Kumbi mu Bayibolu mwe Fundu zo Zingandipembuzga?
Vo Bayibolu limuka
Hinya. (Aroma 15:4) Wonani mavesi nganyaki nga mu Bayibolu ngo ngawovyapu ŵanthu anandi kuti amalani ndi masuzgu ngo akumana nangu kweniso kusuzgika maŵanaŵanu.
Mu nkhani iyi, tikambiskanengi fundu izi:
Masuzgu ngo tikumana nangu
Salimo 23:4: “Chinanga kuti nditenda mudambu la mudima ukulu, nditopa chechosi cha pakuti yimwi mwe nani.”
Vo lemba ili ling’anamuwa: Kuti mukunthiyepu masuzgu ngo mukumana nangu, mukhumbika kupemphera kwaku Chiuta kweniso kugomezga Mazu ngaki Bayibolu kuti ngakulongozgeni.
Afilipi 4:13: “Mu vinthu vosi ndija ndi nthazi kuporote mwaku yo watindipaska nthazi.”
Vo lemba ili ling’anamuwa: Chiuta wangakupaskani nthazi kuti mukunthiyepu masuzgu ngo mukumana nangu.
Asani munthu yo tamuyanjanga watayika
Wakutawula 9:10: “Kulivi kugwira ntchitu, kuŵanaŵana vakuchita, kuziŵa vinthu kweniso zeru ku Dindi ko uluta.”
Vo lemba ili ling’anamuwa: Ŵanthu akufwa asuzuzgika cha kweniso angatipweteka cha. Ndipu aziŵa chechosi cha.
Machitidu 24:15: “Kwazamuja chiyuka.”
Vo lemba ili ling’anamuwa: Chiuta wazamuyuska akwanjiwa ŵidu wo akufwa kuti azijeso ndi umoyu.
Kujimba ukongwa mulandu
Salimo 86:5: “Chifukwa yimwi Yehova, a ndimwi wamampha ndipuso wakunozgeka kugowoka; wosi wo adaniya paku yimwi, mutiŵalongo chanju chikulu chambula kumala.”
Vo lemba ili ling’anamuwa: Chiuta wagowoke ŵanthu wo azomereza vo anangisa ndipu akhumbisiska kuvileke limu.
Salimo 103:12: “Nge mo ulili utali wa pakati pa ko kutuliya lumwi ndi ko liselere, ndimu so waŵikiya kutali maubudi ngidu ndi isi.”
Vo lemba ili ling’anamuwa: Asani Chiuta watigowoke maubudi ngidu, watingataya kutali ukongwa. Iyu watitikumbusa so cha za maubudi ngenanga pamwenga kutipaska chilangu.
Kuchita chitima
Salimo 31:7: “Yimwi mwawona kusuzgika kwangu; ndipuso muziŵa umampha mo ndisuzgikiya maŵanaŵanu.”
Vo lemba ili ling’anamuwa: Chiuta waziwa umampha masuzgu ngosi ngo tikumana nangu. Iyu waziŵa mo tivwiya mumtima kuluska munthu weyosi.
Salimo 34:18: “Yehova we pafupi ndi wo asweka mtima; iyu wataska wo mzimu wawu watekenyeka.”
Vo lemba ili ling’anamuwa: Chiuta wakulayizga kuti wakuwovyengi asani mwe ndi chitima. Iyu wakupaskeningi nthazi kuti mumalani ndi masuzgu ngo ngatikupwetekesani mtima.
Kutama
Salimo 41:3: “Yehova wamuwovyengi we pabedi laki pa nyengu yo watama.”
Vo lemba ili ling’anamuwa: Chiuta wangakuwovyani kuti muje ndi chimangu chamumtima chinanga kuti mutama ukongwa. Iyu wangakuwovyani so kuti muje ndi nthazi, mukukunthiyepu kweniso wangakupaskani zeru kuti musankhengi vinthu mwazeru.
Yesaya 33:24: “Ndipu palivi wakuja mucharu cho yo wazamukamba kuti: “Ndatama.’”
Vo lemba ili ling’anamuwa: Chiuta wakulayizga kuti ŵanthu wosi azamuja ndi umoyu wamampha.
