Nungungulu a di vanga mwama ni nyamayi gasi gu hengeya malawu va gu ba va tshadhide. (Genesi 1:27, 28; Levhi 18:22; Mavingu 5:18, 19) Bhibhiliya yi ngu himbedzeya wubhayi ga vathu va gu na ni sivbango nya wuvelegi nya gu fane mwendro nya gu hambane. (1 Vakorinto 6:18) Isoso sa gu pata gu hengeya malawu, gu dandzeyana sivbango nya wuvelegi, gu hengeya malawu khu hwane, ni gu pharapharana sivbango nya wuvelegi.

 Ambari olu Bhibhiliya yi himbedzeyago wubhayi, iyo kha yi dzumeleye gu hi nyenya mwendro gu wugeya vathu va dzi girago vama mwendro vanyamayi. Wulangani nya isoso, Makristo ma ngu kutswa gu ninga “githawo vathu vatshavbo.” — 1 Pedro 2:17, Bíblia Fácil de Ler.

 Muthu a gu velegwa nari gheyi?

Bhibhiliya kha yi ganeyi khedzi va dzipwago khidzo vale va dzi girago dzigheyi, ambari olu hi ganeyago gu khiyo vathu vatshavbo va velegidwe na va gu wegelede avbo nya gu mba vbweta gu engisa milayo ya Jehovha. (Varoma 7:21-25) Khu kharato, wulangani nya gu vege gupima ga esi ava va dzi girago dzigheyi va sipwago, Bhibhiliya ya gu himbedzeya esi vathu vovo va girago.

 U nga tsakisa kharini Jehovha abari gu u na ni gudogoreya nya mba gwadi?

Bhibhiliya yari khiyo: “U nga woneledwi khu givili gyago. Songa gudogoreya nya sivbango nya givili gyago, a gu wubhayi.” (Vakolosi 3:5, Contemporary English Version) Wa gu ba u vbweta gu vbedza gudogoreya nya mba gwadi, gu na gu girago u gira silo nyo vivbe, u yede gu woneleya mapimo yago. Wa gu tadza mapimo yago khu silo nya sadi si na gu vbevbugeya gu potsa khu gu vbiredza gudogoreya nyo vivbe. (Vafilipi 4:8; Jakobe 1:14, 15) Ambari olu u na dzi garadzago gu pheyani, khu gu gimbiya nya tepo si na gu vbevbugeya gu gira isoso. Nungungulu a ngu tumbisa gu gu phasa ‘gu vbindrugedza mapimiselo yago.’ — Vaefeso 4:22-24.

 Nya vangi va gu siri dzigheyi va vbwetago gu landra milayo nya Bhibhiliya va ngu dzi garadza gasi gu woneleya gudogoreya gwawe. Khu giyeyedzo, isoso sa gu pata vathu nya vangi va si tshadhigo mwendro vale va tshadhidego va gu mba si kodza gu hengeya malawu ni pari wawe nya wugadzi. Vale va gu na ni godogoreya nya wugheyi, va nga gira sasimweso va gu ba va vbweta kamo gu tsakisa Nungungulu. — Dhewuteronome 30:19.