Mazu ngakuti “Yerusalemu Mufya,” ngasanirika pa malu ngaŵi mu Bayibolu ndipu ngakamba za tawuni yo yimiya gulu lo lilondo Yesu. Gulu ili, liluta kuchanya kuchilamuliya limoza ndi Yesu mu Ufumu waku Chiuta. (Chivumbuzi 3:​12; 21:​2) Bayibolu lilongo kuti gulu ili lidanika so kuti mwali waku Khristu.

1.   Yerusalemu Mufya we kuchanya. Kanandi Bayibolu lizumbuwa Yerusalemu Mufya kuti wasika kutuwa kuchanya ko angelu avikiliya mageti nga tawuni. (Chivumbuzi 3:​12; 21:​2, 10, 12) Kweniso, tawuni iyi njikulu ukongwa ndi “masitadiya 12,000” mwakuti yingakwana cha pacharu chapasi. a (Chivumbuzi 21:​16) Tawuni yeniyi njakuyanana vigaŵa vosi vinayi, mu utali, mu ufupi ndipuso mu msinkhu.

2.   Yerusalemu Mufya wapangika ndi gulu la akulondo Yesu wo ndi mwali waku Khristu. Yerusalemu mufya wadanika kuti “mwali, yo ndi muwolu wa Mwanawambereri.” (Chivumbuzi 21:​9, 10) Bayibolu ligwiriskiya ntchitu mazu ngakuti Mwanawambereri pakukamba zaku Yesu Khristu. (Yohane 1:​29; Chivumbuzi 5:​12) Ndipu “muwolu wa Mwanawambereri,” yo ndi mwali waku Khristu, wamiya Akhristu akusankhika wo amuja ndi Yesu kuchanya. Bayibolu lilongo kuti Yesu ndi Akhristu akusankhika ŵenaŵa, mbakukoliyana ukongwa nge mo viŵiya pakati pa munthulumi ndi munthukazi wo mbakutolana. (2 Akorinto 11:​2; Aefeso 5:​23-​25) Kusazgiyapu pa fundu iyi, pa mya yakumangiya Yerusalemu Mufya, pakulembeka “mazina 12 nga akutumika 12 a Mwanawambereri.” (Chivumbuzi 21:​14) Fundu iyi yititiwovya kuti tiŵaziŵi umampha wo ŵe mugulu la Yerusalemu Mufya. Tikamba viyo chifukwa chakuti Akhristu akusankhika wo adanika kuti akaje kuchanya, apangika kutuliya “pafawundeshoni ya akutumika kweniso achimi.”​—Aefeso 2:​20

3.   Yerusalemu Mufya ntchigaŵa cha boma lakuchanya. Tawuni yakali ya Yerusalemu yenga likulu la ku Isirayeli, ko Fumu Davidi, mwana waki Solomoni ndipuso ŵana ŵawu angulamuliya “pa chitengu chaku Yehova.” (1 Mikoka 29:​23) Yerusalemu wadanikanga kuti “tawuni yakupaturika,” chifukwa ŵanthu a mubanja laku Davidi wo alamuliyanga nge mafumu, amiyanga ufumu waku Chiuta. (Nehemiya 11:​1) Yerusalemu Mufya yo wadanika so kuti “tawuni yakupaturika,” wapangika ndi Akhristu wo azamuja ndi Yesu kuchanya ndipu azamuja mafumu ngo “ngazamulamuliyanga charu chapasi.”​—Chivumbuzi 5:​9, 10; 21:​2.

4.   Yerusalemu Mufya wazamuchitiska kuti ŵanthu wo azamuja pacharu chapasi azilonde vitumbiku. Bayibolu likamba kuti Yerusalemu Mufya “wasika kutuwa kuchanya kwaku Chiuta.” Venivi vilongo kuti Chiuta wagwiriskiya ntchitu Yerusalemu Mufya pakukhumba kunozga vinthu pacharu chapasi. (Chivumbuzi 21:​2) Mazu yanga ngachitiska kuti paje kukoliyana pakati pa Yerusalemu Mufya ndi Ufumu waku Chiuta wo Chiuta watiwugwiriskiya ntchitu pakufiska khumbu laki “kuchanya ndipuso panu pasi.” (Mateyu 6:​10) Vo Chiuta wakhumba kuŵachitiya ŵanthu pacharu chapasi visazgapu vitumbiku ivi:

   •   Kutuzgapu ubudi. “Msinji wa maji ngaumoyu,” utenda kutuwa ko kwe Yerusalemu Mufya ndipu utachidiliya “vimiti vaumoyu” vo mani ngaki “ngachizga mitundu ya ŵanthu.” (Chivumbuzi 22:​1, 2) Mwaviyo, kuchizga kwenuku ko kumiya so kuchizga matenda chayingu, kwazamutuzgapu ubudi ndipu venivi vazamuchitiska kuti ŵanthu azije akufikapu nge mo Chiuta wakhumbiyanga pakudankha.​—Aroma 8:​21.

   •   Ŵanthu azamuja paubwezi wamampha ukongwa ndi Chiuta. Ubudi wachitiska kuti ŵanthu aje kutali ndi Chiuta. (Yesaya 59:​2) Asani ubudi wazituzgikapu wazamuchitiska kuti uchimi uwu ufiskiki wo ukamba kuti: “Chihema chaku Chiuta che pakati pa ŵanthu. Iyu wajengi nawu ndipu yiwu aŵengi ŵanthu ŵaki. Ndipu Chiuta iyu mweneku waŵengi nawu.”​—Chivumbuzi 21:3.

   •   Masuzgu ngazamumala ndipuso nyifwa. Chiuta wazamugwiriskiya ntchitu Ufumu waki kutuzgapu masuzgu ngosi “ndipu nyifwa yiŵengepu so cha, chinanga nkhuliya pamwenga kukuta pamwenga urwirwi viŵengepu so cha.”​—Chivumbuzi 21:​4.