Pa 10 April 2022, Mubali John Hunguka, wa mu Komiti ya Nthambi ku Zimbabwe, ndiyu wangutuzga Bayibolu la Charu Chifya la Malemba nga Chigiriki Ngachikhristu lakuŵerenge pa vipangizu vamazuŵa nganu muchineneru cha Chitonga (Zimbabwe). Ŵanthu pafufupi 500 anguwonere pulogilamu yeniyi. Mabayibolu ngakupulinta ngayambengi kusanirika mu July 2022.

Chineneru cha Chitonga chenichi, chikambika ndi Atonga pe wo aja kumwera ndi kuzambwi kwa Zambia ndipuso kunkhondi kwa Zimbabwe. Bayibolu la Charu Chifya la Malemba Ngakupaturika lingutuzgika mu Chitonga (chakuyananaku ndi cha ku Zambia) mu 2014. Yaka nkhakwamba kuti Bayibolu lituzgiki kweniso lisindikizgiki mu chineneru cha Chitonga (Zimbabwe).

Bayibolu ili lechendatuwi, ŵanthu wo alongoro Chitonga (Zimbabwe) ŵenga ndi Mabayibolu nga Chitonga cho ŵanthu aku Zambia aŵereŵeta.

Chinanga kuti Chitonga cha ku Zambia chiyananaku ndi Chitonga cha ku Zimbabwe kweni mazu nganyaki ngapambana vo ngang’anamuwa. Mwakuyeruzgiyapu, mu Bayibolu la Charu Chifya la Malemba nga Chigiriki Ngachikhristu la Chitonga cha ku Zambia, pa lemba la 1 Yohane 3:17 pakamba kuti Mkhristu wakhumbika kuchitiya lisungu mubali yo wakhumbika “chovyu,” penipo muchineneru cha Chitonga (Zimbabwe), mazu ngenanga ngangang’anamuwa mubali “wakufuntha.” Akufwatuliya angusintha mazu ngenanga kuti afwatuliyi munthowa yo ŵanthu wo alongoro Chitonga cha ku Zimbabwe angavwisa umampha.

Wakufwatuliya munyaki wangukamba kuti: “Kali, mu uteŵeti ndamaliyanga nyengu yinandi kukonkhoske mweneku wanyumba mazu nga mu mavesi kuti wavwisi vo ngang’anamuwa. Sonu ndiŵerenga waka vesi ndikuzomereza kuti Mazu ngaku Chiuta ngaŵasambizi ŵanthu wo nditiŵapharazgiya.”

Tikondwa nawu limoza abali ndi azichi ŵidu wo alongoro Chitonga (Zimbabwe) chifukwa agwiriskiya ntchitu Bayibolu lasonu lenili pakuwovya ŵanthu a mtima wamampha kuti aziŵi “nthowa ya umoyu.”—Salimo 16:11.