Pa 23 November 2023, Mary M. Larimer, yo wangusere kilasi yakwamba ya Watchtower Bible College of Gilead, wakutayika. a Mary wanguwa pa 4 June 1920, ku Scenery Hill, Pennsylvania, U.S.A. Wangubatizika mu 1935, we ndi vyaka 15 pa unganu wachigaŵa wo unguchitika ku Washington, D.C., U.S.A. Pati pajumpha vyaka vinayi, Mzichi Larimer wanguja mpayiniya wa nyengu zosi ndipu wenga mpharazgi waphamphu.

Mu December 1942, Mary wangulonde kalata kutuwa kwa Mubali Nathan Knorr, yo walongozganga gulu lidu, yakumupempha kuti wakasere sukulu yasonu yo yadanikanga kuti Watchtower Bible College of Gilead. Kalata iyi yingukamba kuti, “chilatu cha sukulu iyi nkhunozgekeresa ateŵeti wosi, anthulumi ndi anthukazi kuti agwirengi umampha ntchitu ya umishonale muvigaŵa vosi va pacharu chapasi.” Kalata yo yingukamba so kuti: “Kilasi lelosi lichitikengi kwa myezi yinkhondi . . . Sukulu iyi yikhumbika phamphu ndipuso kuŵerenga ukongwa kuti munthu wamalizi masambiru munyengu yimanavi yeniyi.” Mary wangutumiza mwaliŵi fomu yaki.

Pa 1 February 1943, iyu limoza ndi abali ndi azichi 99, angwamba kusambira sukulu yeniyi ku South Lansing, New York, U.S.A. Mu myezi yinkhondi yeniyi, Mary wasambiranga Malemba mwaphamphu. Iyu wachitanga umampha ukongwa mukilasi ndipu wangumaliza masambiru nga giliyadi pa 23 June, 1943.

Wati wamaliza masambiru nga giliyadi, Mary angumutumiza ku Cuba kuti wakachitengi umishonale. Pakukamba va masuzgu ngo wakumananga nangu pa uteŵeti waki wasonu, iyu wangukamba kuti: “Ku Cuba ŵanthu ŵenga akavu. Asani tiluta mu upharazgi, tayendanga wapasi . . . Tengavi galimotu.” Mary wangulutirizga kuja kwenuku mpaka mu 1948, po wanguwere ku Pennsylvania kuti wakaphwere anyina wo angupwetekeka ukongwa. Mary wangulutirizga kuja wambula kuyirwa ndipu nyengu zosi wateŵetiyanga Yehova mwaphamphu. Pa nyengu yo wangufwiya, wateŵetiyanga mu mpingu wa ku Glendale, California, U.S.A.

Pasonu panu sukulu ya Watchtower Bible School of Gilead ye ku Patterson, New York, ko kilasi la nambala 155 ye mkati. Mubali Mark Noumair yo ndi msambizi wa sukulu ya Giliyadi wati wavwa kuti mzichi Mary watayika, wangukamba kuti: “Mary Larimer wenga msungwana yo watuliyanga mutawuni yimana ndipu wenga wakukhumbisiska kuluta kwekosi kuti wakapharazgiyi ŵanthu vakukwaskana ndi Yehova. Iyu waziŵanga cha kuti amutumengi pani ndipuso asani wamuweku ko angamutuma. Amishonale nge Mary anguwovya kuti ntchitu ya pacharu chosi yakupharazga yiluti panthazi.”—Yesa. 6:8.