Asani ŵana akuwa aja ndi udindu wakuphwere apapi ŵawu wo mbakukota. Bayibolu likamba kuti ŵana arara akhumbika “asambiri dankha kujipereka kwaku Chiuta munyumba mwawu ndipuso kuweze apapi ŵawu . . . , pakuti chenichi ntchakuzomerezeka pa masu paku Chiuta.” (1 Timote 5:4) Mwaviyo asani ŵana arara atesesa kuphwere apapi ŵawu wo mbakukota, alongo kuti avwiya dangu la mu Bayibolu lakuti atumbikengi apapi ŵawu.—Aefeso 6:2, 3.

 Bayibolu lipereka marangu chayingu cha nga vo munthu wangachita pakuphwere apapi ŵaki akukota. Kweni likonkhoska vo anthulumi ndi anthukazi anyaki anguchita pakuphwere apapi ŵawu. Kweniso le ndi ulongozgi wo ungawovya ŵanthu wo aphwere apapi ŵawu akukota.

•  Kumbi ateŵeti akali aku Chiuta achitanga wuli kuti aphwere apapi ŵawu akukota?

•  Kumbi mbulongozgi nuwu wa mu Bayibolu wo ungawovya ŵanthu wo aphwere akukota?

•  Kumbi Bayibolu likamba kuti apapi akukota ajengi pani kuti munthu waŵaphwere umampha?

 Aphweriyanga apapi ŵawu mu nthowa zakupambanapambana mwakukoliyana ndi mo vinthu venge. Mwakuyeruzgiyapu:

•   Yosefe wajanga kutali ndi ko kwajanga awisi a Yakobe, wo ŵenga akukota. Kweni vinthu vati vayamba kumuyende umampha wanguŵadanisa awisi kuti azijengi kufupi ndi ko iyu wajanga. Ndipu ŵati ŵaza, Yosefe wanguŵapaska malu ngakuja, waŵapaskanga chakurya kweniso waŵavikiriyanga.—Genezesi 45:9-11; 47:11, 12.

•   Ruti wangutuwa mucharu chawu kuluta kuchija mucharu cha apongozi ŵaki ndipu kwenuku wagwiranga ntchitu mwaphamphu kuti waŵaphweriyengi.—Ruti 1:16; 2:2, 17, 18, 23.

•   Yesu, wati waja kamanavi kuti wafwi, wangusankhiya limu munthu wakuti waphweriyengi anyina a Mariya wo atenere kuti ŵenga choko pa nyengu iyi.—Yohane 19:26, 27. a

 Mu Bayibolu mwe fundu zo zingawovya ŵanthu wo aphwere akukota kuti amalani ndi masuzgu ngo nyengu zinyaki angakumana nangu po aphwere apapi wo mbakukota.

•   Mutumbikengi apapi ŵinu.

   Vo Bayibolu likamba: “Utumbikengi awusu ndi anyoku.”—Ekisodo 20:12.

   Mo mungagwiriskiya ntchitu fundu yeniyi Mungalongo kuti mutiŵatumbika apapi ŵinu asani mutiŵazomereza kuti achitengi vo angafiska pakuŵija kuti ajiphwere. Asani nkhwamachitika asankhengi ŵija chovyu cho angakhumba kulonde. Ndipu mungalongo so kuti mutiŵatumbika asani muchita vo mungafiska kuti muŵawovyi.

•   Muŵavwisengi kweniso muŵagowokiyengi.

   Vo Bayibolu likamba: “Zeru za munthu zichitiska kuti ukali waki ugowoki, ndipu kuziŵaniza vo munthu wamunangiya, kuchitiska kuti wawoneki wakutowa.”—Nthanthi 19:11.

   Mo mungagwiriskiya ntchitu fundu yeniyi? Asani apapi ŵinu wo mbakukota alongoro mwambula kukuŵanaŵaniyani pamwenga alongo kuti awonga cha vo mutiŵachitiya, jifumbeni kuti, ‘Nkhaŵengi kuti ini ndini nde wakukota, kumbi ndatingi ndichitengi wuli?’ Asani mutesesa kuŵavwisa kweniso kuŵagowoke mungakhwecha masuzgu nganandi.

•   Mupemphengi anyinu kuti akuwovyeni.

   Vo Bayibolu likamba: “Vinthu vifiskika cha kwambula kukambiskana, kweni vifiskika asani pe ŵanthu anandi akupereka ulongozgi.”—Nthanthi 15:22.

   Mo mungagwiriskiya ntchitu fundu yeniyi? Mufufuzengi vo mungachita kuti muwovyi apapi ŵinu akukota asani atamatama. Mufufuzengi so ko mungasaniya chovyu muchigaŵa cho muja kuti muleki kusuzgika kuŵaphwere. Kambiskanani ndi ŵanthu wo akuphweriyapu apapi akukota kuti akuwovyeni. Asani mwe ndi avurwa, aku ŵinu pamwenga azichi ŵinu, mungachita umampha kukambiskana vo mosi mutenere kuchita kuti muphwere apapi ŵinu akukota.

•   Mujiyuyuwengi.

   Vo Bayibolu likamba: “Zeru ze ndi ŵanthu akujiyuyuwa.”—Nthanthi 11:2.

   Mo mungagwiriskiya ntchitu fundu yeniyi Muziŵengi kuti pe vinthu vinyaki vo mungafiska cha kuchita. Mwakuyeruzgiyapu, pe vinthu vinyaki vo weyosi wangatondeka kuchita chifukwa cha nthazi pamwenga nyengu. Venivi vingakwaska so vo mungakhumba kuchita kuti muphwere apapi ŵinu. Asani muwona kuti udindu uwu wakukuliyani, mungachita umampha kupempha achibali ŵinu pamwenga ŵanthu anyaki wo nawu aphwere akukota kuti akuwovyeni.

•   Mujiphweriyengi mwaŵeni.

   Vo Bayibolu likamba: “Palivi munthu yo watinkha liŵavu laki, kweni watiliryisa ndipuso watiliyanja.”—Aefeso 5:29.

   Mo mungagwiriskiya ntchitu fundu yeniyi Chinanga kuti mwe ndi udindu wakuphwere apapi ŵinu, kweni mutenere so kujiphwere kweniso kuphwere ŵanthu a mubanja linu asani mwe pabanja. Muryengi chakurya chakukwana. Musaniyengi nyengu yakupumuliya ndipuso mugonengi mwakukwana. (Wakutawula 4:6) Ndipu asani nkhwamachitika ntchitu zingakupanikizaningi cha. Venivi vikuwovyeningi kuti mukondwengi po muphwere apapi ŵinu kweniso kuti muje ndi liŵavu lanthazi.

 Mu Bayibolu mulivi ulongozgi wewosi wakukwaskana ndi malu ngo apapi wo mbakukota atenere kuja kuti ŵana ŵawu aŵaphwere umampha. Mabanja nganyaki ngasankha kuja ndi apapi ŵawu wo mbakukota. Kweni nyengu zinyaki angasankha kuchiŵaŵika ku malu ko aphwere akukota. Asani ndi viyo, banja lelosi lingachita umampha kukambiskana vo weyosi watenere kuchita pakuphwere apapi wo mbakukota.—Agalatiya 6:4, 5.