Dzipari nya lisine dzi ngu tumbega. Gufana ni nongo wa vbafuvbi, idzo dzi ngu tumbega nigu dzi ngu khataleya gwadi vambe, ngudzu-ngudzu dziteponi nya sigaradzo.

 “Iyo yi gu pari yi ngu gu gola gikhati gyatshavbo.” Malito yaya ma nga tshamuseya gu khayo “dzipari dzitepo dzatshavbo dzi ngu yeyedza lihaladzo.” Lito nya Gihebheru li gu khilo “lihaladzo” li thumisidwego avba, lo pata nya singi guvbindra edzi muthu a dzipwago khidzo. La gu thula lihaladzo li yeyedzwago khu gu dzina ni sigiro khu muthu nyo khaguri. (1 Vakorinto 13:4-7) Dzipari dzi gu na ni lihaladzo lolo kha dzi dzumeleyi gu khidzo wupari wadzo wu vbeya khu kotani nya gu mba pwanana ni sigaradzo nya womi. Avo gambe va ngu divaleyana khu gyawe. (Mavingu 10:12) Nigu pari yoyo kha yi pweyi lidiwo tepo khiyo pari yaye yi dugeleyago womini. Ganiolu, ya gu tsaka nayo. — Varoma 12:15.

 “Iyo yi gu pari . . . gikhatini nya wuvi, ya gu khala ndriyago.” Livingu leli la gu yeyedza gu khilo vandriye va nga manega ni wupari wa vbafuvbi. Tepo hi girago satshavbo hi si kodzago gasi gu phasa pari yathu yi emisanago ni giemo nyo garadze, ethu ha gu gira esi si nga hadzi gu girwa khu vandriye nya lisine. Gu diga isoso, wupari wu gu na ni dzipari kha wu vboli khu kotani nya silingo. Wulangani nya isoso, la gu engedzeya gu tiya khu kotani nya lihaladzo ni githawo.

 Libhuku la Mavingu li na ni guti gu tshamusedwago khu ndziya nya gu vbevbugi li girago muleri a pimisa. Pfhumu Solomoni lovide gipandre nya gikhongolo nya libhuku leli nya Bhibhiliya. Idzo li nga lowa khidzo libhuku leli lo gira khatshi poweziya nya Gihebheru, wulangani nya gu thumise dzirima la gu thumisa mapimo nyo fane ni ayo nyo hambane nigu linya nyo khaguri yi nga pwanana ni yimbe mwendro gu hambana. Mavingu 17:17 giyeyedzo nya poweziya nyo fane, kholu gipandre nya wuvili gya gu dzi seketeya ga gipandre nya gupheye. Mavingu 18:24 giyeyedzo nya mapimo nyo hambane. “Uye a vbwetago dzipari nya dzingi a gu dzi vbwetela libango, aholu dzomo dzipari dzi tumbegago guvbindra ndriyago.”

 Tepo a nga lova Mavingu 17:17, Solomoni adzina saye a di gu dundrugeya khu wupari wu nga ba wuri ni papayi waye Dhavhidhe ni Jonatane, gyanana gya Pfhumu Sawule. (1 Samuweli 13:16; 18:1; 19:1-3; 20:30-34, 41, 42; 23:16-18) Ambari olu Dhavhidhe ni Jonatane va nga ba va siri valongo, avo va diri ni wupari nya gutiye nga vandriye nya lisine. Jonatane a vegide womi waye mhangoni khu kotani nya pari yaye. a

 “Iyo yi gu pari yi ngu gu gola dzitepo dzatshavbo ni gu khala ndriye dziteponi nya wuvi.” — The Bible in Basic English.

 “Pari dzitepo dzatshavbo pari, iyo ya gu khala ndriyago dziteponi nya sigaradzo.” — The Moffatt Translation of the Bible.

 “Pari yi ngu yeyedza wupari wayo dzitepo dzatshavbo, sigaradzoni iyo ya gu khala ndriyago.” — The Complete Jewish Study Bible.

 Wona vhidhyu nyo role gasi gu pwisisa gwadi libhuku la Mavingu.