“Ndakukambiyani venivi kuti kuporote mwaku ini muŵi ndi chimangu. Mukumanengi ndi masuzgu mucharu, kweni khwimani mtima! Ini ndachithereska charu.”—Yohane 16:33, Bayibolu la Charu Chifya.

 “Ndakukambiyani vyenivi, alinga kuti mwaku ine muŵe ndi chimangu, mu charu mwe ndi suzgu: kweni khwimani mtima; ine ndachipunda charu.”—Yohane 16:33, Mazu Ghaku Chiuta

 Pakukamba mazu yanga, Yesu wanguŵasimikiziya akusambira ŵaki kuti nawu angafiska kukondwesa Chiuta chinanga kuti akumana ndi mayeseru kweniso asani ŵanthu atiŵasuska.

 “Ndakukambiyani venivi kuti kuporote mwaku ini a muŵi ndi chimangu.” Vesi losi lenili lilongo kuti chimangu chenichi ching’anamuwa cha kuti munthu walekengi kukumana ndi masuzgu pa umoyu waki. Mumalu mwaki ntchimangu cha mu mtima ndipuso mumaŵanaŵanu. Munthu waja ndi chimangu cha mumtima chenichi “kuziya mwaku” Yesu, yo wakulayizga kuti watumizengi mzimu wakupatulika. “Wakovya” wanthazi mwenuyu watingi wawovyengi akusambira aku Yesu kumalana ndi masuzgu ngengosi ngo angakumana nangu.—Yohane 14:16, 26, 27.

 “Mukumanengi ndi masuzgu mucharu, kweni khwimani mtima!” Yesu waneneskanga ndipu wangukambiya akusambira ŵaki kuti akumanengi ndi masuzgu nge vinthu vambula urunji ndipuso kutombombozgeka. (Mateyu 24:9; 2 Timote 3:12) Kweni, yiwu ŵe ndi chifukwa chakujaliya ndi chiganga.—Yohane 16:33.

 “Ini ndachithereska charu.” Yapa, mazu ngakuti “charu” ngakamba va ŵanthu wo angaja cha paubwezi ndi Chiuta. b Lemba la 1 Yohane 5:19 likamba kuti: “Charu chosi che mu nthazi ya muheni yo,” pamwenga Satana. Mwaviyo ŵanthu a “mucharu” ichi, aŵanaŵana kweniso kuchita vinthu vo vileka kukondwesa Chiuta.—1 Yohane 2:15-17.

 Satana ndi charu chaki anguyeyesa kumutondekesa Yesu kuchita khumbu laku Chiuta. Ndipu venivi vasazgangapu vo Yesu wasambizanga vakukwaskana ndi Chiuta ndipuso kupereka umoyu waki nge sembi. (Mateyu 20:28; Luka 4:13; Yohane 18:37) Kweni Yesu wanguzomereza cha kuti vakuchitika va mucharu vitimbanyizgi maŵanaŵanu ngaki ndi kuleka kukondwesa Chiuta. Iyu wangulutirizga kuja wakugomezgeka mpaka nyifwa yaki. Ndichu chifukwa chaki Yesu wangukamba kuti wachithereska charu kweniso kuti Satana ndiyu “wakulamuliya wa charu chosi,” ndipu walivi mazaza paku iyu.—Yohane 14:30.

 Yesu wangugwiriskiya ntchitu chakuwoniyapu chaki kuti waŵawovyi akusambira ŵaki kuziŵa kuti nawuso angalutiizga kuja akugomezgeka kwaku Chiuta chinanga kuti Satana ndi charu chaki wangayesa kuti yiwu aleki kuja akugomezgeka. Yapa, Yesu wakambanga kuti: “Asani ini ndingachithereska charu namwi mungafiska.”

 Yesu wangukamba mazu yanga usiku wakuti wafwengi mawa laki. Pakuziŵa kuti wafwengi, iyu wangugwiriskiya ntchitu mwaŵi wo wenga nawu kuti wapereki ulongozgi kwa akusambira ŵaki akugomezgeka. Iyu wanguŵakambiya fundu zinyaki zo akhumbikanga kuziŵanaŵaniya mwakuphwere. Yiwu atingi amuwonengi so cha ndipu atingi abayikengi ndipuso kutombozgeka. (Yohane 15:20; 16:2, 10) Chifukwa chakuti venivi vatingi vichitiskengi mantha akutumika ŵaki, Yesu wangumaliza ndi mazu nga pa Yohane 16:33 kuti waŵachiski kweniso kuŵasimikiziya.

 Mazu ngo Yesu wangukamba kweniso chakuwoniyapu chaki chingawovya akusambira ŵaki mazuŵa nganu. Akhristu wosi angalutirizga kuja akugomezgeka kwaku Chiuta chinanga kuti akumana ndi mayeseru.