Ahihi. Watshavbo wukhongeyi kha wu fani. Bhibhiliya yi na ni siyeyedzo nya wukhongeyi wu gu mba tsakisa Nungungulu. Hi nga wu kabanisa khu sipandre sivili.

Gipandre 1: Wukhongeyi gu khozedwago vanungungulu nya malipha

 Bhibhiliya ya gu tshamuseya wukhozeyi nya vanungungulu nya malipha nga gilo “nya mba phasa.” (Jeremiya 10:3-5; 16:19, 20) Jehovha a Nungungulu a di embeya Israyeli wa gale gu khuye: “U nga manegi nuri ni vambe vanungungulu mbeli gwangu.” (Ekisodha 20:3, 23; 23:24) Tepo Vaisrayeli va nga ba va khozeya vambe vanungungulu, Jehovha a di gu ‘goroga.’ — Mitengo 25:3; Levhi 20:2; Valamuli 2:13, 14.

 Nungungulu a nga gu dzipwa khu ndziya yayimweyo maningano ni “avo va ranwago gu pwani vanungungulu.” (1 Vakorinto 8:5, 6; Vagalatiya 4:8) Uye a gu vbweta gu khuwe vale va mu khozeyago, va diga gu dzi tshanganisa ni vale va gomogo omu nya wukhongeyi nya malipha, khu gu ganeya gu khuye: “Dugani khu vbakari gwawe, dzi hambaniseni navo.” (2 Vakorinto 6:14-17) Nari khatshi watshavbo wukhongeyi wu di gu fana nigu wu di gu phasa vathu gu hidzimeya ga Nungungulu, khu ginani Nungungulu a nga hadzi gu ganeya esi?

Gipandre 2: Gu khozeya Nungungulu nya lisine, ganiolu khu ndziya yi gu mba mu tsakisa

 Dzimbe dzitepo, Vaisrayeli va di gu khozeya Nungungulu khu gu thumisa sihena ni simbe silo si girwago omu nya wukhozeyi nya vanungungulu nya malipha, ganiolu Jehovha kha si dzumeya isoso gu va patedzeya wukhongeyi. (Ekisodha 32:8; Dhewuteronome 12:2-4) Jesu a tiviside vathangeyi nya wukhongeyi maningano ni litshigu laye, khu kotani nya edzi va nga ba va khozeya khidzo Nungungulu. Avo va di gu pfhadzedzeya va “si theyi kota khu silo nya lisima ngudzu nya Nayo, a gu: Gululama, wuhindzi ni gutumbega.” — Matewu 23:23.

 Khu ndziya nya fane, muhuno, wukhozeyi nya lisine khuwo basi wu phasago vathu gu hidzimeya ga Nungungulu. Lisine lolo ha gu li mana omu nya Bhibhiliya. (Johane 4:24; 17:17; 2 Thimoti 3:16, 17) Wukhozeyi wu hevbudzago silo si dwanisanago ni esi Bhibhiliya yi si hevbudzago, khu lisine wa gu dzimedza vathu hwindzo ni Nungungulu. Khu lisine, sihevbudzo nya singi esi vathu va pimisago gu khavo sa guta khomu nya Bhibhiliya, si patago Vararu-moyo, liphuvbo nya gu mbafa ni gu tshaniswa ndzadzini sa guta khumo nya wukhozeyi nya vanungungulu nya malipha. Wukhozeyi wu hevbudzago silo soso ‘kha wu phasi gilo,’ kholu wa gu tshikedza milayo ya Nungungulu khu siolovedzo nya vathu. — Marko 7:7, 8.

 Nungungulu a ngu nyenya wukhongeyi nyo pfhadzedzeye. (Tito 1:16) Gasi gu phasa vathu gu hidzimeya ga Nungungulu, wukhongeyi wu yede gu kuha womi nya vathu tshigu ni tshigu nasiri gu gira sihena. Khu giyeyedzo, Bhibhiliya yari khiyo: “Oyu a pimisago gu khuye o khozeya Nungungulu, ganiolu na si woneleyi lidimi laye, a gu dzi senga abune, nigu wukhozeyi waye kha wu phasi gilo. Wukhozeyi wu agidego, wu gu mwalo gisolo mahoni ga Nungungulu wathu a gu Papayi wathu, khowu: Gu sayisa ava va fedwego khu vavelegi ni dzinoni sigaradzoni sawe ni gu mba dzi nyenyezisa khu gilo nya litigo.” (Jakobe 1:26, 27) Wuvbindrugedzeyi wa Rei Jaime wa gu thumisa lito “wukhongeyi nyo age” gasi gu thula sigiro sesi nyo age nya mba pfhadzedzeya.