“Iyu wazamuleska masozi ngosi mumasu mwawu, ndipu nyifwa yazamuŵaku so cha. Kwazamuŵavi kuliya, kukuta pamwenga urwirwi. Vinthu vakali vatuwapu.”—Chivumbulutso 21:4, Bayibolu la Charu Chifya.

 “Ndipo waleskengeko sozi lose ku maso ghawo, ndi nyifwa kuti yikaŵangapo so cha; chingana nchitenje, chingana ndi nkhuta, chingana urwirwi, kuti vikaŵangapo so cha: chifukwa vyakudanga vyo vyarutapo.”—Chivumbuzi 21:4, Mazu Ghaku Chiuta.

 Chiuta wakulayizga kuti wazamutuzgapu waka urwirwi ndi masuzgu pe cha, kweni wazamutuzgapu so cho chitambisa vinthu venivi.

 “Iyu wazamuleska masozi ngosi mumasu mwawu.” Mazu yanga ngasimikiziya layizgu laku Yehova a lo likulembeka ndi mchimi Yesaya lakuti Iyu “wazamupuputa masozi pa visku vosi.” (Yesaya 25:8; Chivumbuzi 7:17) Mazu ngenanga ngalongo kuti Chiuta watiŵaŵanaŵaniya ukongwa ŵanthu wo aliya chifukwa cha nyifwa ya akwanjiwa ŵawu pamwenga chifukwa cha masuzgu nganyaki.

 “Nyifwa yazamuŵaku so cha.” Mazu yanga ngangafwatulikiya so kuti “nyifwa yazamusanilika so cha” pamwenga “nyifwa kwazamuŵavi.” Chiuta walayizga kuzituzgapu nyifwa pamwenga masuzgu ngo ngatuza chifukwa cha nyifwa. Kusazgiyapu penapa, kwazamuja chiyuka cha ŵanthu wo akufwa. (1 Akorinto 15:21, 22) Ndipu Bayibolu likamba kuti nyifwa “yazamutuzgikapu.”—1 Akorinto 15:26.

 “Kwazamuŵavi kuliya, kukuta pamwenga urwirwi.” Layizgu laku Chiuta lilongo kuti ŵanthu azamuleke limu cha kuvwa urwirwi nge wo munthu watuvwa asani wajipweteka. Mumalu mwaki, layizgu ili lilongo kuti kusuzgika maŵanaŵanu kweniso mumtima ko kuchitika chifukwa chakuti te akubuda b kweniso ambula kufikapu kwazamumala.—Aroma 8:21, 22.

 “Vinthu vakali vatuwapu.” Ngenanga ndi mazu ngakumaliya pa vesi ili ndipu ngalongo kuti vinthu vo ŵanthu akumana navu vazamusintha. Buku linyaki likamba kuti: “Vinthu vo ŵanthu akuziŵiriya kukumana navu pasonu panu nge nyifwa, kuliya kweniso urwirwi vazamumala ndipu ŵanthu azamuja ndi umoyu ufya.” Ŵanthu azamukondwa ndi umoyu wamuyaya pacharu chapasi penipanu nge mo Chiuta wakhumbiyanga pakwamba.—Genezesi 1:27, 28.

 Kukwambiriya kwa chaputala 21, wakutumika Yohane wangukonkhoska vo wanguwona kuti: “Ndinguwona kuchanya kufya ndi charu chapasi chifya.” (Chivumbuzi 21:1) Iyu wangugwiriskiya ntchitu mazu ngo ngang’anamuwa vinthu vinyaki kuti wakonkhoski mwakuvwika umampha vinthu vo vikukambikiya so limu mumavesi nganyaki nga Bayibolu. (Yesaya 65:17; 66:22; 2 Peturo 3:13) Boma lakuchanya laku Chiuta pamwenga kuti “kuchanya kufya” lazamusere mumalu mwa maboma ngosi nga ŵanthu ndipu boma lenili lazamulamuliya “charu chapasi chifya,” kung’anamuwa ŵanthu wo azamuja pacharu chapasi.—Yesaya 65:21-23.

 Kumbi ndi vinthu wuli vo vilongo kuti vo Yohane wanguwona vimiya umoyu wo ŵanthu azamuja nawu pacharu chapasi? Chakwamba, mu layizgu laku Chiuta mwe mazu ngakuti: “Hema laku Chiuta le pakati pa ŵanthu.” (Chivumbuzi 21:3) Mwaviyo, layizgu lenili likuperekeka kwa angelu cha kuchanya, kweni likuperekeka ku ŵanthu pacharu chapasi. Chachiŵi, mu chiwona ichi mwe mazu ngakuti “nyifwa yazamuŵaku so cha.” (Chivumbuzi 21:4) Kuchanya kulivi nyifwa, kweni ye pacharu chapasi pe po paja ŵanthu. (Aroma 5:14) Mwaviyo, mphakuvwika kukamba kuti vesi ili likamba za mo vinthu vazamuŵiya pacharu chapasi.

 Woneriyani ka vidiyo kafupi kuti muwoni vo ve mubuku la Chivumbuzi.