“Alefa ndi Omega” ndi zina laku Yehova, Chiuta Wanthazizosi. Mazu yanga ngasanirika katatu mu Bayibolu nganyaki.​—Chivumbuzi 1:8; 21:6; 22:13. a

 Alefa ndi Omega ntchilembu chakwamba ndi chakumaliya mu alifabeti ya Chigiriki. Chineneru chenichi ndichu chingugwiriskikiya ntchitu pakulemba chigaŵa chinyaki cha Bayibolu cho ŵanthu anandi atichidana kuti Chipanganu Chasonu. Chigaŵa cha Bayibolu chenichi ndichu che ndi buku la Chivumbuzi. Malu ngo musanirika mazu ngakuti Alefa ndi Omega mu alifabeti ya Chigiriki ngalongo kuti Yehova pe ndiyu chiyambi ndi umaliru. (Chivumbuzi 21:6) Iyu ndi Chiuta Wanthazizosi kutuliya kali ukongwa ndipu walutirizgengi kuja Chiuta Wanthazizosi mpaka muyaya. Kweniso ndiyu yija yo ‘ngwamuyaya mpaka muyaya.’​—Sumu 90:2.

 Bayibolu ligwiriskiya ntchitu mazu yanga pakukamba zaku Yehova Chiuta ndi Mwana waki Yesu kweni ngang’anamuwa vinthu vakupambana. Kuti tivwisi fundu iyi, tiyeni tikambiskani fundu ziŵi izi.

•   Pa Yesaya 44:6, Yehova wakamba kuti: “Ini ndini wakwamba ndi wakumaliya. Palivi Chiuta munyaki, kweni ini pe.” Yapa Yehova walongo kuti iyu ndi Chiuta wauneneska kweniso wamuyaya. Kupatuwaku iyu, palivi so Chiuta munyaki. (Marangu 4:​35, 39) Mwaviyo, pa lemba ili mazu ngakuti “wakwamba ndi wakumaliya” ngayanana ŵaka ndi mazu ngakuti “Alefa ndi Omega.”

•   Kweniso mazu ngakuti “Wakwamba [mu Chigiriki pro’tos, alefa cha] kweniso Wakumaliya [mu Chigiriki e’skha·tos, omega cha]” ngasanirika pa lemba la Chivumbuzi 1:17, 18 ndi 2:8. Mavesi yanga ngakamba za munthu yo wangufwa ndipu pavuli paki wanguja so ndi umoyu. Mwaviyo, mavesi yanga ngakamba zaku Chiuta cha chifukwa iyu wechendafwepu. (Habakuku 1:12) Kweni Yesu wangufwa ndi kuyuskika. (Machitidu 3:13-15) Iyu wenga munthu wakwamba kuyuskika ndi umoyu wambula kufwa ndipu sonu ngwamoyu kuchanya, “muyaya mpaka muyaya.” (Chivumbuzi 1:​18; Akolose 1:18) Yesu ndiyu yija yo wakupaskika mazaza ngakuyuskiya akufwa. (Yohane 6:​40, 44) Mwaviyo, iyu ndiyu wenga wakumaliya kuyuskika mwachindunji ndi Yehova. (Machitidu 10:40) Chifukwa cha venivi, mphakwenere nadi kukamba kuti Yesu ‘ngwakwamba ndi wakumaliya.’

 Awa. Munthu yo wangukamba mazu nga pa Chivumbuzi 22:13 waziŵika umamphaumampha cha kuti ndiyani, chifukwa mu chaputala ichi mulongoro ŵanthu anandi. Pakukamba za vesi ili, pulofesa munyaki zina laki William Barclay wangukamba kuti: “Pa lemba ili vinthu vikulembeka mwadondomeku cha ndipu nkhwakusuzga kuziŵa munthu yo wangukamba mazu ngenanga.” (The Revelation of John, Volume 2, Revised Edition, peji 223) Mwaviyo, mazu ngakuti “Alefa ndi Omega” ngo nge pa Chivumbuzi 22:13 ngakamba za Munthu yumoza pe yo wazumbulika ndi zina lenili mu buku la Chivumbuzi, yo ndi Yehova Chiuta.