Abali ndi azichi ŵidu ku Venezuela alutirizga mbwenu kukumana ndi masuzgu nganandi. Mwakuyeruzgiyapu, kusazgapu mulili wa COVID-19, mucharu ichi mwe masuzgu nga chuma kweniso vivulupi. Chinanga kuti veviyo, yiwu angusaniya nthowa zakupambanapambana zakuti achitiyi Chikumbusu cha nyifwa yaku Khristu ndipuso kudaniyaku ŵanthu anyaki.

Mwakuyeruzgiyapu, kwati kwaja masabata ngaŵi kuti Chikumbusu chichitiki, mu tawuni ya La Victoria, Apure, yo ye kumphaka ndi Colombia, ŵanthu angwamba kulasana ndi futi kweniso kupumana. Apharazgi wosi a mutawuni iyi anguthaŵiya ku Colombia. Abali ndi azichi mumpingu wa Arauquita ku Colombia anguwovya abali wo angutuwa ku Venezuela kuti achiti Chikumbusu kuziya pa intaneti.

Mpingu unyaki ku Falcón State we muchigaŵa cho kumba foni kweniso kusaniya intaneti nkhwakusuzga ukongwa. Mwaviyo, kuti apharazgi 70 mu mpingu uwu avwisiyi nkhani ya Chikumbusu, angugwiriskiya ntchitu wayilesi.

Mzichi munyaki wangukamba kuti: “Chinanga kuti tingahagana cha pamwenga kuwonana ndi anyidu, kweni tingavwa mazu nga abali ŵidu. Ve nge kuti te nawu limoza.”

Kwati kwaja mazuŵa kuti Chikumbusu chichitiki, mipingu yingugwira ntchitu yapade yakudaniya ŵanthu wo ŵe muvigaŵa vakutali kuti azivwisiyi pulogilamu yeniyi. Pangunozgeka nthowa zakupambanapambana zakuti ŵanthu avwisiyi nkhani ya Chikumbusu. Abali ndi azichi angugaŵiya timapepala takudaniya ŵanthu ku Chikumbusu takujumpha 3,000. Phamphu lo abali angulongo lingupinduwa. Mwakuyeruzgiyapu, mutawuni ya Araya, ŵanthu akujumpha 100 anguvwisiya nkhani ya Chikumbusu kuziya pafoni.

Ofesi ya nthambi ya ku Venezuela nayu so yingunozga ndondomeku yakuti nkhani ya Chikumbusu yikambiki pa mawayilesi 82 ndipuso matchanelu 9 nga pa TV. Ŵanthu pafufupi 8,000 kusazgapu abali ndi azichi anguvwisiya nkhani ya Chikumbusu pakugwiriskiya ntchitu nthowa yeniyi. Pulogilamu yeniyi yingukambika muvineneru vakupambanapambana nge Chiguwahibo, Chipemoni, Chipiaroa, Chipumé, Chiwarao, Chiwayuunaiki, ndi Chiyekuana.

Mutawuni ya Guasipati, ku Bolívar State, nkhani ya Chikumbusu yingunozgeka kuti yiyambi kukambika pa wayilesi nyengu ya 6:30 mazulu. Kweni kanandi muchigaŵa ichi, magesi ngatanja kuzimwazimwa. Venivi vang’anamuwanga kuti anyaki atingi avwisiyengi cha nkhani yosi ya Chikumbusu. Kweni chifukwa cha suzgu linyaki lo lenga ku siteshoni ya wayilesi iyi, nkhani ya Chikumbusu yingukambika usiku wosi, maulendu ngajumpha 10. Venivi vinguchitiska kuti ŵanthu avwisiyi nkhani yosi ya Chikumbusu pa nyengu zakupambanapambana. Ndipu malipoti ngalongo kuti ŵanthu akujumpha 600 anguvwisiya nkhani iyi. Mubali munyaki wangukamba kuti: “Yehova wakhumba cha kuti ŵanthu alekengi kuvwisiya nkhani yapade iyi!”

Chinanga kuti abali ŵidu “akumana ndi masuzgu ngakupambanapambana,” kweni “akondwa ukongwa” kuwona mo Yehova watiŵatumbikiya chifukwa cha kuyesesa kwawu kuti asaniriki pa mwambu wa Chikumbusu kweniso kudaniyaku ŵanthu anyaki ku mwambu uwu.—1 Peturo 1:6, 7.