Pa 25 September 2021, Buku la mu Bayibolu la Uthenga Wamampha wo Ukulembeka ndi Mateyu lakuŵerenge pa vipangizu va mazuŵa nganu, likutuzgika mu Chihimongi. Mubali Geoffrey Jackson, wa mu Wupu Wakulongozga, ndiyu wangutuzga buku la mu Bayibolu pa unganu wapade wo unguchita kujambulika ndipu ŵanthu akujumpha 2,500, anguwonere pacharu chosi.

Buku lenili la mu Bayibolu la Charu Chifya la Malemba Ngakupaturika ndakwamba kutuzgika mu Chihimongi. Chihimongi chikambika ndi ŵanthu akujumpha 3.9 miliyoni pacharu chosi. * Ŵanthu a Chihimongi agomezga kuti vinthu vo ve muchilengedu ve ndi umoyu ndipu vikhumbika kusopeka. Kweniso agomezga kuti charu chilamulika ndi mizimu yiheni kweniso yamampha yo yingalongozgeka ndi ŵanthu wo ŵe ndi nthazi zapade.

Cha mu ma 1970, ŵanthu anandi a Chihimongi anguthaŵiya ku Thailand. Pavuli paki, anandi mwa ŵanthu ŵenaŵa anguchija kuvyaru va Kuzambwi, ndipu anandi anguluta ku United States.

Mazuŵa nganu, ŵanthu a Chihimongi wo ŵe ku United States aja ku California, Minnesota, ndi ku Wisconsin. AKaboni aku Yehova angwamba kufwatuliya mabuku mu Chihimongi mu 2007. Mu 2012, ofesi yakufwatuliyaku mabuku yikuzengeka ku Sacramento, California.

Akufwatuliya akumaliza buku la Mateyu kwa myezi yitatu. Abali ndi azichi akutuliya mu vyaru vinkhondi vakupambanapambana ndiwu anguŵawovya kuŵerenga buku lenili.

Akufwatuliya angukumana ndi masuzgu pa nyengu yo afwatuliyanga buku lenili. Chihimongi cho chingwamba kulembeka cha mu ma 1950, chilivi marangu nga mo angalembe masipeling’i ndipuso vinthu vinyaki vo vigwiriskikiya ntchitu pakulemba.

Mabayibolu nga chineneru chenichi ngangwamba kusanirika cha mu ma 1980 kweni ŵanthu anandi wo alongoro Chihimongi afiskanga cha kugula Mabayibolu ngenanga chifukwa ngenga ngakudula ukongwa. Mu Mabayibolu ngenanga mwe vinthu vinandi vaboza vo vichitiska kuti ŵanthu aleki kuvwisa uneneska wa mu Malemba. Mwakuyeruzgiyapu, Bayibolu linyaki akutuzgamu zina laku Chiuta lakuti Yehova, ndipu akuŵikamu zina linyaki lo likamba za chiuta yo wazumbulika mu nthanu za Chihimongi.

Yumoza mwa akufwatuliya wangukamba kuti: “Chifukwa chakuti sonu te ndi Bayibolu la Charu Chifya la Chihimongi, ŵanthu a mtima wamampha afiskengi kuŵerenga zina laku Yehova mu Bayibolu lawu ndi kuja nayu pa ubwezi. Venivi ndivu taja tichilindizga ndipuso kupemphere kwa vyaka vosi ivi.”

Akuŵerenga awonga ukongwa kuti ŵe ndi Bayibolu lambula kusuzga kuvwisa ndipuso la uneneska. Wakuŵerenga munyaki wangukamba kuti: “Ndati ndaŵerenga buku la Mateyu, ndinguzizwa ukongwa. Ndingujifumba kuti “Ntchifukwa wuli Bayibolu lenili litindichitiska kuti ndivwengi viyo? Asani ndaliŵerenga waka ndiwona nge kuti nkhani yo yichitika.”

Kutuzgika kwa buku la Mateyu mu Chihimongi kutitikumbuska kuti Chiuta widu wambula sankhu wachitiskengi kuti Mazu ngaki ngafikiyi wosi wo atimupenja.—Machitidu 10:34, 35.