“Mana litsako avbo ga Jehovha, uye a na tadzisa gudogoreya nya monyo wago.” — Ndzimo 37:4, Tradução do Novo Mundo.

 “Vega ga Pfhumu . . . gutsaka gwago, uye a na gu ninga gugola nya monyo wago.” — Ndzimo 37:4, Versão padrão em inglês.

 Muembi nya dzindzimo a gu kutsa vale va khozeyago Jehovha gu mana litsako ni gu manega ni wupari nyo tiye ni Jehovha. Avo va manegago ni wupari wowo va ngu tiyisega gu khavo Jehovha a Nungungulu a na tadzisa gudogoreya gwawe gwatshavbo.

 “Mana litsako avbo ga Jehovha.” Lito leli gambe li nga vbindrugedzedwa gu pwani “mana litsako ga Jehovha, tsaka khu gu thumeya Pfhumu” mwendro “tsaka khesi Pfhumu yi gu tumbisidego.” Khu gu piya, hi yede gu mana litsako khu gu khozeya Nungungulu nya lisine. (Ndzimo 37:4) Khu ginani hi ganeyago isoso?

 Vale va khozeyago Jehovha va gu wona silo guya khedzi uye a si wonago khidzo, kha nga edzi Bhibhiliya yi ganeyago. Avo kha vati basi Nungungulu, ganiolu va na ni guti gasi va mu engisa. Kha nga wuyelo wakona, va ngu simama ni livhalo li agidego nigu va ngu potsa gu gira silo nyo vivbe ni gu hunga makungo nya mba yadi. (Mavingu 3:5, 6) Khu giyeyedzo, avo kha va pweyi lidiwo tepo vathu nya guvivbedwe khu monyo mwendro va gu mba engisa va wonegago na va gu dugeleya. (Ndzimo 37:1, 7-9) Vathu va Nungungulu va ngu tsaka khu gu dziti gu khavo nya mba hweya gu mba lulama gwatshavbo gu na vbeya nigu va nya gu lulama va na kategiswa khu kotani nya mavbanyelo yawe nya yadi. (Ndzimo 37:34) Avo gambe va ngu tsaka ngudzu khu gu dziti gu khavo Papayi wawe a gomogo ndzadzini a ngu va tsakeya. — Ndzimo 5:12; Mavingu 27:11.

 “Uye a na gu ninga gugola nya monyo wago.” Malito yaya ma nga vbindrugedzedwa gu pwani “uye a na hlamula milombelo yago” mwendro “uye a na gu ninga satshavbo u si vbwetago.” Lisine gu Jehovha kha na nga hlamula yatshavbo milombelo. Gu fana ni papayi nya wadi, Jehovha a ngu siti esi si gu tshukwana ga sanana saye. Vbavbandze nya isoso, esi hi lombago gu pata ni mavbanyelo yathu, si yede gu pwanana ni milayo ni gugola gwaye. (Mavingu 28:9; Jakobe 4:3; 1 Johane 5:14) Ha gu gira isoso, hi na hidzimeya ga ‘muengiseyi nya milombelo’ na hi gu tumba gu khethu uye a na hipwa. — Ndzimo 65:2; Matewu 21:22.

 Ndzimo 37 yi lovidwe khu pfhumu Dhavhidhe wa Israyeli wa gale. Uye a lovide ndzimo yeyi khu gu landra alfabeto. b

 Dhavhidhe pharidwe khu ndziya nya mba lulama dzitepo nya dzingi. Vbwetedzedwe khu Pfhumu Sawule ni vambe gasi gu mu songa. (2 Samuweli 22:1) Ambari ulolo, Dhavhidhe tepo yatshavbo tumbide Jehovha. Nigu uye gambe a di gu dziti gu khuye Jehovha a di hadzi gu hegisa khu gu tshanisa vathu nya guvivbe. (Ndzimo 37:10, 11) Nigu ambari va gu wonega na va gu dugeleya, kha nga “mwasi nya gunyuge”, va na hegisa khu gu mwalalega. — Ndzimo 37:2, 20, 35, 36.

 Ndzimo 37 a gu yeyedza gu hambana gu gomogo ga vale va landrago ndziya ya Jehovha ni vale va gu mba yi landra. (Ndzimo 37:16, 17, 21, 22, 27, 28) Libhuku la Ndzimo, li ngu hi phasa gu mana guti ni gu khala vathu ava Jehovha a va vbwetago.

 Wona vhidhyu yeyi gasi guti esi libhuku la Ndzimo li ganeyago.