Nyumba yifya ya alendu yizengeka ku ku Likulu la Masambiru nga Akaboni aku Yehova ku Patterson, ku New York, U.S.A. Nyumba yeniyi yijengi yakuyerekana ndipu yizengekengi pamalu ngakukwana mamita 2,787. Ndipu yimalengi chamukatikati mwa chaka cha 2023. Mu nyumba yeniyi, muŵengi malu ngakusungiyamu vinthu vakali ngo ngaŵengi ndi malu ngatatu ngakuŵikapu vithuzi. Kumalu ngenanga zuŵa lelosi tilondiyengi.alendu 1,200. Kusazgiyapu yapa, nyumba zinandi atizinozga so ndipuso aŵikapu vinthu vinyaki. Ntchitu yakunozga kweniso kuzenga ye pafupi kumala.

Abali wo awonere ntchitu yeniyi, angukumana ndi masuzgu nganandi chifukwa cha mulili wa COVID-19. Chifukwa chakuti venga vakusuzga kusaniya vipangizu vakugwiriskiya ntchitu pakuzenga munyengu ya mulili wa COVID-19, ntchitu yakuzenga yinguma dankha. Mwakuyeruzgiyapu, pa nyengu yo tazenganga chigaŵa chakukhumbika ukongwa, venga vakusuzga kusaniya simenti, kweni abali angufiska kusaniya vo vakhumbikanga ndipu konkiriti yinguŵikika pasi pa nyengu yaki. Kweniso chinanga kuti visulu venga vakudula ukongwa, abali ŵidu angufiska kugula visulu vo vakhumbikanga ndipu anguvigula pa mtengu wamamphaku chifukwa chakuti angupereke limu oda.

Pa nyengu yo abali a pa Beteli ŵenga pa lokudawuni, abali akujipereka afiskanga kugwiriya ntchitu kunyumba kwawu kwambula kusweresa ntchitu yakunozga ndi kupanga mapulanu. Kwa kanyengu, venga vakusuzga kukumana ndi arara a mutawuni chifukwa cha ulongozgi wakukwaskana ndi mulili, vo vinguchitiska kuti ntchitu yakuzenga yileki kuluta panthazi. Kweni kugwira ntchitu ndi madipatimenti nga pa Beteli kweniso ŵanthu a muboma, kunguwovya kuti komiti yakuzenga yifiski kusaniya vipangizu mwakugwiriskiya ntchitu abali wo agwiriyanga kunyumba ndipuso kuziya pa vidiyokomferensi.

Gulu lingutuziyaku vinthu vinyaki pa nkhani ya ulongozgi wakuja kwakuwija (kwalantini) ndipu kwa kanyengu venga vakusuzga kudaniyaku ŵanthu anyaki akujipereka kuti azigwiri nasi ntchitu yakuzenga. Venivi vingusazgiyaku masuzgu nganyaki. Kweni cha mu September 2020, tingwamba so kudaniyaku ŵanthu akujipereka kuti azigwiri nasi ntchitu.

Mzichi Jennifer Paul wangudanika kuti wazigwiri nasi ntchitu yakuzenga munyengu ya mulili. Pakukamba va ntchitu yakukwaskana ndi kuzenga iyu wangukamba kuti: “Nditanja ntchitu za jilikiti ngo. Nditanja waka ntchitu pe cha kweni nditanja so ŵanthu. Ndiwona mo gulu laku Yehova lichitiya vinthu kweniso mo Yehova watililongozge.”

Pasonu panu ŵanthu akujipereka akukwana 440 kusazgapu so anyaki pafufupi 350 agwira ntchitu yakuzenga kweniso kunozga malu ngakulondiyapu alendu ku Patterson. Abali ndi azichi alutirizga kuwona mo Yehova watiŵapaskiya vosi vo vikhumbika kuti amalizi kugwira ntchitu yakuzenga.—1 Mbiri 29:16.