KUKONKHOSKA MAVESI NGA MU BAYIBOLU

Aroma 10:13—“Kudaniya pa Zina la Ambuya”

JULANI

“Weyosi yo wadaniya pa zina laku Yehova wazamutaskika.”—Aroma 10:13, Bayibolu la Charu Chifya.

“Weyosi yo wazamudaniya pa zina la Ambuya wazamutaskika.”—Aroma 10:13, King James Version.

Vo Lemba la Aroma 10:13 Ling’anamuwa

Chiuta walivi sankhu, ndipu wapereka mwaŵi ku munthu weyosi kuti wazitaskiki ndi kusaniya umoyu wamuyaya kwali watuliya ku charu wuli, ngwa mtundu wuli, mukavu pamwenga wakukhupuka. Kweni kuti tiyanduwi ndi mwaŵi wenuwu, tikhumbika kudaniya pa zina laku Yehova lo ndi zina laki chayilu laku Chiuta Wanthazizosi. a—Salimo 83:18.

Mu Bayibolu, mazu ngakuti “kudaniya pa zina laku Yehova” ngang’anamuwa kuziŵa ŵaka zina laku Chiuta cha pamwenga kuligwiriskiya ntchitu pakusopa. (Salimo 116:12-14) Kweni ngang’anamuwa so kuthemba Chiuta ndi kulereska kwaku iyu kuti watiwovyi.—Salimo 20:7; 99:6.

Yesu Khristu wawonanga kuti zina laku Chiuta ndakukhumbika ukongwa. Mazu ngaki ngakwamba mu pempheru lakuwoniyapu ngenga ngakuti: “Awusefwi akuchanya, zina linu litoweseki,” pamwenga kuti lipaturiki. (Mateyu 6:9) Kuti tizisaniyi umoyu wamuyaya, Yesu wangulongo so kuti tikhumbika kumuziŵa, kumuvwiya kweniso kumuyanja mweneku wa zina lo tikamba kuti litoweseki.—Yohane 17:3, 6, 26.

Kumbi tiziŵa wuli kuti Yehova ndiyu “Ambuya” wo azumbulika pa Aroma 10:13 mu Bayibolu la King James Version? Tiziŵa chifukwa mazu nga pa vesi lenili ngakutoleka pa Yoweli 2:32, po mu Chiheberi chakali, zina chayilu laku Chiuta likugwiriskikiya ntchitu mumalu mwa zina la udindu lakuti “Ambuya.” b

Nkhani ya pa Aroma 10:13

Pa Aroma chaputala 10, Bayibolu lilongo kuti asani munthu wakhumba kuja pa ubwezi wamampha ndi Yehova, wakhumbika kuja ndi chivwanu mwaku Yesu Khristu. (Aroma 10:9) Fundu yeniyi yikoliyana ndi malemba nganandi ngo ngakuko mazu mu malemba ngo anyaki atiti Chipanganu Chakali. Munthu walongo kuti we ndi chivwanu asani “wapharazga pakweru” vo visazgapu kupharazga uthenga wamampha wa utaski ku ŵanthu ambula kugomezga. Venivi vitovya kuti ŵanthu aŵi ndi mwaŵi wakuja ndi chivwanu cho chilongozge ku umoyu.—Aroma 10:10, 14, 15, 17.

Ŵerengani Aroma chaputala 10 limoza ndi mazu ngamumphata kweniso malemba nganyaki ngo ngakoliyana ndi nkhani yeniyi.

a Zina laku Chiuta lisanirika maulendu ngakujumpha 7,000 mumipukutu yakali ya Bayibolu. Mu Chiheberi, zina laku Chiuta lingulembeka mu vilembu vinayi vo vimiya zina laki, ndipu mu Chitonga zina lenili lizumbulika kuti “Yehova,” kweni anyaki akamba kuti “Yahweh.”

b Viwoneke limu kuti ŵanthu wo angulemba Bayibolu la Malemba nga Chigiriki angugwiriskiya ntchitu Zina laku Chiuta pakuko mazu ku “Chipanganu Chakali” po pasanirika zina lenili. Buku linyaki likamba kuti: “Pe ukaboni unyaki wo ulongo kuti pa nyengu yo Bayibolu lalembekiyanga kakwamba, vilembu vinayi vo vimiya zina laku Chiuta lakuti Yahweh, venga mumalu nganyaki pamwenga mosi mo mazu ngaki ngakukoleka ku Chipanganu chakali.” (The Anchor Bible Dictionary, Volume 6, peji 392) Kuti muziŵi vinandi wonani mu Kabuku Kakusambiriya Mazu Ngaku Chiuta pamutu wakuti “Zina Laku Chiuta mu Malemba nga Chigiriki Ngachikhristu.”