Pa 11 February, 2024, ku Las Vegas, Nevada, U.S.A. angutchaya bola la Super Bowl, lo liziŵika ukongwa mucharu chenichi. Pa nyengu yo atchayanga bola lenili, ŵanthu pafufupi 300,000 anguluta kuchiwonere. Abali anguŵika timashelufu mu malu ngakukwana 50 mumphepeti mwa msewu wa Las Vegas Boulevard wo mujumpha ŵanthu anandi. Pa timashelufu to anguŵikapu mabuku nga mu vineneru 9. Abali ndi azichi 1,500 angugwiraku ntchitu yapade yakupharazga. Mumphata umu akambamu vinthu vamampha vo abali ndi azichi angukumana navu pa nyengu yo apharazganga.

Munthu munyaki wangujumpha po penga kashelufu ko kenga ndi chikwangwani cho chingulembeka fumbu lakuti, “Kumbi Ŵanthu Achinangiyengi Limu Charu?” Iyu wanguwelere liŵiliŵi ndi kuluta po penga Akaboni wo anguma pafupi ndi kashelufu. Iyu wafipanga mtima ndi mo vinthu viliri mucharu pasonu panu. Ndipu wangukondwa ndi layizgu la mu Bayibolu lakukwaskana ndi chimangu lo le pa Yeremiya 29:11. Iyu wangukambiskana ndi abali wo kujumpha ora limoza. Wechendaluti wangukamba so kuti wakhumba kuluta ku maunganu.

Pa malu nganyaki po penga kashelufu pafupi ndi sitediyamu, mulonda wanguwona kashelufu ko kenga ndi chikwangwani cho chingulembeka so fumbu lakuti, “Kumbi Ŵanthu Achinangiyengi Limu Charu?” Chifukwa chakuti mulonda mwenuyu wenga wechekugwira ntchitu, wangukambiya abali kuti wazengi so asani waŵeruka. Pati pajumpha waka kanyengu kamanavi, wanguza so po penga abali ndipu wanguŵakambiya kuti wayamba kuŵerenga Bayibolu pakuyija pambula kuswera yapa. Abali ŵati amukambiya va pulogilamu yidu yakusambiza ŵanthu Bayibolu, iyu wanguzomera kusambira kuti waziŵi vinandi. Abali angupempha mubali munyaki kuti wasambirengi nayu.

Kwati kwaja zuŵa limoza kuti bola liyambi, Akaboni angupharazgiya munthukazi munyaki pa upharazgi wa kunyumba ndi nyumba. Iyu wangukamba kuti pa nyengu yo wawoneriyanga nkhani pa TV wanguvwisiya lipoti lo lakambanga va timashelufu tidu. Iyu wangukamba kuti: “Mugwira ntchitu yamampha. Mu nyengu yakusuzga yo tijamu, tikhumba mazu ngo ngangatipaska chilindizga chamampha.” Pavuli paki wangufumba kuti waziŵi nyengu, zuŵa kweniso malu ngo Akaboni aku Yehova awungana.

Te akukondwa kuti ŵanthu alutirizga kuvwiya ‘zeru zo zidaniriza’ mumalu ngo musanirika ŵanthu anandi kuziya mu ntchitu yapade yakupharazga. Unkhankhu wosi uluti kwaku Chiuta widu, Yehova.—Nthanthi 1:20, 21.