“[Jehovha] a na gu kategise a gu vhikela; [Jehovha] a na ngangamedzise khovbe yaye avbo gwago a gu pwela wuhindzi; [Jehovha] a na thendregedze khovbe yaye avbo gwago, a gu ninge gurula.” — Mitengo 6:24-26. Tradução do Novo Mundo

 “Pfhumu Nungungulu a na gu kategise a gu vhikela; Pfhumu Nungungulu a na ngangamedzise khovbe yaye avbo gwago a gu pwela wuhindzi; Pfhumu Nungungulu a na thendregedze khovbe yaye avbo gwago, a gu ninge gurula.” — Mitengo 6:24-26. Wuvbindrugedzeyi wa Rei-Jaime

 Malito yaya ma gu tidwa kha nga makategwa nya muprista Aroni, kha nga olu Aroni a nga pheya khuye gu khala Muprista nya khongolo. (Ekisodha 28:1) Nungungulu, khuye gifefe nya makategwa yaya. (Mitengo 6:22, 23) Embede Mosi gu khuye: “Embela Aroni ni sanana saye, khuwe: ‘Mu na kategisa sanana sa Israyeli,’” Nungungulu na si gu ganeyi malito hi ma manago ga Mitengo 6:24-26. Vapristi nya gutumbege va engiside nayo wowu wa Nungungulu. Avo va di gu ninga githawo lina la Nungungulu, Jehovha. a Omu nya livhesi 27 ha gu hevbula gu khethu: “Khu guralo, [Muprista a] na rana Lina langu vbatshani ga sanana sa Israyeli, Eni nyi na va kategisa.”

 “[Jehovha] a na gu kategise a gu vhikela.” Jehovha a ngu kategisa vakhozeyi vaye, a va vhikeya, a va thangeya ni gu va gira va tsaka. (Mavingu 10:22) Ga Mitengo 6:24-26 lito li nga vbindrugedzedwa “a na” la gu thula muthu moyo basi. Isoso sa gu yeyedza gu dogoreya ga Nungungulu nya gu kategise vatshavbo Vaisrayeli khu moyo ni moyo.

 “[Jehovha] a na ngangamedzise khovbe yaye avbo gwago a gu pwela wuhindzi.” Gu lomba Nungungulu a “ngangamedzisa khovbe yaye” ga muthu nyo khaguri, gu diri gilombo gasi gu Nungungulu a mu yeyedza wuhindzi ni gu khuye a ngu mu tsakeya. b Malito yaya ma nga vbindrugedzedwa gambe gu khayo: “Pfhumu a na gu tsakeye.” (Mitengo 6:25, Nova Versão Internacional do Leitor) Jehovha a ngu kategisa sithumi saye khu gu si yeyedza wuwadi, pweya-wusiwana ni wuhindzi. — Isaya 30:18.

 “[Jehovha] c a na thendregedze khovbe yaye avbo gwago, a gu ninge gurula.” Jehovha a gu “thendregedza khovbe” ga vakhozeyi vaye gasi gu va yeyedza lihaladzo ni gu va ninga gurula. Guya khu referesiya nyo khaguri, “lito nya gihebheru ligu khilo gurula (shalom) kha li thuli basi gu hamugega nya mayunga, ganiolu la gu thula gambe gudzipwa gwadi khu nyamani ni gu manega ni wupari nya wadi ni Jehovha.”

 Gasi Vaisrayeli va wuyedwa khu makategwa ma sasamedzidwego omu nya mavhesi yaya, va di yede gu engisa Jehovha. (Levhi 26:3-6, 9) Uye a va phaside kha nga olu a nga va tumbisa. Isoso si giregide ndrani nya mufumo nya dzipfhumu nyo khaguri nya nga Solomoni ni Ezekhiya. — 1 Dzipfhumu 4:20, 25; 2 Dzikoronika 31:9, 10.

 Ambari olu Makristo ma gu mba sasamedzeya makategwa ma ma manago, ayo ma nga ganeya makategwa yoyo tepo ma gombeyago ga Nungungulu ni gu tiyisa vambe. (1 Vatesalonika 5:11, 25) Jehovha kha vbindrugedza. Uye a ngu dzina gu kategisa ni gu vhikeya sithumi saye nyo tumbege. Makristo nya lisine ma nga mana gurula kholu ma ngu dziti gu khayo Jehovha thendregedzide “khovbe” yaye gwawo.

 10 sipimo nyo pheye nya libhuku la Mitengo la gu ganeya khu sileletelo esi Jehovha nga ninga Vaisrayeli na va gu romo vbafuvbi ni gigomo gya sinayi na va gu hongola Tigoni nya Gitumbiso. Na va gu romo gigomoni gya Sinayi khu tanga nya mwaga moyo, Jehovha a di sasamedza vathu vaye kha nga litigo ni gu a di va ninga milayo.

 Jehovha a embede gambe Mosi edzi Aroni gumogo ni sanana saye si nga hathwa kha nga vaprista edzi va nga ba va yede gu kategisa khidzo Vaisrayeli. (Mitengo 6:22, 23) Hwane nya isoso, Aroni ni situgulwana saye va thumiside malito ma gu romo omu ga Mitengo 6:24-26 gasi gu kategisa Vaisrayeli. Khu gu gimbiya nya tepo, gu di khala giolovedzo gu muprista a ganeya makategwa guhegisani nya muphaso nya litshigu ni litshigu tempeleni.

 Wona vidhyo nyo role nya mabelelo nya libhuku la Mitengo.