“Nyi ninge u bwe u dziti gu khuwe eni kheni Nungungulu. Nyi na khusedzwa vbakari nya mayigo nyi bwe nyi khusedzwa mafuni.” — Ndzimo 46:10, Tradução do Novo Mundo.

 “Rulani, mu dzitini gukhenu: Eni nyi Nungungulu nyi guromo vbatshani nyi ngu khusedzwa vbakari nya mayigo, nyi ngu zundzwa khu litigo.” — Ndzimo 46:10, Versão Rei Jaime.

 Nungungulu a ngu kutsa vatshavbo gu khozeya uye basi ni gu bwe va dziti gu khavo uye khuye a ninganedwago khu gu fumeya litigo latshavbo. Wudhumo ni wuzundzu waye kha si bombwi, si thulago gu khiso wule a vbwetago gu vbanya kala gupindruga gu vbwetega a dziti gu khuye Uye khuye nya tshivba yatshavbo. — Gutuledwa 4:11.

 “Nyi ninge u bwe u dziti gu khuwe eni kheni Nungungulu.” Wumbe wuvbindrugedzeyi wa gu vbindrugedzeya malito nya gu pheye khu malito ma gu khayo “degula.” Isoso si ngu gira gu vambe va si si pwisisi gwadi, va pimisa gu khavo nayo wu gomogo tshetsheni wu rumago vatshavbo gu degula. Ganiolu, malito yaya nya Gihebheru ma nga vbindrugedzedwa pwani “nyi ninge u bwe u dziti gu khuwe eni kheni Nungungulu,” malito ya Jehovha a Nungungulu a kutsago vathu nya mafumbo yatshavbo gu ema gu mu wugeya ni gu bwe va dziti gu khavo uye khuye basi a yelago gu khozedwa.

 Khayo malito ya mamowo hi ma manago omu ga Ndzimo 2. Omu nya gipimo gegi, Nungungulu a gu tumbisa gu wugeya vale va mu wugeyago. Ganiolu, vale va ningago githawo wudhumo wa Nungungulu, va gu tumba uye gasi gu va ninga sileletelo, tshivba ni guti. “Vale va thavelago gwaye,” va ngu tsaka nigu va ngu dziti gu khavo va na thaveledwa dzitepo nya sigaradzo. — Ndzimo 2:9-12.

 “Nyi na khusedzwa vbakari nya mayigo nyi bwe nyi khusedzwa mafuni.” Gale, Nungungulu a di gu khusedzwa tepo a nga ba a thumisa tshivba yaye gasi gu vhikeya vathu vaye. (Ekisodha 15:1-3) Mindru wa tshigu, uye a na khusedzwa tepo vatshavbo mafuni va na mu engisago ni gu mu khozeya. — Ndzimo 86:9, 10; Isaya 2:11.

 Referensiya mweyo na yi gu thula Ndzimo 46 yari, khiyo “ndzimo nya gu ganeye khu tshivba ya Nungungulu, muvhikeyi nya tshivba nya vathu vaye.” Tepo va nga emba Ndzimo 46, vathu va Nungungulu va di gu ganeya edzi va nga ba va tumba khidzo tshivba ya Jehovha nya gu va vhikeye ni gu va phasa. (Ndzimo 46:1, 2) Malito yayo ma di gu va dundrugisa gu khavo Nungungulu tepo yatshavbo a navo. — Ndzimo 46:7, 11.

 Gasi gu tiyisa gukhodwa gwawe avbo nya tshivba nyo vhikeye ya Jehovha, muembi nya dzindzimo a di va kutsa gu dundrugeya khu silo si giridwego khu Jehovha. (Ndzimo 46:8) Nigu gambe, a va kutside gu dundrugeya khu tshivba a gu nayo nya gu vbedze nyimbi. (Ndzimo 46:9) Khu lisine, Jehovha a vbedzide nyimbi dziteponi nya Bhibhiliya ni gu vhikeya vathu vaye ga valala vawe. Ambari ulolo, Bhibhiliya yi ngu tumbisa gu khiyo Jehovha a na si gira gambe khu ndziya nya yikhongolo tepo a na vbedzago dzinyimbi mafuni gwatshavbo. — Isaya 2:4.

 Ina Jehovha a nga gu phasa vale va mu khozeyago muhuno? Ina. Khigyo gighelo gi giridego mupostoli Pawulo a kutsa Makristo gu tumba Jehovha ma gu ba ma vbweta giphaso. (Vahebheru 13:6) Malito hi ma manago omu ga Ndzimo 46 ma ngu tiyisa gutumba gwathu avbo nya tshivba nyo vhikeye ya Nungungulu. Ma gu hi phasa gu wona Nungungulu kha nga “wuthavelo ni likhokhola lathu.” — Ndzimo 46:1.

 Sixitiri vhidhyu yeyi gasi u wona esi libhuku la Dzindzimo li ganeyago.