“Utumbikengi awusu ndi anyoku, kuti uzije ndi umoyu utali mucharu cho Yehova Chiuta waku wakupaskengi.”—Ekisodo 20:12, Bayibolu la Charu Chifya.

 Chiuta wangulamula Ayisirayeli kuti akhumbika kutumbika apapi ŵawu. Kusazgapu pa marangu ngo Chiuta wanguŵapaska, iyu wanguŵakambiya so vo akhumbikanga kuchita kuti avwiyengi. Chinanga kuti marangu ngo Chiuta wangupaska Ayisirayeli ngo ngadanika kuti Dangu laku Mosese ngakuleka kugwira ntchitu, kweni fundu zaki zeche kugwira ntchitu kwa Akhristu.—Akolose 3:20.

 Ŵana ndipuso arara alongo kuti atumbika apapi ŵawu asani atiŵavwiya. (Levitiko 19:3; Nthanthi 1:8) Chinanga kuti ŵana angakuwa ndi kuja ndi mabanja ngawu, kweni alutirizga mbwenu kwanja apapi wawu kweniso kuŵawovya. Mwakuyeruzgiyapu, yiwu atesesa kuŵaphwere umampha apapi ŵawu asani akota ndipuso atiŵapaska ndalama.—Mateyu 15:4-6; 1 Timote 5:4, 8.

 Ziŵani kuti Ayisirayeli akhumbika kutumbika awusewu ndi anyinawu chifukwa cha udindu ukulu wo apapi ŵenawu mu banja (Nthanthi 6:20; 19:26) Mazuŵa nganu napu, ŵana nawu akhumbika kutumbika apapi ŵawu.

 Dangu lakuvwiya apapi lenga ndi mphaka. Ayisirayeli akhumbikanga cha kuvwiya apapi ŵawu pamwenga munthu munyaki weyosi asani atiŵakambiya kuti achiti vinthu vo vingachitiska kuti aleki kuvwiya Chiuta. (Dotoronome 13:6-8) Mwakuyana waka, Akhristu mazuŵa nganu ‘atenere kuvwiya Chiuta nge wakulamuliya kuluska ŵanthu.’—Machitidu 5:29.

 Dangu lo Chiuta wangupaska Ayisirayeli, lalongonga kuti asani ŵana atumbika apapi ŵawu ‘ajengi ndi umoyu utali kweniso . . . vinthu vatingi viŵayendiyengi umampha’ mucharu cho Chiuta waŵapaskengi. (Dotoronome 5:16) Ŵana ŵenaŵa atingi asuzgikengi cha chifukwa cha vo apapi ŵawu anguchita pakugarukiya dangu laku Chiuta. (Dotoronome 21:18-21) Fundu zo Chiuta wangupereka zikusintha cha. (Aefeso 6:1-3) Mwaviyo, kwali mbana pamwenga arara, tosi tikhumbika kuvwiya Mlengi widu. Kukamba uneneska, Chiuta walayizga ŵana wo atimuvwiya kweniso wo avwiya apapi ŵawu kuti ajengi ndi umoyu utali. Yiwu ŵe ndi chilindizga cha kuzija ndi umoyu wamuyaya.—1 Timote 4:8; 6:18, 19.

 Mu marangu 10, dangu la pa Ekisodo 20:12 le pamalu ngamampha ukongwa. (Ekisodo 20:1-17) Kuvuli kwa dangu lenili, kwe marangu ngakukwaskana ndi udindu wo Ayisirayeli ŵenga nawu kwaku Chiuta, nge dangu lakuti asopengi iyu pe. Kunthazi kwa dangu la kutumbika apapi kwe marangu ngakukwaskana ndi mo angachitiya ndi anyawu, nge dangu lakuti ajengi akugomezgeka ku munthu yo akutorana nayu ndipuso lakuti angabanga cha. Mwaviyo, dangu lakuti “utumbikengi awusu ndi anyoku” lichita nge ndi mtanthu pakati pa vigaŵa viŵi va marangu.