Chimoza mwa vinthu vakukhumbika ukongwa mu mbiri yidu mazuŵa nganu chinguchitika vyaka 100 vo vajumpha kwambiya pa 5 mpaka pa 13 September 1922, pa nyengu yo Akaboni aku Yehova anguchita unganu wa mazuŵa 9 ku Cedar Point, Ohio, ku U.S.A. Ŵanthu wo angusanirika pa unganu uwu angutuliya muvigaŵa vinandi va ku United States, Canada, ndipuso ku Europe. Pa avereji, zuŵa lelosi pa unganu uwu pasanirikanga ŵanthu 10,000, ndipu nkhani zakambikanga nyengu yimoza mu vineneru 11.

Malu ngasonu ngakusungiyaku vinthu vakali ngo ngalongo vinthu vo vinguchitika pa unganu wambula kuluwika wenuwu kweniso mo unguwovye kuti ntchitu yakupharazga yiluti panthazi, ngakujulika ku likulu la pacharu chosi la Akaboni aku Yehova. Pasonu panu, wo azomerezeka kuwona malu yanga mbanthu wo ateŵete pa Beteli pe, ndipu ŵanthu anyaki wosi azamuyamba kuwona malu yanga asani ayamba kuluta ku Beteli kuchiwona malu.

Pa 8 September ndipu panguchitika chinthu chakukondwesa ukongwa. Pa zuŵa lenili, ŵanthu pafufupi 8,000 angusere mu holu yo ye pafupi ndi nyanja ya Erie yo njakutowa ukongwa. Yiwu anguza kuti azivwisiyi nkhani ya Mubali Joseph F. Rutherford ya mutu wakuti “Ufumu.”

Wati wakamba nkhani yaki kwa maminisi 90, Mubali Rutherford wangukweza mazu ndipu wangufumba ŵanthu wo amuvwisiyanga asani agomezga kuti Khristu walamuliya. Nyengu yeniyo, chigulu cha ŵanthu chingumuka kuti: “Hinya!”. Pavuli paki, Mubali Rutherford wangukamba kuti: “Mwapaskika ntchitu yakupharazga venivi. Mwaviyo, pharazgani, pharazgani, pharazgani.” Wati wakamba waka mazu ngenanga, chisalu chikulu chingutambasuka, ndipu chenga ndi mazu ngakuti: “Pharazgani Fumu ndi Ufumu.”

Ŵanthu wo ŵenga pa unganu uwu ŵati avwa waka mazu ngenanga, angukhumbisiska kugwira ntchitu yakupharazga. Anandi ndipu ayambapu kali kupharazga, kweni nkhani yo Mubali Rutherford wangukamba yinguŵachiska kuti apharazgengi ukongwa. Yapa ndipu pajumpha nyengu yimanavi kutuliya po ntchitu yakupharazga nyumba ndi nyumba yingwambiya. Mzichi Ethel Bennecoff, yo wenga pafupi kukwanisa vyaka 30, wangukonkhoska kuti Akusambira Bayibolu ŵati avwisiya nkhani yakuchiska yeniyi, “angusazgiyaku phamphu lawu kweniso chanju [chawu] kuluska kali.” Mzichi Odessa Tuck, yo wenga ndi vyaka 18 mu 1922, wangukamba kuti: “Ndakhumbanga kuja nge Yesaya, yo wanguti: ‘Ndini panu! Nditumeni!’”

Pati pajumpha mazuŵa ngaŵi kutuliya po Mubali Rutherford wangukambiya nkhani yaki, abali a mu wupu wa International Bible Students Association angusankha vo weyosi wakhumbikanga kuchita. Yiwu angukamba kuti: “Isi nge gulu la Akhristu wo akusimikiza mtima kuvwiya kweniso kulondo Ambuyafwi ndipuso Mtaski widu Yesu Khristu, tichitengeku cha nkhondu, kuyukiya, kuleka kuvwiya marangu, pamwenga viwawa va mtundu wewosi; ndipu tizomerezengi cha kuti Bayibolu ligwiriskikiyi ntchitu uheni kuti ŵanthu apusisiki. Isi tikhumbisiska kuja mwachimangu.” Vo yiwu angusankha vinguchitiska kuti Akusambira Bayibolu apambanengi ndi visopa vinyaki vo vinguchitaku Nkhondu Yakwamba Yapacharu Chosi, ndipuso vo vatingi vizichitengeku so Nkhondu Yachiŵi Yapacharu Chosi.

Chigongwi cha Mlinda cha June 15, 1922 chingukamba kuti: “Tiyesesengi kuchita vosi vo tingafiska kuti unganu ukulu wa mu 1922 uzije wamampha ukongwa kuluska maunganu ngosi ngo tikuchitapu. . . . Tigomezga kuti vo vazamuchitika pa unganu uwu vazamuja vambula kuluwika ku ŵanthu wosi wo azamusanirikapu.”

Vo angukamba vinguchitika nadi ndipu unganu wenuwu wenga wambula kuluwika. Sonu pajumpha vyaka 100, kweni Yehova weche kutumbika ntchitu yakupharazga Fumu ndi Ufumu waki.—Mateyu 24:14.