Ina Nungungulu womo malanga yatshavbo khu gumogo?
Hlamulo nya Bhibhiliya
Nungungulu a na ni makodzelo nya gu wone satshavbo. Uye gambe a nga gira ni gevbini a gi vbwetago, ga wevbini wulanga. (Mavingu 15:3; Vahebheru 4:13) Ambari ulolo, Bhibhiliya kha yi hevbudze gu khiyo Nungungulu womo malanga yatshavbo khu gumogo. Vbavbandze nya isoso, yo yeyedza gu khiyo uye muthu nigu womo wulanga a khalago umo.
Edzi Nungungulu a khadego khidzo: Nungungulu Liphuvbo. (Johane 4:24) Mwalo muthu a wonidego Nungungulu. (Johane 1:18) Siwoniso sa Nungungulu si lovidwego omu nya Bhibhiliya so yeyedza gu khiso uye a di gu romo ga wulanga mowo, kha si yeyedzi gu khiso Nungungulu womo malanga nya mangi khu gumogo. — Isaya 6:1, 2; Gutuledwa 4:2, 3, 8.
Omu Nungungulu a khalago umo: Nungungulu o khala ga wulanga owu hi si kodzigo gu wu wona. Gu hambana ni omu vathu hi vbanyago umo, Nungungulu o khala “ndzadzini.” (1 Dzipfhumu 8:30) Bhibhiliya yo ganeya khu tepo eyi dzingilozi dzi nga “dzi wonegisa mbeli ga [Jehovha],” a si yeyedzago gu khiso gu na ni wulanga owu Nungungulu a vbanyago umo. — Joba 1:6.
Abari gu Nungungulu mwalo ga malanga yatshavbo khu gumogo, ina Uye a nga si kodza gu nyi khataleya?
Ina. Nungungulu a ngu khatala ngudzu khu moyo ni moyo wathu. Ambari olu a vbanyago ga wulanga hi gu mba si kodza gu wu wona, Uye a ngu wona vathu vatshavbo va vbwetago gu mu tsakisa khu lisine. (1 Dzipfhumu 8:39; 2 Dzikoronika 16:9) Wona edzi Jehovha a khatalago khidzo khu vathu vaye va mu khozeyago khu lisine:
Tepo u gombeyago: Tepo yatshavbo Nungungulu a ngu engiseya milombelo yago. — 2 Dzikoronika 18:31.
Tepo u garadzegago: “[Jehovha] womo vbafuvbi ga vale myonyo yawe yi vbisegago, a vbanyisa avo mihefemulo yawe yi khuvekidego.” — Ndzimo 34:18.
Wa gu vbweta gu yeyedzwa ndziya: Jehovha o ganeya gu khuye: “Nyi na gu hevbudza nyi gu nonedza ndzila u na yi landrago,” khu gu thumisa Lito laye, Bhibhiliya. — Ndzimo 32:8.
Malipha ma gu khayo Nungungulu womo malanga yatshavbo khu gumogo.
Malipha: Nungungulu womo ga satshavbo silo a si vangidego.
Lisine: Nungungulu kha vbanyi mafuni ambari ga silo a si vangidego. (1 Dzipfhumu 8:27) Lisine gu dzinyeledzi ni simbe sivangwa so “tivisa wudhumo wa Nungungulu.” (Ndzimo 19:1) Pintori kha vbanyi ga esi a si pintaridego, ganiolu dzikwadru dzaye dzi ngu hi embeya gilogyo maningano khuye. Khu ndziya nya gu fane, Nungungulu kha vbanye ga sivangwa saye. Ambari ulolo, esi a si vangidego si nga hevbudza silo nya singi maningano ni “makhalelo yaye hi si kodzigo gu ma wona,” tshivba yaye, guti ni lihaladzo. — Varoma 1:20.
Malipha: Nungungulu womo malanga yatshavbo khu gumogo gasi guti silo satshavbo ni gu yeyedza tshivba yaye.
Lisine: Liphuvbo nya guage la Nungungulu, tshivba eyi Nungungulu a yi thumisago. Khu gu thumisa liphuvbo nya guage, Nungungulu a nga wona ni gu gira ni gevbini gilo ga wevbini wulanga, na si si hungi gu a manega ga malanga yoyo. — Ndzimo 139:7.
Malipha: Libhuku la Ndzimo 139:8 la gu hi hevbudza gu khilo Nungungulu womo malanga yatshavbo khu gumogo, khu gu ganeya gu khilo: “Nya gu gwela ndzadzini, uwe u womo iyoyo, nya gu reIeIa tigoni nya vafi, uwe u womo iyoyo gambe.”
Lisine: Lowu wowu kha wu ganeyi khomu Nungungulu a khalago umo. Ganiolu wo hi hevbudza gu khuwo gu mwalo wulanga ambari na gu ri hwindzo owu Nungungulu a nga tandregago gu hi phasa.
a Jehovha lina la Nungungulu li gu romo omu nya Bhibhiliya.
You May Also Like
MIHLAMULO NYA SIWUDZISO NYA BHIBHILIYA
Ginani liphuvbo nya guage?
Khu gighelo nyo khaguri, Bhibhiliya yo yeyedza gu khiyo liphuvbo nya guage “mandza” ya Nungungulu.
MIHLAMULO NYA SIWUDZISO NYA BHIBHILIYA
Ina Nungungulu a na nyi phasa nyo gombeya?
Ina kamo Nungungulu a ngu si wona sigaradzo sathu?
KHETHU VAMANI
Lomba gihevbulo nya Bhibhiliya
Bhulani khu giwudziso nyo khaguri nya Bhibhiliya, mwendro mu hevbula uti simbe khu Dzifakazi dza Jehovha.