuzidaniya so ŵanthu anyaki ku chakuchitika chapade chenichi. Iyu wangukamba kuti: “Chikumbusu cha chaka chinu chiŵengi cha chanambala 70 kwaku ini. Ndikondwa ukongwa kulonde kapepala kakudaniya ŵanthu ku Mwambu wa Chikumbusu mu vilembu va ŵanthu ambula kuwona. Nditikaŵerenga umamphaumampha kuti ndikavwisi. Pavuli paki nditamba kuŵanaŵaniya ŵanthu wo ndikhumba kuŵadana.”

Chinanga kuti vinthu vingasuzga wuli, kweni chifukwa cha chanju, Akhristu akugomezgeka pacharu chosi agwiraku ntchitu yakudaniya anyawu ku Mwambu Wakukumbukiya nyifwa yaku Khristu wo uchitikengi pa Chisulu, 27 March.—Luka 22:19.