Akaboni aku Yehova anandi akondwa kupharazga mwakugwiriskiya ntchitu makalata. Vo muvwengi mumphata umu kutuliya ku United States vilongo kuti kupharazga mwakugwiriskiya ntchitu makalata ndi nthowa yamampha yakukambiya ŵanthu uthenga wakuchiska wa mu Bayibolu.

Mzichi Carlee Ruggles, wa vyaka 13 yo waja ku Blue Ash ku Ohio, wanguwona kuti makalata ngo walemba ngangaŵawovya ukongwa ŵanthu. Iyu wangukamba venivi wati walonde kwamuka kutuwa ku munthu munyaki yo wangulonde kalata yo iyu wangulemba.

Zuŵa linyaki ndi musana, Carlee wenga pabwalu pa nyumba yawu ndipu pa nyengu iyi munthu munyaki yo watendesa muthuthuthu wangupetukiya ku msewu wakuselere kunyumba kwawu. Wati wasika pa muthuthuthu waki wangwamba kudaniriza kuti: “Ndiyani yo wangunditumiziya kalata iyi?” Carlee wanguziŵa kuti kalata yo njimoza mwa makalata ngo wangulemba panyengu yo wapharazganga.

Po apapi aku Carlee alutanga ko iyu wenga kuti akamuwovyi, Carlee wangumuka mwachiganga kuti: “Ndini ada ndingukutumiziyani.”

Iyu ndi apapi ŵaki anguzizwa ukongwa ndi vo munthu uyu wangumuka. Iyu wanguti: “Kalata yinu yingundiwovya ukongwa!” Munthu yo wangukonkhoska mo uthenga wo wenga mukalata yo ungumuchiskiya chifukwa wajivwanga kuti we yija pa nyengu iyi ya mulili. Iyu wangukamba so kuti pambula kuswera yapa mubali waki wakutayika, ndipu fundu zo zenga mukalata yo Carlee wangulemba zingumupembuzga ukongwa po wenga ndi chitima.

Iyu wangumaliza ndi mazu ngakuti: “Mungalekanga cha kulembe ŵanthu makalata. Makalata nginu ngatiŵafika pamtima ŵanthu, kwali angakumukani pamwenga cha.”

Pasonu panu, Carlee ngwakusimikiza mtima kulutirizga kulembe ŵanthu makalata. Iyu wangukamba kuti “Ndingukondwa ukongwa kuwona kuti Yehova wangundigwiriskiya ntchitu kuti ndichiski munthu munyaki. Vo tilemba vingaŵawovya nadi ukongwa ŵanthu.”

Mzichi Myrna Lopez, yo waja muchigaŵa chapakati ku Texas, wangwamba kukayikiya asani makalata ngo walembanga ngaŵawovyanga nadi ŵanthu. Pavuli paki, wachicheza ndi mubali waki wanguvwa kuti mwana wa mzichi waki we mujeri. Mzichi Myrna wanguŵanaŵana kuti wamulembe kalata mnyamata mwenuyu, yo pa nyengu yo wenga mwana walutanga ku maunganu, ndipu wangumusimikiziya kuti Yehova watimuluwa cha.

Mnyamata uyu wanguweza kalata yo Myrna wangumulembe. Iyu wangukamba kuti wati wamangika, wafipanga mtima ndipuso wawonanga palivi phindu lelosi lakujaliya ndi umoyu. Pa nyengu yeniyi, iyu waŵanaŵaniyanga vo wachitanga po wenga munamana ndipu wangwamba kuŵerenga Bayibolu kweniso kupemphera kwaku Yehova. Wangukamba kuti kalata yo Myrna wangumulembe yenga nge kwamuka kwa mapempheru ngaki ndipuso wenga ukaboni wakuti Yehova weche kumuŵanaŵaniya.

Mzichi Natalie Bibbs, yo waja ku Norcross ku Georgia, wangulonde uthenga kutuwa ku munthukazi munyaki yo wangusaniya yimoza mwa makalata ngo wangulemba. Pa nyengu iyi munthukazi uyu wachitanga masaza ngakutchimbiya ndipu wati wawona kalata yo yenga mumphepeti mwa msewu wanguwelere ndi kuchiyito. Kweni pa vifukwa vinyaki wangakonkhoska cha chifukwa cho wangusankhiya kuti wawelere ndi kuchito kalata yo.

Munthukazi uyu wangulembe kalata Natalie kuti: “Ndingusuzgika ukongwa mu sabata iyi ndipu ndakhumbanga kuti chinthu chinyaki chamampha chichitiki. Kalata yeniyi yenga ‘chinthu chamampha cho ndakhumbanga!’”

Natalie wangukamba kuti: “Kuvwa vinthu vamampha vo ŵanthu akamba asani aŵerenga makalata ngo nditiŵatumiziya vandiwovya kugomezga kuti nthowa yeyosi yo munthu ungagwiriskiya ntchitu pakupharazga, Yehova watitiwovya.”

Mzichi Laura Martinez, wa ku Athens ku Texas, wapereka makalata ku ŵanthu wo agwira ntchitu mumasitolu nga muchigaŵa chawu asani atuza kuzimupasa chakurya mugalimotu yaki. Yumoza mwa ŵanthu ŵenaŵa wangukambiya Laura kuti kalata yo wangumupaska yikumufika pa mtima ukongwa. Pakumumuka, Laura wangumulembe so makalata ngaŵi munthukazi uyu ndipu pasonu panu wasambira nayu Bayibolu.

Vakuchitika nge ivi vititikumbusa kuti chinanga kuti tingaziŵa cha kuti ndi mbewu yidu niyi ya uneneska “yo yichitengi umampha,” kweni Yehova wangatigwiriskiya ntchitu kuti tipharazgi uthenga wakupembuzga kweniso wakupaska chilindizga ku ŵanthu a mitima yamampha mu nthowa yeyosi.—Wakutawula 11:6.