Bayibolu lisambiza kuti pa vamoyu vosi vo ve pacharu chapasi, mbanthu amanavi wo aluta kuchanya. (Chivumbuzi 14:1, 3) Yiwu aluta kuchanya kuti akalamuliyi nge mafumu kweniso asembi limoza ndi Yesu. (Luka 22:28-30; Chivumbuzi 5:9, 10) Kweni gulu likulu la ŵanthu lazamuyuskika ndi kuja pacharu chapasi mu paradayisu.—Sumu 37:11, 29.

 Bayibolu likambapu cha kuti viŵetu viluta kuchanya. Ve viyo chifukwa nyama zingachita cha vo ŵanthu akhumbika kuchita kuti aje akwenere ‘kudanikiya kuchanya.’ (Aheberi 3:1) Kuti munthu waluti kuchanya, wakhumbika kuziŵa vinthu, kuja ndi chivwanu ndipuso kuvwiya marangu ngaku Chiuta. (Mateyu 19:17; Yohane 3:16; 17:3) Kweniso, mbanthu pe wo akulengeka kuti azije ndi umoyu kwamuyaya.—Chiyambo 2:16, 17; 3:22, 23.

 Kuti munthu waluti kuchanya, wakhumbika dankha kuyuskika. (1 Akorinto 15:42) Bayibolu lizumbuwa ŵanthu anandi wo anguyuskika. (1 Ŵakaronga 17:17-24; 2 Ŵakaronga 4:32-37; 13:20, 21; Luka 7:11-15; 8:41, 42, 49-56; Yohane 11:38-44; Machitidu 9:36-42; 20:7-12) Kweni wosi ŵenaŵa ŵenga ŵanthu, nyama cha.

•  Kumbi nyama ze ndi umoyu?

•  Kumbi umoyu utufwa?

•  Kumbi nyama zibuda?

•  Kumbi mbumampha kuchitiya nkhaza nyama?

 Awa. Bayibolu likamba kuti nyama kweniso ŵanthu vamoyu. (Maŵerengedu 31:28) Munthu wakwamba Adamu wati walengeka wangupaskika umoyu cha, kweni iyu “wanguja munthu wamoyu.” (Chiyambo 2:7, mazu ngamumphata) Umoyu ukupangika ndi vinthu viŵi: ‘dongu’ ndi “mvuchi wa umoyu.”

 Hinya, Bayibolu likamba kuti umoyu utufwa. (Ŵalevi 21:11; Ezekiele 18:20) Asani nyama kweniso ŵanthu afwa, vosi viwere kudongu. (Wakutaula 3:19, 20) Mu mazu nganyaki, tingakamba kuti vijaku so cha. a

 Awa. Kuti munthu wabudi ndikwesa waŵanaŵana, wakwaskika pamwenga wachita chinthu chinyaki cho chisuskana ndi fundu zaku Chiuta. Kweniso wakhumbika kuja yo waziŵa kusankha vakwenere kuchita pa nkhani ya mijalidu, penipo nyama zingachita cha venivi. Pa nyengu yimanavi yo zija zamoyu, nyama zichita waka vinthu mwakawi. (2 Peturo 2:12) Pavuli paki, zitufwa chinanga kuti zabuda cha.

 Awa. Chiuta wakupaska ŵanthu udindu wakuphwere nyama, kweni wakuŵapaska wanangwa wakuti azichitiyengi nkhaza cha. (Chiyambo 1:28; Sumu 8:6-8) Ndipu Chiuta waphwere nyama yeyosi, kusazgapu tiyuni timanatimana. (Yona 4:11; Mateyu 10:29) Iyu wangulamula ateŵeti ŵaki kuti nyama angazichitiyanga nkhaza cha.—Chituwa 23:12; Marangu 25:4; Nthanthi 12:10.