Kusuzgika maŵanaŵanu ndipuso kufipa mtima
Salimo 94:19: “Vinthu vakufipiska mtima vati vandimala nthazi, yimwi mungundipembuzga kweniso mungundisisipuwa.”
Vo lemba ili ling’anamuwa: Asani tithemba Chiuta kuti watiwovyi pa nyengu yo tasuzgika maŵanaŵanu, iyu watiwovyengi kuja akufwasa.
1 Peturo 5:7: “Muchiponya paku iyu vosi vo vitikufipiskani mtima, chifukwa iyu watikuŵanaŵaniyani.”
Vo lemba ili ling’anamuwa: Vitimukwaska ukongwa Chiuta asani wawona kuti tisuzgika. Iyu wakhumba kuti tipempherengi kwaku iyu ndi kumukambiya masuzgu ngidu ngosi ngo tikumana nangu.
Nkhondu
Salimo 46:9: “Iyu wamalisa nkhondu pacharu chosi chapasi.”
Vo lemba ili ling’anamuwa: Pambula kuswera yapa, Ufumu waku Chiuta wazamumalisiya limu nkhondu pacharu chapasi.
Salimo 37:11, 29: “Akufwasa azamulonde charu chapasi, ndipu azamukondwa ukongwa ndi chimangu chikulu. . . . Ŵanthu arunji azamulonde charu chapasi, ndipu azamuja mwenimo kwamuyaya.”
Vo lemba ili ling’anamuwa: Wanthu amampha azamuja mwachimangu pacharu chapasi kwamuyaya.
Kufipa mtima ndi vo vichitikengi kunthazi
Yeremiya 29:11: “‘Ndiziŵa umampha vo nditikuŵanaŵaniyani,’ Yehova ndiyu wakamba, ‘ndiŵanaŵana kuti ndikupaskeni chimangu, soka cha, kuti vinthu vizikuyendiyeni umampha kunthazi kweniso kuti muje ndi chilindizga chamampha.’”
Vo lemba ili ling’anamuwa: Chiuta watiŵasimikiziya ŵanthu ŵaki kuti azamuja ndi umoyu wamampha ukongwa kunthazi.
Chivumbuzi 21:4: “Iyu wazamuleska masozi ngosi mumasu mwawu, ndipu nyifwa yazamuŵaku so cha. Kwazamuŵavi kuliya, kukuta pamwenga urwirwi. Vinthu vakali vatuwapu.”
Vo lemba ili ling’anamuwa: Chiuta walayizga kuti wazamumalisiya limu vinthu viheni vosi vo vichitika mazuŵa nganu.
a Yehova ndilu zina laku Chiuta. (Salimo 83:18) Wonani nkhani yamutu wakuti “Kumbi Yehova Ndiyani?”
Mungayanja Kuŵerenga so Nkhani Izi
CHIGONGWI CHA MLINDA
Mungapinduwa Chifukwa Chakuziŵa Kuti Chiuta Watikuŵanaŵaniyani
Malemba ngatitiwovya so kuti tigomezgengi vinthu vamampha vo Chiuta watilayizga kunthazi.
MAFUMBU NGO BAYIBOLU LIMUKA
Kumbi Chilindizga Ndingachisaniya Pani?
Bayibolu lingakuwovyani kuja ndi umoyu wamampha sonu ndipuso kuja ndi chilindizga chamamapha cha munthazi.
NKHANI ZINYAKI
Kupembuzga wo Aliya
Asani munthu yo tamuyanjanga watayika, tingawona kuti palivi yo wavwisa mo tivwiya. Kweni Chiuta wavwisa ndipu wangatiwovya.
CHIGONGWI CHA MLINDA
Asani Vakusuzga Kukunthiyapu Masuzgu
Umoyu we ndi phindu chinanga kuti tingakumana ndi masuzgu
ESSENTIAL BIBLE TEACHINGS
Ntchifukwa Wuli Chiuta Wazomerezga Kuti Tisuzgikengi?
Ŵanthu anandi afumba chifukwa cho pacharu chapasi pe masuzgu nganandi viyo. Bayibolu lititiwovya kuti tisaniyi kwamuka kwa kukhorwesa pa nkhani iyi.
VO BAYIBOLU LISAMBIZA
Yesesani Kusambira Bayibolu
Sambirani Bayibolu kwawezi ndi munthu yo wakusambizeningi.