VO VINGAWOVYA MABANJA | NTHENGWA
Kumbi Mungachita Wuli Asani Munyinu we ndi Mijalidu Yinyaki yo Yileka Kukukondwesani
Yimwi mutanja kuchita vinthu mwambula ndondomeku; munyinu wakhumba kuti muchitengi vinthu mwandondomeku.
Yimwi mutanja kuja waka phe kweniso mukhumba cha kucheza ndi anyinu; munyinu watanja kucheza ndi ŵanthu.
Kumbi munthu yo mukutorana nayu we ndi mijalidu yinyaki yo yimwi yitikukondweskani cha? Kujaliya waka kuŵanaŵaniya vo munyinu wanangisa kungananga nthengwa yinu. Ndichu chifukwa chaki Bayibolu likamba kuti, “yo walutirizga kukambakamba nkhani wapatuska mabwezi.”—Nthanthi 17:9.
Mumalu mwakuti jalidu linyaki lo muwolu pamwenga mulumu winu wenalu linangi nthengwa yinu, mungachita umampha kuwona vinthu mwakwenere.
Mu nkhani iyi muwonengi fundu izi
Vo mungachita asani munyinu we ndi mijalidu yinyaki yo yileka kukukondwesani
Vingachitika kuti mijalidu yinyaki yo munyinu wenayu, yo yitikukondwesani cha, yitimuchitisa kuja ndi jalidu lo yimwi mutilikhumbira. Wonani vakuyeruzgiyapu ivi:
“Mulumu wangu ngwavizita ukongwa pakuchita vinthu. Kweni jalidu lenili litimuwovya kuja wakuzikira ndipu chinanga ndini, wachita nani vinthu mwakuzikira. Chinanga kuti nyengu zinyaki vizita vaki vitindibowa, kweni nditimuyanja chifukwa cha kuzikira kwaki.”—Chelsea.
“Muwolu wangu wapangiya limu pulanu ya vinthu vo wakhumba kuchita; wakondwa kuchita vinthu vo wanozge limu, chinanga kuti kuchita viyo kutindikondwesa cha. Kweni jalidu lenili litimuwovya kuti walekengi kuchita vinthu vo waleka kuvinozgeke.”—Christopher.
“Mulumu wangu wangawoneka nge kuti vinthu vinyaki vitimukwaska cha ndipu venivi vitindimwaza ukongwa. Kweni jalidu laki lambula kupupuluma pakuchita vinthu, ndimoza mwa mijalidu yo nditimuyanjiya. Nditimukhumbira ukongwa chifukwa cha jalidu laki lakuchita vinthu mwakufwasa.”—Danielle.
Nge mo Chelsea, Christopher, ndipuso Danielle angukambiya, jalidu linyaki lo muwolu pamwenga mulumu winu wenalu, lo lingawoneka nge kuti litikukondwesani cha, lingavumbuwa jalidu linyaki lamampha lo wenalu. Mwaviyo, mukhumbika kuwona vamampha vo munyinu wachita.
Mbuneneska kuti mijalidu yinyaki yingaŵa ndi vakutuwapu vamampha cha. Mwakuyeruzgiyapu, Bayibolu likamba kuti ŵanthu anyaki ‘atanja kukwiya.’ (Nthanthi 29:22) Asani munthu we ndi jalidu lenili, wakhumbika kuyesesa kutaya kutali “kufinga kwamtundu wewosi, kukwiya, ukali, kugazamuka, mazu ngaheni limoza ndi viheni vinyaki vosi.” a—Aefeso 4:31.
Kweni asani jalidu linyaki lo munyinu wenalu lileka waka kukukondwesani, mutenere kulondo ulongozgi wa mu Bayibolu wakuti: “Lutirizgani kuzizipizgiyana . . . chinanga munyaki wangaŵa ndi chifukwa chakudandawuliya.”—Akolose 3:13.
Kusazgiyapu yapa, mu jalidu lo munyinu wenalu lo lileka kukukondwesani, muyesesengi kusaniyamu kanthu kanyaki kamampha ko katikuchitisani kuti mumuyanjengi ukongwa. Munthulumi munyaki zina laki Joseph wangukamba kuti: “Kujaliya waka kuŵanaŵaniya jalidu linyaki lo munyinu wenalu lo lileka kukukondwesani, kuyanana waka ndi kuwona dayamondi yo kurwandi nkhwakuthwa ukongwa, mumalu mwakuŵanaŵaniya kutowa kwaki.”
Mafumbu ngakuti mukambiskani
Chakwamba, weyosi pakuyija waŵanaŵaniyi dankha mafumbu yanga. Pavuli paki mukambiskani vo mwasaniya.
Kumbi muwolu pamwenga mulumu winu we ndi jalidu linyaki lo litimbanyizga nthengwa yinu? Asani ndi viyo, ndi jalidu wuli?
Kumbi jalidu lenili lafika paheni ukongwa, pamwenga litikukondwesani waka cha?
Kumbi jalidu lenilo litimuchitiska kuja ndi jalidu linyaki lamampha? Asani ndi viyo, ndi jalidu wuli ndipu ntchifukwa wuli mutiliyanja?
a Ŵerengani nkhani ya mutu wakuti, “Vo Mungachita Kuti Mulekengi Kukwiya Ukongwa,” “Kodi Mungapewe Bwanji Kulankhula Mawu Achipongwe,” ndipuso yakuti “Zimene Mungachite Kuti Musamakangane.”