Kanandi Bayibolu likamba kuti Yesu ndi “Mwana waku Chiuta.” (Yohane 1:49) Mazu ngakuti “Mwana waku Chiuta,” ngalongo kuti Chiuta ndi Mulengi pamwenga Ntchisimi cha umoyu, kusazgapu umoyu waku Yesu. (Sumu 36:9; Chivumbuzi 4:11) Bayibolu likambapu cha kuti Chiuta wangubala Yesu mwakuyanana ndi mo ŵanthu achitiya.

 Bayibolu likamba so kuti angelu ‘mbana aku Chiuta wauneneska.’ (Jobu 1:6) Ndipu likamba so kuti munthu wakwamba Adamu, wenga “mwana waku Chiuta.” (Luka 3:38) Kweni chifukwa chakuti Yesu ndiyu wangwamba kulengeka kweniso Chiuta wangumulenga yija, Bayibolu likamba kuti Yesu ndi Mwana wapade waku Chiuta.

•  Kumbi Yesu wenga kuchanya wechendazi pacharu chapasi?

•  Kumbi Yesu wachitanganji wechendazi pacharu chapasi?

 Hinya. Yesu wenga chakulengeka chauzimu wechendazi pacharu chapasi kuzibalika nge munthu. Ndipu Yesu mweneku wangukamba kuti: “Ndikusika kutuliya kuchanya.”—Yohane 6:38; 8:23.

 Chiuta wangwamba kulenga Yesu wechendalengi chinthu chinyaki chechosi. Pakukamba zaku Yesu, Bayibolu likamba kuti:

•   ‘Iyu . . . ngwakwamba kuwaku pa chilengedu chosi.’—Akolose 1:15.

•   Iyu ‘ngwakwamba kulengeka ndi Chiuta.’—Chivumbuzi 3:14.

 Yesu wangufiska uchimi wo ukamba za munthu yo “wakuŵaku nyengu zakali, mazuŵa ngakali.”—Mika 5:2; Mateyu 2:4-6.

 Iyu wenga ndi udindu ukulu kuchanya. Yesu wakambanga va udindu waki wenuwu pa nyengu yo wangupemphera kuti: “Ada, ndikankhuskeni . . . mwakundipaska unkhankhu wo ndenga nawu charu chechendaŵeku.”—Yohane 17:5.

 Iyu wanguwovya Awisi kulenga vinthu vinyaki vosi. Yesu wagwiranga ntchitu limoza ndi Chiuta “nge mumisili walusu.” (Nthanthi 8:30) Pakukamba zaku Yesu, Bayibolu likamba kuti: “Kuporote mwaku iyu, vinthu vinyaki vosi vikulengeka kuchanya ndi pacharu chapasi.”—Akolose 1:16.

 Kuziya mwaku Yesu, Chiuta wakulenga vinthu vinyaki vosi. Ndipu vinthu venivi visazgapu angelu kweniso vinthu vosi va muchilengedu. (Chivumbuzi 5:11) Kukoliyana ko kwe pakati paku Chiuta ndi Yesu kuyanana ndi munthu wakupanga mapulani yo wagwira ntchitu limoza ndi wakuzenga. Wakupanga mapulani wajambula pulani ya nyumba, ndipu wakuzenga wagwiriskiya ntchitu pulani yo kuti wazengi nyumba.

 Iyu wateŵetiyanga nge Mazu. Pakukamba zaku Yesu wechendaje munthu, Bayibolu likamba kuti wenga “Mazu.” (Yohane 1:1) Ivi vilongo kuti Chiuta wagwiriskiyanga ntchitu Mwana waki pakupereka uthenga kweniso ulongozgi ku vakulengeka vinyaki vauzimu.

 Chiuta wagwiriskiyanga so ntchitu Yesu asani wakhumba kukambiskana ndi ŵanthu pacharu chapasi. Viwoneke limu kuti Chiuta wangugwiriskiya ntchitu Yesu pakupereka ulongozgi kwaku Adamu ndi Heva mumunda wa Edeni. (Chiyambo 2:16,17) Yesu watenere kuti ndiyu wenga mungelu yo wangulongozga Ayisirayeli muchipululu ndipuso watenere kuti ndiyu yo akhumbikanga kuvwiya mazu ngaki.—Chituwa 23:20-23. a