KUKONKHOSKA MAVESI NGA MU BAYIBOLU
Yeremiya 29:11—“Pakuti Ndiziŵa Umampha vo Nditikuŵanaŵaniyani”
“‘Pakuti ndiziŵa umampha vo nditikuŵanaŵaniyani,’ Yehova a ndiyu wakamba, ‘ndiŵanaŵana kuti ndikupaskeni chimangu, soka cha, kuti vinthu vizikuyendiyeni umampha kunthazi kweniso kuti muje ndi chilindizga chamampha.’”—Yeremiya 29:11, Bayibolu la Charu Chifya.
“‘Ini ndiziŵa umampha maŵanaŵanu ngo nde nangu paku yimwi,’ AMBUYA ndiwu akamba, ‘ndiŵanaŵana za chimangu mumalu mwakuŵanaŵaniya soka, kuti mulindizgengi vinthu vamampha kunthazi.’”—Yeremiya 29:11, New International Version.
Vo Lemba la Yeremiya 29:11 Ling’anamuwa
Yehova Chiuta wakulayizga ateŵeti ŵaki kuti azamuja mwachimangu kunthazi. Chinanga kuti mazu yanga ngakulembeka kali kweni Chiuta weche kungagwiriskiya ntchitu mpaka sonu. Iyu ndi “Chiuta yo wapereka chilindizga.” (Aroma 15:13) Ndichu chifukwa chaki vo wakulayizga vikulembeka mu Bayibolu kuti “tije ndi chilindizga” chamampha cha vinthu vo vazamuchitika kunthazi.—Aroma 15:4.
Nkhani ya pa Yeremiya 29:11
Nganyaki mwa mazu yanga ngangulembeka mukalata yo yinguluta kwa Ayisirayeli wo angutoleke ku ukapolu ku Babiloni. b (Yeremiya 29:1) Chiuta wangukambiya Ayisirayeli kuti akhumbika kuja ku ukapolu kwa nyengu yitali ndipu azengi zinyumba, alimi minda ndipuso kuja ndi mabanja ngawu. (Yeremiya 29:4-9) Chiuta wanguŵakambiya so kuti: “Asani vyaka 70 vo mujaliyengi ku Babiloni vakwana, ndazakukukumbukani, ndazamufiska vo ndikulayizga ndipu ndazakukuweziyani mumalu yanga.” (Yeremiya 29:10) Chiuta wanguŵasimikiziya kuti waŵaruwengi cha ndipuso vo wanguŵalayizga kuti aweriyengi kwawu vazamufiskika.—Yeremiya 31:16, 17.
Chiuta wangusunga layizgu lo wangupangana ndi Ayisirayeli. Nge mo uchimi ungukambiya, Babiloni wangubwangandulika ndi Fumu Sayirasi ya ku Peresiya. (Yesaya 45:1, 2; Yeremiya 51:30-32) Pavuli paki, Sayirasi wanguzomereza kuti Ayuda awere kwawu. Ndipu pati pajumpha vyaka 70 Ayuda anguwere kwawu ku Yerusalemu.—2 Mbiri 36:20-23; Ezara 3:1.
Malayizgu ngo Chiuta wangukamba pa Yeremiya 29:11 ngatitisimikiziya kuti iyu wafiskengi vo watilayizga. Ufumu waku Chiuta wazamujalikisa chimangu pacharu chosi ndipu ufumu wenuwu wazamulamulika ndi Khristu Yesu.—Salimo 37:10, 11, 29; Yesaya 55:11; Mateyu 6:10.
Fundu Zaboza Zakukwaskana ndi Lemba la Yeremiya 29:11
Fundu yaboza: Yehova wakunozge limu vo vazamuchitikiya munthu weyosi.
Fundu yauneneska: Chiuta wakhumba kuti taŵanthu tisankhengi tija vo tikhumba kuchita. Mazu nga pa Yeremiya 29:11 ngo Chiuta wangukamba ngangulembeke Ayisirayeli wo ŵenga ku Babiloni ndipu wakhumbanga kuti gulu lenili kunthazi lizije mwachimangu. (Yeremiya 29:4) Mumalu mwaki, Chiuta wazomereza munthu weyosi kusankha kuziyanduwa ndi vo wakutilayizga pamwenga cha. (Dotoronome 30:19, 20; Yeremiya 29:32) Ŵanthu wo apenja Chiuta atimupenja ndi mtima wosi kuziya mupempheru.—Yeremiya 29:12, 13.
Fundu yaboza: Chiuta wapaska ateŵeti ŵaki chuma.
Fundu yauneneska: Mazu ngakuti “kupaska” ngo ngasanirika mu ma Bayibolu nganyaki pa Yeremiya 29:11 muchiheberi akungafwatuliya kuti “chimangu ndi likondwa.” Mwakukoliyana ndi nkhani iyi, Chiuta wangulayizga Ayisirayeli kuti waŵapaskengi chuma cha, kweni waŵapaskengi chimangu ndipuso umoyu wamampha. Yiwu alutirizengi kuja ndi umoyu ndipu zuŵa linyaki azamuwere ku Yerusalemu.—Yeremiya 29:4-10.
Ŵerengani Yeremiya chaputala 29 limoza ndi malemba nganyaki ngo ngakoliyana ndi nkhani yeniyi, vithuzi ndipuso mapu.
a Yehova ndilu zina laku Chiuta.—Salimo 83:18.
b Mwakukoliyana ndi Yeremiya 29:11, buku linyaki lingukamba kuti: “Ili ndimoza mwa Malayizgu ngakukondweska ukongwa ngo ngasanirika mu Bayibolu ngo ngalongo kuti Yehova wanguŵachitiya lisungu ŵanthu wo ŵenga ku ukapolu ndipu pakumaliya paki wanguŵawovya kuja ndi maŵanaŵanu ngakwenere kweniso kuja ndi chilindizga chamampha.”—The Expositor’s Bible Commentary Volume 7, peji 360
Mungayanja Kuŵerenga so Nkhani Izi
ESSENTIAL BIBLE TEACHINGS
Kumbi Ufumu Waku Chiuta Ntchinthu Wuli?
Pa nyengu ya uteŵeti waki Yesu wasambizanga ukongwa za Ufumu waku Chiuta kuluska nkhani yinyaki yeyosi. Kwa vyaka vinandi akusambira ŵaki nawu apempheranga ukongwa kuti Ufumu waku Chiuta uzi.
KUKONKHOSKA MAVESI NGA MU BAYIBOLU
Kukonkhoska lemba la Aroma 15:13—“Chiuta yo Wapereka Chilindizga, Wakuzazeni ndi Likondwa Likulu Kweniso Chimangu”
Kumbi chimangu ndi, likondwa likulu vikoliyana wuli ndi chilindizga kweniso “mzimu wakupaturika?
MAFUMBU NGO BAYIBOLU LIMUKA
Kumbi mu Bayibolu mwe Fundu zo Zingandipembuzga?
Mavesi nga mu Bayibolu ngapembuzgapu ŵanthu anandi wo akumanapu ndi masuzgu ngakulu kweniso kusuzgika maŵanaŵannu.
VO BAYIBOLU LISAMBIZA
Vidya vo Vingakuwovyani Pakusambira Bayibolu
Sankhani mabuku ngo ngangakuwovyani kuti musambirengi Bayibolu munthowa yakuyandulisa kweniso yakukondwesa.
VO BAYIBOLU LISAMBIZA
Yesesani Kusambira Bayibolu
Sambirani Bayibolu kwawezi ndi munthu yo wakusambizeningi.
