Bayibolu likamba cha nyengu yo Chiuta wangwambiya kulenga charu pamwenga utali wa nyengu yo wanguchilenge. Kweni likamba ŵaka kuti: “Pakwamba Chiuta wangulenga kuchanya ndi charu chapasi.” (Genezesi 1:1) Bayibolu likamba cha kuti “pakwamba” po lenga zuŵa wuli. Kweni vo vikulembeka mu buku la Genezesi vilongo kuti vinthu vinyaki ndipu viliku kali ngechendayambi mazuŵa 6 ngakulenge vinthu.

•  Kumbi mazuŵa 6 ngakulenge vinthu lenga zuŵa chayilu la maora 24?

•  Kumbi ndi vinthu wuli vo vinguchitika pa mazuŵa 6 ngakulenge vinthu?

•  Kumbi vo buku la Genezesi likamba vikoliyana ndi vo asayansi akamba?

•  Kumbi lumwi, mwezi kweniso nyenyezi vingulengeka zukwanji?

•  Kumbi Bayibolu likamba kuti charu chajaku kwa nyengu yitali wuli?

 Awa. Mu Bayibolu mazu ngakuti “zuŵa,” ngangang’anamuwa utali wa nyengu zakupambanapambana mwakukoliyana ndi nkhani. Mwakuyeruzgiyapu, nkhani yimoza yikonkhoska nyengu yosi yakulenge vinthu nge kuti ndi zuŵa limoza.—Genezesi 2:4.

 Chiuta wangusintha charu chapasi ‘chambula kawonekeru keneku ndipuso chambula kanthu,’ kuti ngaje malu ngakujamu vinthu vamoyu. (Genezesi 1:2) Pavuli paki, wangulenga vinthu vamoyu pacharu chapasi. Bayibolu likonkhoska vinthu 6 vo vinguchitika pa mazuŵa pamwenga nyengu yitali yakulenge vinthu:

•  Zuŵa Lakwamba: Chiuta wanguchitiska kuti ukweru ufiki pacharu chapasi, vo vinguchitiska kuti paŵi msana ndi usiku.—Genezesi 1:3-5.

•  Zuŵa Lachiŵi: Chiuta wangupanga mude, pamwenga kuti wangugaŵa maji kuti nganyaki ngaje pasi pa mude ndipu nganyaki ngaje pachanya pa mude.—Genezesi 1:6-8.

•  Zuŵa Lachitatu: Chiuta wangupanga mtunda wakumira. Iyu wangulenga so vakume.—Genezesi 1:9-13.

•  Zuŵa Lachinayi: Chiuta wangupanga lumwi, mwezi ndi nyenyezi nge vakumbulikiya pacharu chapasi.—Genezesi 1:14-19.

•  Zuŵa la 5: Chiuta wangupanga vamoyu va mumaji ndi vakuphululuka.—Genezesi 1:20-23.

•  Zuŵa la 6: Chiuta wangupanga nyama za kumtunda kweniso ŵanthu.—Genezesi 1:24-31.

 Pavuli pa zuŵa la 6, Chiuta wangupumuwa ku ntchitu yeniyi pamwenga kuti wanguleka kulenga vinthu.—Genezesi 2:1, 2.

 Nkhani ya mu Bayibolu yakukwaskana ndi kulenga vinthu va pacharu chapasi yikamba vinandi cha va sayansi. Mumalu mwaki, likonkhoska vakukwaskana ndi kulenga vinthu munthowa yakuti chinanga mbanthu a munyengu yakali wo aŵerenganga nkhani yeniyi, avwisanga ndondomeku ya mo Chiuta wangulenge vinthu vakupambanapambana. Vo Bayibolu likamba pa nkhani yakulenga vinthu, visuskana cha ndi vo asayansi akamba. Wasayansi munyaki zina laki Robert Jastrow wangulemba kuti: “Vosi vo vikonkhoskeka vipambana. Kweni fundu zikuluzikulu zo akusanda vakuchanya akusaniya ndipuso zo Bayibolu likamba mu buku la Genezesi pa nkhani ya mo umoyu ukwambiya, zikoliyana pa chinthu chimoza ichi: vinthu vo vinguchitiska kuti munthu waŵeku vingwamba mwamabuchibuchi kweniso mwaliŵiliŵi, pa nyengu yinyaki yakuŵikika.”

 Lumwi, mwezi kweniso nyenyezi, vengaku kali nge chigaŵa cha “kuchanya” cha vinthu vo vingulengeka “pakwamba.” (Genezesi 1:1) Kweni ukweru waki wafikanga cha pacharu chapasi chifukwa chakuti mude mwenga mdima. (Genezesi 1:2) Chinanga kuti ukweru ungwamba kuwoneka pa zuŵa lakwamba, kweni ko kwatuliyanga ukweru kwawonekanga cha. Kweni viwoneka kuti pa zuŵa lachinayi, mdima ungumala. Bayibolu likamba kuti pavuli paki ndipu lumwi, mwezi ndi nyenyezi vingwamba ‘kuŵaliya charu chapasi,’ kung’anamuwa mo ŵanthu atingi aviwoniyengi pacharu chapasi.—Genezesi 1:17.

 Bayibolu likamba cha kuti charu chajaku kwa nyengu yitali wuli. Lemba la Genezesi 1:1 likamba waka kuti vinthu vosi, kusazgapu charu chidu ve ndi pakwambiya. Kweni mazu yanga ngasuskana cha ndi fundu zo asayansi akamba pamwenga vyaka vo akamba kuti charu chajaliyaku.